2 Xwmtxheej Vajntxwv 6:12-39
Nqe cim:
“Yog lawv thov kuv thiab lawv hloov dua siab, tso lawv tej kev phem kev qias tseg, ces kuv yuav nyob saum ntuj mloog lawv tej lus thov, zam txim rau lawv thiab pub lawv lub tebchaws kom rov vammeej dua” (2 Xwmtxheej Vajntxwv 7:14)
Lus nug rau sawvdaws xav:
– Vajntxwv Xalumoos thov Vajtswv los ntawm tus cwjpwm twg?
– Nws lolus thov Vajtswv hais meej yam dab tsi?
– Qhov uas yuav tau Vajtswv mloog peb tej lus thov yog dab tsi?
Hauv lub rooj kevcai fij Tuamtsev rau tus Tswv, vajntxwv Xalaumoos txo hwjchim thiab thov Vajtswv kawg siab ntsws. Ua ntej, vajntxwv tau txhos caug thov Vajtswv rau ntawm nws cov pejxeem xubntiag, kom qhia pom nws txo hwjchim thiab txo hwjchim thaum mus ntsib Vajtswv tus loj tus siab. Vajntxwv tseem zeem paub hais tias, txawm yog Vajtswv tau hais tias lub Tuamtsev uas nws ua tau zoo zoo no cia Vajtswv nyob (2 Xwmtxheej Vajntxwv 6:6-10, 20), tiamsis Vajtswv tseem loj dua lub ntuj (nqe 18). Lub Tuamtsev tsuas yog qhov chaw uas Vajtswv thiab Nws haivneeg sib ntsib thiab Nws mloog lawv tej lus thov (nqe 20b), Vajtswv cia Nws lub pobntseg thiab qhovmuag nyob rau hauv Tuamtsev (2 Xwmtxheej Vajntxwv7:15-16). Yog li ntawd, vajntxwv zeem paub hais tias qhov chaw no yog “lub tsev pehawm Vajtswv” (Yaxayas 56:7; Malakaus 11:17…), ib qho chaw uas nws yuavtsum tau siv sijhawm los sib txuas lus nrog Vajtswv.
Tiamsis ntawd tseem tsis tau yog qhov kawg ntawm vajntxwv kev zeem paub txog “lub tsev pehawm Vajtswv”! Lo lus thov Vajtswv qhia meej txog yam tseemceeb uas vajntxwv zeem paub ntawd yog: “pehawm Vajtswv mloog tej lus thov, teb thiab zam txim” (nqe 21). Vim li cas cheemtsum kev zam txim? Vim txhua tus puavleej muaj kev txhaum, kev txhaum yog yam uas tsis muaj leejtwg zam dhau (nqe 36) thiab nuj nqis ntawm kev txhaum yog “lub tebchaws muaj kev tshaib nqhis lossis muaj kab mob kis lossis tej qoobloo raug puastsuaj,…. yeebncuab tawmtsam” (nqe 28). Kev txhaum yog tibneeg qhov teebmeem loj, thiab haukev kom tau zam txim raws li vajntxwv tej lus thov yog “tig rov los cuag koj thiab lawv tuaj rau hauv lub Tuamtsev no lees lawv tej kev txhaum thiab thov koj zam txim” (nqe 24).
Vajtswv haivneeg cheemtsum tau kev zam txim thiab yam uas lawv yuavtsum ua kom tau kev zam txim yog tso kev txhaum tseg “tig rov los cuag Vajtswv” (nqe 24), “lees txim” rau Nws (nqe 26). Thawj thawj nqe hauv 95 nqe lus ntawm Martin Luther yog: “Thaum tus Tswv thiab peb tus xibhwb uas yog Tswv Yexus Khetos hais tias, “cia li tso nej tej kev txhaum tseg” (Mathais 4:17), ces yog Vajtswv xav kom txhua tug ntseeg lub neej yog lub neej uas tso kev txhaum tseg”. Vajntxwv Xalumoos lolus thov Vajtswv thiab lwm tus peb lolus thov Vajtswv hauv phau Vajluskub qub (Exalas 9, Nehemis 9, thiab Daniyees 9) puavleej yog kev thov Vajtswv hloov siab lees txim. Tsimnyog kawm plaub lolus thov Vajtswv uas zoo kawg nkaus hauv phau Vajluskub qub no vim puavleej yog kev thov Vajtswv tso kev txhaum, lees txim thiab thov Vajtswv zam txim.
Peb yuavtsum paub hais tias kev thov Vajtswv yog ib txoj koob hmoov uas Vajtswv pub rau cov tibneeg txhaum uas pheej ua txhaum li peb no, tau txuas nrog Nws, vim li ntawd, yuavtsum tso kev txhaum tiag tiag, lees txim kom tau Vajtswv zam txim thiab mloog peb tej lus thov.
Thov Vajtswv,
Vajtswv, hauv lub neej txhua hnub nyuam yaus pheej txawj ua txhaum rau Koj, thov pab nyuam yaus zeem paub kev txhaum, tso kev txhaum tseg thiab thov Koj zam txim rau nyuam yaus. Thov pab nyuam yaus paub khiav deb kev txhaum thiab txawj ua neej haum Koj siab. Nyuam yaus tuav Tswv Yexus lub npe thov ,Amees.
Peb pheej thov Vajtswv los ntawm tus cwjpwm twg?
Nyeem Vajluskub hauv peb lub xyoos: 2 Vajntxwv 2
Kênh Youtube BHKTHN:
