Klei Aê Diê Blŭ: II Y‑Samuel 22:1-7, 17-20
Êlan kliăng: “Hlăm klei knap mñai kâo, kâo iêô kwưh kơ Yêhôwa, kâo iêô kwưh kơ Aê Diê kâo.” (II Y‑Samuel 22:7a)
Klei êmuh ksiêm mĭn: Ya klei knap mñai mtao Y‑Đawit găn leh hlăm klei hdĭp ñu? Ya êlan phŭn đru ñu dưi găn jih klei truh anăn? Ya mta klei brei phung anak ƀuôn sang Aê Diê ngă, čiăng mâo klei dưi hĭn hlăm klei bi blah myang bŏ hŏng klei lông dlăng dleh dlan?
II Y‑Samuel 22 ăt lŏ čih wĭt mơh hlăm Klei Mmuñ Hđăp 18, jing klei mmuñ mtao Y‑Đawit mpŭ mni kơ Khua Yang kyuadah bi mtlaih leh ñu mơ̆ng phung kahan roh. Dŭm êlan tal êlâo hlăm klei mmuñ čih yăl dliê si klei ñu găn, si klei Khua Yang bi mtlaih ñu êjai tlă anăp phung roh. Êlâo kơ jing mtao, lu blư̆ mtao Y‑Sôl duah êlan čiăng bi mdjiê ñu. Ktuê jih hruê ñu kiă kriê, mtao Y‑Đawit ăt bi blah nanao hŏng lu snăk phung roh mơ̆ng lu djuê ana mdê mdê. Ñu hưn bi êdah phung roh ksŭng blah ñu msĕ si “êa poh yă klei djiê”, “êa êtăng klei luč”, “Bră ƀuôn phung djiê”, “ñuăl klei djiê” wang jŭm ñu (êlan 5-6). Hlăm klei boh knap mñai snăk sơưn, ñu knŏng thâo knang leh anăn iêô kwưh hjăn kơ Aê Diê pô yơh (êlan 7). Ñu mpŭ mni kơ Aê Diê kyuadah Aê Diê bi mtlaih leh ñu. Ñu thâo kral sĭt Khua Yang jing “Boh tâo kâo leh anăn kđông kâo”, jing “khil kâo”, “ki kơ klei bi mtlaih leh anăn anôk kâo đuĕ dăp” (êlan 2-3). Hlăm klei knap mñai leh anăn huĭ hyưt, ñu knŏng thâo iêô kwưh kơ Khua Yang jing “Pô năng arăng bi mni” (êlan 4).
Mtao Y‑Đawit bi mni kơ Khua Yang kyuadah Khua Yang hmư̆ klei ñu iêô kwưh (êlan 7b). Mơ̆ng dlông, Aê Diê yơr kngan mă ñu, ktŭng ñu mơ̆ng êa prŏng êlam. Wăt tơdah phung roh jing ktang hĭn kơ ñu dưn, ƀiădah ñu mâo Aê Diê traih dlăng, đru krŭ leh anăn bi mtlaih (êlan 17-20). Wăt tơdah mtao Y‑Đawit jing sa čô kahan jhŏng ktang, mtao kơ kdrăn blah, ƀiădah ñu amâo hưn ktưn kơ ai ktang, klei knhâo thâo mĭn amâodah klei dưi ñu pô ôh, ƀiădah ñu knang nanao kơ klei ktang, klei thâo mĭn leh anăn klei bi mtlaih mơ̆ng Aê Diê. Ñu thâo săng jih jang klei ñu dưi hĭn hlăm klei bi blah kbiă hriê mơ̆ng Aê Diê pô sơăi. Êlan phŭn ñu dưi găn jih jang klei knap mñai, klei lông dlăng jing mơ̆ng klei wah lač yơh. Leh anăn klă sĭt Aê Diê hdĭp amâo tuôm wơr bĭt ñu ôh, Aê Diê mđing hmư̆ ñu iêô kwưh hlăm anôk knap mñai. Mtao Y‑Đawit lŏ čih wĭt jih klei ñu găn snei, “7Hlăm klei knap mñai kâo, kâo iêô kwưh kơ Yêhôwa, kâo iêô kwưh kơ Aê Diê kâo. Mơ̆ng sang yang Ñu, Ñu hmư̆ leh asăp kâo, leh anăn klei kâo ur krao truh kơ ƀăng knga Ñu.” (êlan 7).
Phung anak ƀuôn sang Aê Diê grăp hruê tlă anăp hŏng kdrăn blah myang sơăi. Yang jhat hruê mlam dôk kăp čiăng ksŭng ngă kơ drei hŏng lu êlan msĕ si khua ƀĭng kna Y‑Pôl lač leh: “Kyuadah drei amâo bi kdơ̆ng hŏng kđeh leh anăn êrah ôh, ƀiădah hŏng phung khua kiă kriê, hŏng phung mâo klei dưi, hŏng phung khua mtao lăn ala ênuk mmăt anei, hŏng phung yang jhat ƀai dôk hlăm jih adiê.” (Êphêsô 6:12). Mnơ̆ng bi blah myang brei drei mprăp čiăng dưi hĭn jing, klei dôk răng, wah lač, iêô kwưh klei atăt gai mơ̆ng Yang Mngăt Jăk, leh anăn wah lač brei wăt kơ phung ayŏng adei drei, čiăng kơ jih jang drei mâo klei dưi hĭn hlăm kdrăn blah bŏ hŏng klei lông dlăng dleh dlan hlăm klei hdĭp.
Si ngă drei êlâo hĭn iêô kwưh kơ Khua Yang mơ̆ tơdah tuôm hŏng klei knap mñai truh?
Wah lač: Ơ Khua Yang, akâo Ih mñă kâo brei hdơr kơ Khua Yang nanao, myơr klei wah lač, iêô kwưh hlăm jih jang boh klei truh. Brei kâo thâo kral klei bi mtlaih hriê mơ̆ng Khua Yang tơdah kâo iêô kwưh hŏng jih ai tiê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Êsai 64
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
