II Xamuyees 22:1-7, 17-20
Nqe cim:
“Thaum kuv ntsib kev nyuaj siab ntxhov plawv kuv hu tus Tswv xwb; kuv hu kuv tus Vajtswv pab kuv.” (II Xamuyees 22:7a)
Lus nug rau sawvdaws xav:
– Vajntxwv Daviv twb tau ntsib tej kev txomnyem twg hauv kev ua neej?
– Lub tswvyim pab kom nws dim yog li cas?
– Tus Tswv haivneeg yuav tau ua dabtsi kom kovyeej kob tsovrog nyuaj sab ntsujplig?
II Xamuyees 22 kuj tau muab theej dua hauv Phau Ntawv Nkauj 18, uas yog Vajntxwv Daviv zaj nkauj hu qhuas Vajtswv vim tus Tswv cawm nws dim hauv yeebncuab txhais tes. Cov nqe nkauj xubthawj hais txog tej uas Daviv ntsib tiamsis tau tus Tswv cawm dim hauv tej yeebncuab txhais tes. Ua ntej uas los ua vajntxwv, ntau zaus Vajntxwv Xa-ules caum Daviv tua povtseg. Tiamsis thaum los ua vajntxwv kav tebchaws, Daviv niaj hnub tawmtsam tej yeebncuab uas yog lwm haivneeg. Daviv piav qhia qhov uas cov yeebncuab tuaj tua xws li:“txojkev puastsuaj nphau phwj yaws tuaj qhwv nkaus kuv”, “txojkev tuag”, “lub qhov ntxa” nyob puag ncig nws (nqe 5-6). Nyob rau lub tsamthawj nyuaj kawg li ntawd, Daviv tsuas paub vamkhom thiab taij thov Vajtswv tib leeg xwb (nqe 7). Daviv qhuas Vajtswv vim Nws yog tus cawm Daviv. Daviv yeej tau txais tus Tswv txojkev pab zoo li “lub chaw nkaum”, “daim thaiv hniav ntaj”, “tso rau qhov chaw kaj siab lug” (nqe 2-3). Thaum raug txomnyem thiab nyuaj siab, Daviv tsuas paub taij thov Vajtswv tus uas yog “cawm kuv dim ntawm kuv cov yeebncuab.” (nqe 4).
Vajntxwv Daviv ua Vajtswv tsaug vim Nws hnov Daviv tej lus taij thov (nqe 7b). Nyob qhov chaw siab, Vajtswv cev tes los tuav thiab rub Daviv tawm hauv lub qhov tob tob los. Txawm yog cov yeebncuab yuav muaj zog dua, los Vajtswv twb saib ntsoov Daviv, pab thiab cawm nws (nqe 17-20). Txawm yog Vajntxwv Daviv yog ib tug tubrog, vajntxwv mus ntaus rog, los nws yeej tsis khav nws lub zog, kev txawj ntse lossis nws lub peevxwm, tiamsis Daviv yeej vamkhom Vajtswv lub zog, kev txawj ntse thiab kev pab cawm. Daviv zeem paub qhov uas nws kovyeej yog tus Tswv pab. Lub tswvyim hla dhau tej kev txomnyem, sim siab yog kev thov Vajtswv. Thiab Vajtswv tus uas muaj sia nyob yeej tsis tso Daviv tseg, Nws niaj hnub hnov Daviv tej lus taij thov thaum ntsib tej kev txomnyem. Vajntxwv Daviv sau tseg qhov uas nws tau txais li no, “Thaum kuv ntsib kev nyuaj siab ntxhov plawv kuv hu tus Tswv xwb; kuv hu kuv tus Vajtswv pab kuv. Hauv nws lub Tuamtsev nws hnov kuv tej lus thov; nws mloog kuv lub suab quaj thov nws pab.” (nqe 7).
Txhua hnub tus Tswv haivneeg yeej ntsib kob tsovrog sab ntsujplig. Dab ntxwgnyoog ncig mus ncig los tawmtsam peb los ntawm ntau txoj hau kev raws li Timthawj Paulus hais: “Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim kav tiam tsaus ntuj.” (Efexus 6:12). Tej cuabyeej sab ntsujplig uas peb yuav tsum npaj rawv kom tawmtsam yeej yog ceevfaj, thov Vajtswv, cia Vaj Ntsujplig coj qhia, thiab thov Vajtswv pab cov kwvtij ntseeg kom txhua tus muaj yeej kob tsovrog hauv kev ua neej.
Thov Vajtswv,
Tus Tswv, thov Koj qhia kom nyuam yaus nco ntsoov Koj, taij thov Koj hauv txhua lub tsamthawj. Thov Koj pub rau nyuam yaus paub tias txojkev cawm yog los ntawm tus Tswv los, thaum uas thov Vajtswv tas siab. Nyuam yaus tuav Tswv Yexus lub npe thov, Amees.
Peb puas muab qhov kev thov Vajtswv saib tseemceeb thaum ntsib kev txomnyem?
Nyeem Vajluskub hauv peb lub xyoo: Yaxayas 64
Kênh Youtube BHKTHN:
