Klei Aê Diê Blŭ: Y-Đaniel 6:1-10
Êlan kliăng: “Tơdah Y-Đaniel thâo mtao čih anăn leh kơ hră anăn, ñu mŭt hlăm sang ñu ƀăng bhă điêt hlăm adŭ tal dlông ñu pŏk jih phă ƀuôn Yêrusalem; leh anăn tlâo bliư̆ grăp hruê ñu čuôn kơŭt wah lač leh anăn bi mni kơ Aê Diê ñu msĕ si ñu bhiăn ngă leh” (Y-Đaniel 6:10).
Klei êmuh ksiêm mĭn: Ya klei truh Y-Đaniel dôk tlă anăp? Ya klei ñu ăt sĭt suôr ngă? Ya ngă brei drei ăt sĭt suôr wah lač kơ Aê Diê mơh wăt tơdah ya klei truh dưn?
Y-Đaniel jing sa čô hlăm phung mnă Israel arăng mă đue ̆ kơ čar Babilôn hlăk êjai ñu jing êdam ngiêt leh anăn arăng ruah ñu bi hriăm mjuăt pioh mă bruă hlăm sang mtao. Hŏng ai tiê huĭ mpŭ kơ Aê Diê, sa hnơ̆ng sĭt suôr djă pioh klei đăo pô, Y-Đaniel mâo Khua Yang dôk mbĭt leh anăn hơêč hmưi mdê hĭn. Ñu mă bruă kơ 4 ênuk mtao ti Ƀaƀilôn ƀiă êdi (Y-Đaniel 1:1-21).
Hlăm trăn Klei Aê Diê Blŭ anei, Y-Đaniel dôk tlă anăp hŏng klei phung khua prŏng mă bruă mbĭt hŏng ñu nač iăng leh anăn bi kdơ̆ng, kyuadah ñu mâo klei knhâo thâo mĭn kdlưn hĭn kơ phung diñu (êlan 3). Diñu duah klei čiăng kčŭt leh anăn ngă jhat kơ gơ̆, “ƀiădah diñu amâo dưi mâo klei kčŭt amâodah ƀuh klei wê hlăm ñu ôh, kyuadah ñu jing sĭt suôr” (êlan 4). Snăn yơh diñu kñăm kơ klei gơ̆ đăo kơ Aê Diê kyuadah diñu thâo kơ YĐaniel khut khat djă pioh kjăp klei đăo gơ̆. Diñu ngă mnêč akâo mtao čih anăn kơ hră klei bhiăn êjai tlâo pluh hruê amâo mâo pô dưi kwưh kơ yang mkăn ôh êngao kơ mtao, hlei pô amâo ngă tui si hră klei bhiăn srăng hwiê pô anăn hlăm war êmông gu (êlan 6-8).
Tơdah Y-Đaniel thâo klei anăn, ñu amâo mâo klei rŭng huĭ ôh ƀiădah ăt ñu jhŏng sĭt suôr djă pioh klei wah lač msĕ si ñu bhiăn ngă leh. Ñu amâo mâo huĭ mdăp klei ñu wah lač ôh, ƀiădah pŏk jih ƀăng bhă phă ƀuôn Yêrusalem; leh anăn tlâo bliư̆ grăp hruê. Wah lač jing klei ñu bhiăn ngă nanao grăp hruê (êlan 10), kyuanăn thâodah ti krah klei arưp aram mơ̆ng hră kăm ghă “amâo dưi kwưh kơ yang mkăn mdê hŏng mtao”, Y-Đaniel ăt kăn lui, kăn bi luč klei sĭt suôr ñu bhiăn ngă “čuôn kơŭt wah lač leh anăn bi mni kơ Aê Diê”. Boh mơ̆ng klei ñu sĭt suôr wah lač anăn jing êjai dôk hlăm war êmông gu, ñu mâo Aê Diê răng mgang leh anăn Anăn Aê Diê mâo klei guh kơang ti anăp mtao wăt phung mă bruă kơ mtao leh anăn lu mnuih dưi thâo (Y-Đaniel 6:22-27).
Hlăm ƀuôn sang ênuk anei, phung anak Aê Diê ăt kăn tlaih mơh mơ̆ng klei arăng nač, bi kdơ̆ng leh anăn duah mnêč čiăng ngă jhat kơ klei drei đăo. Brei drei tui hriăm mơ̆ng klei bi hmô Y-Đaniel, ăt sĭt suôr wah lač hŏng klei jhŏng amâo mâo huĭ ôh. Aê Diê dưi bi mtlaih amâodah amâo mâo bi mtlaih drei mơ̆ng klei jhat, ƀiădah sĭt nik Aê Diê mơak snăk kơ klei drei dôk kjăp, sĭt suôr hlăm klei drei đăo kơ Ñu. Klei Aê Diê Ƀuăn hlăm Klei Bi Hriêng 28:20a, “Mnuih sĭt suôr srăng bŏ hŏng klei jăk jĭn”. Aê Diê jing Pô Sĭt Suôr kyuanăn Ñu čiăng kơ drei ăt dôk sĭt suôr hŏng Ñu nanao wăt tơdah ya klei truh dưn mơh, boh nik nak dôk sĭt suôr hlăm klei wah lač. Aê Diê čiăng ƀuh klei sĭt suôr drei êlâo hĭn kơ Ñu ngă bruă Ñu.
Si ngă drei ăt sĭt suôr wah lač mơ̆, wăt êjai lu bliư̆ ka mă tŭ klei Khua Yang wĭt lač?
Ơ Khua Yang, ti krah klei arăng ngă jhat, nač iăng, bi kdơ̆ng hŏng klei đăo, akâo kơ Khua Yang thiăm brei klei ktang kơ kâo, đru kâo djă pioh klei sĭt suôr wah lač thâodah ya klei truh jŭm dar amâo djŏ msĕ si klei kâo čang guôn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 13:8-14:5
Kênh Youtube BHKTHN:
