Klei Aê Diê Blŭ: II Klei Yăl Dliê 6:12-39
Êlan kliăng: “Tơdah phung ƀuôn sang Kâo arăng pia hŏng anăn Kâo bi luă gŭ diñu pô, wah lač leh anăn duah ƀô̆ mta Kâo, leh anăn lui êlan soh diñu, hlăk anăn Kâo srăng hmư̆ mơ̆ng adiê, pap brei klei soh diñu, leh anăn bi hlao čar diñu.” (II Klei Yăl Dliê 7:14)
Klei êmuh ksiêm mĭn: Hŏng si knuih mtao Y-Salômôn wah lač leh? Kơ ya mta klei ñu kñăm hlăm klei wah lač? Ya jing mta čuăn yuôm čiăng kơ Khua Yang mđing hmư̆ klei wah lač?
Hlăm knăm myơr Sang Yang kơ Khua Yang, mtao Y-Salômôn hŏng klei huĭ mpŭ leh anăn jih ai tiê wah lač hŏng Khua Yang. mâo lu klei hriăm yuôm mơ̆ng klei wah lač anei. Êlâo hĭn, mtao čuôn kơŭt wah lač ti anăp phung ƀuôn sang ñu brei ƀuh ai mĭn luă gŭ, bi mtrŭn ñu pô tơdah dôk ti anăp Pô Ti Dlông Hĭn. Mtao thâo kral Khua Yang leh anăn phung ƀuôn sang Khua Yang jing yuôm hĭn kơ klei hdĭp ñu, amâo yap kơ ñu pô jing yuôm hĭn ôh. Mtao ăt thâo săng snei, wăt tơdah Khua Yang lač leh Sang Yang prŏng siam mtao mdơ̆ng pioh dưm Anăn Aê Diê (II Klei Yăl Dliê 6:6-10, 20), ƀiădah Aê Diê prŏng hĭn kơ jih tal adiê (êlan 18). Sang Yang jing anôk Aê Diê bi tuôm, mđing hmư̆ phung ƀuôn sang Ñu (êlan 20b), Aê Diê dưm “ală, knga” Ñu tinăn (II Klei Yăl Dliê 7:15-16). Kyuanăn, mtao thâo săng anei jing “sang wah lač” (Y-Êsai 56:7; Y-Markôs 11:17…), anôk mtao pioh mmông găl čiăng blŭ hrăm hŏng Aê Diê.
Ƀiădah anăn ka djŏ klei knhal tuč mtao thâo săng kơ “wah lač” ôh! Klei wah lač kñăm klei yuôm mtao thâo kral: “Hmư̆ bĕ klei dĭng buăl Ih…tơdah Ih hmư̆ leh, pap brei bĕ” (êlan 21). Ya ngă čiăng akâo dưi pap brei? Kyuadah jih jang mnuih soh sơăi, amâo mâo pô dưi tlaih ôh mơ̆ng klei soh (êlan 36) leh anăn boh jhat mơ̆ng klei soh jing “klei ư̆ êpa hlăm čar, klei ruă bi mdjiê, adiê không prŏng amâo mâo hjan…; amâodah phung roh wang jŭm ƀuôn diñu dôk” (êlan 28). Klei soh yơh jing klei dleh dlan êdi kơ anak mnuih leh anăn êlan čiăng dưi mâo klei pap brei jing “lŏ wĭt leh anăn tŭ anăn Ih, wah lač leh anăn kwưh kơ Ih hlăm sang anei;” (êlan 24).
Ƀuôn sang Aê Diê čiăng dưi mâo klei pap brei leh anăn bruă brei diñu ngă čiăng dưi mâo klei pap brei jing kmhal klei soh “lŏ wĭt kơ Aê Diê” (êlan 24), “lui klei soh diñu” (êlan 26). Hlăm 95 mta klei mĭn Martin Luther bi êdah tal êlâo mâo snei: “Tơdah Khua Yang leh anăn Nai drei jing Khua Yang Yêsu Krist lač, ‘Kmhal hĕ bĕ kơ klei soh diih’ (Y-Mathiơ 4:17), Ñu čiăng kơ kluôm jih klei hdĭp phung đăo kơ Khua Yang jing klei hdĭp thâo kmhal kơ klei soh”. Klei mtao Y-Salômôn wah lač leh anăn tlâo klei wah lač mkăn hlăm Hdruôm Hră Klei Bi Mguôp Hđăp (Y-Êsra 9, Y-Nêhêmi 9 leh anăn Y-Đaniel 9) jing klei wah lač kmhal kơ klei soh sơăi. Jing yuôm năng hriăm êdi, tơdah pă hlăm jih jang klei wah lač tloh ênoh hĭn hlăm hdruôm hră Klei Bi Mguôp Hđăp jing klei wah lač kmhal kơ klei soh, hưn klei soh leh anăn akâo klei pap brei klei soh sơăi!
Brei drei thâo săng snei, wah lač jing sa klei pap Khua Yang brei kơ phung mnuih soh ngă soh nanao msĕ si drei, dưi blŭ hrăm hŏng Ñu, kyuanăn, brei sĭt hŏng jih ai tiê kmhal kơ klei soh, hưn klei soh čiăng Khua Yang dưi pap brei leh anăn mđing hmư̆ klei drei kwưh akâo.
Si knuih drei khăng wah lač hŏng Khua Yang?
Wah lač: Ơ Ama kâo khăp! Hlăm klei hdĭp, kâo ăt khăng ngă soh hŏng Ama, brei kâo thâo kral, kmhal kơ klei soh leh anăn akâo kwưh kơ Khua Yang pap brei klei soh kâo. Akâo Khua Yang brei kơ kâo klei ktang myang Khua Yang čiăng đuĕ kbưi mơ̆ng klei soh, leh anăn dôk hdĭp bi mơak kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
