Chivkeeb 4:3-5

Nqe cim: 

“Twb yog vim Anpees ntseeg, nws thiaj muab tej uas zoo dua Ka-ees li fij rau Vajtswv. Vim Anpees ntseeg, Vajtswv thiaj suav hais tias Anpees yog tus ncaj ncees, rau qhov tej uas Anpees muab fij rau Vajtswv ntawd haum Vajtswv siab. Txawm yog Anpees twb tuag lawm los nimno nws kev ntseeg tseem niaj hnub qhia peb” (Henplais 11:4).

Lus nug rau sawvdaws xav: 

• Yam dab tsi tshwm rau Ka-ees lub neej? Vim licas? (saib ntxiv Henplais 11:4)? 
• Ka-ees ua licas thaum tus Tswv tsis yuav nws yam khoom fij? 
• Peb pheej ua licas thaum ntsib tej uas tsis mus raws li yus lub siab nyiam? 

Ib tsoom cov mloog txhua tus,

Txhua yam puavleej zoo mus txog thaum ob tug kwvtij uas yog Ka-ees thiab Anpees nkawd ua ke mus pehawm thiab fij khoom rau tus Tswv. Qhov uas Vajtswv txais yuav Anpees tej khoom fij tiamsis tsis txais yuav Ka-ees tej khoom fij yog vim licas? Tej zaum yuav muaj ntau lo lus teb li no. Tim ib, yog yam khoom fij ntawd muaj nqis lossis tsis muaj nqis. Tej zaum thaum chivthawj, Vajtswv qhia kom Adas thiab Evas tua tsiaj fij rau tus Tswv thiab muab cov tawv ua ris tsho rau nkawd hnav, thiab nkawd kuj muab qhia rau tej menyuam kom xyaum ua raws. Tom qab ntawd, Vajtswv hais rau Ka-ees hais tias: “Yog koj yeej ua qhov zoo, kuv yuav txais koj tej khoom fij” (nqe 7a). Lo lus no qhia tau hais tias, Ka-ees twb paub yam zoo lawm tiamsis nws tsis mloog lus thiab tsuas ua raws li nws lub siab nyiam xwb; vim li ntawd tus Tswv thiaj tsis txais tej khoom uas nws fij. Yuav tsum nco ntsoov hais tias, Vajtswv yog qhov tseemceeb ntawm kev pehawm thiab yog tus uas ntaus nqi rau peb txojkev pehawm. Tim ob, tej zaum yog tim lub siab fij khoom. Anpees fij yam uas zoo tshaj yog “tej menyuam yaj uas yog thawj tug”, Ka-ees tsuas muab “tej qoobloo uas nws sau tau” tsis yog muab “tej qoobloo uas yog thawj cov qoob” fij rau Vajtswv (nqe 3-4). Muaj coob leej nimno fij ntau yam rau tus Tswv tiamsis tseem khaws yam uas zoo tshaj thiab muaj nqis ua lawv tug. 

Tiamsis lub keebtiv ntawm nkawd kev fij khoom yog vim los ntawm qhov uas tau sau tseg hauv Henplais 11:4 hais tias; “Twb yog vim Anpees ntseeg, nws thiaj muab tej uas zoo dua Ka-ees li fij rau Vajtswv”, qhov no txhais tau hais tias, Anpees fij los ntawm nws txojkev ntseeg Vajtswv, tiamsis Ka-ees fij yog tsuas ua raws li kabke ntseeg uas niamtxiv qhia xwb. Qhov no qhia rau peb paub hais tias, txhua yam uas peb ua, yog tsis ua los ntawm kev ntseeg ces, puavleej tsis muaj qab hau dabtsi rau ntawm Vajtswv lub xubntiag (Henplais 11:6). 

Twb tsimnyog Ka-ees zeem paub nws qhov txhaum tiamsis nws tsis paub, nws tseem“chim ua ntsejmuag npautaws vog” thiab (nqe 5b). Ka-ees chim rau Vajtswv thiab nws tus kwv vim pom hais tias, tus Tswv ua tsis ncaj rau nws thiab tsis txais yuav nws tej khoom fij. Vim lub siab khavtheeb ua rau Ka-ees tsis zeem paub nws qhov txhaum, tsis yeem tig los lees txim thiab los ua raws li Vajtswv lub siab nyiam. 

Tej zaug peb kuj ua zoo ib yam li Ka-ees ua thaum uas tus Tswv qhuab ntuas peb. Thov Vajtswv pub rau peb paub siv lub sijhawm los nyob ntsiag to mloog Vajtswv qhia yam uas Nws lub siab nyiam rau peb, tso kev txhaum tseg thiab tsis txhob maj chim rau tus Tswv, rau lwm tus, thiab rau lub tsamthawj. 

Thov Vajtswv,

Tus Tswv, nyuam yaus ua Koj tsaug vim Koj hlub nyuam yaus thiab qhuab ntuas kom nyuam yaus yim hnub yim ua tau zoo ib yam li Koj. Thov Koj pub rau nyuam yaus muaj lub siab txo hwjchim ua raws li Koj lub siab nyiam. Amees. 

Ib tsoom cov mloog uas hmov thiab tshua,

Peb puas tau txo hwjchim thaum tus Tswv qhuab ntuas peb thiab? 

 Nyeem Vajluskub hauv peb lub xyoo: Exalas 8:31-9:15

Phab Xa Suab Lus nrog rau Phab Cob Qhia Tus Ntseeg koom tes txhim muaj.

Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com

Tshooj Youtube BHKTHN: https://www.youtube.com/c/bhkthn