Klei Aê Diê Blŭ: I Têsalônik 2:1-4
Êlan kliăng: “Wăt tơdah hmei tŭ leh klei knap leh anăn klei arăng ngă jhat ti ƀuôn Philip, msĕ si diih thâo leh, hmei ăt mâo klei jhŏng hlăm Aê Diê hmei čiăng hưn kơ diih klei mrâo mrang jăk Aê Diê ti krah lu klei bi kdơ̆ng.” (I Têsalônik 2:2).
Klei êmuh ksiêm mĭn: Si klei khua ƀĭng kna Y-Pôl kah mbha klei ñu bi knal kơ klei mtô Klei Mrâo Mrang Jăk? Ya klei ñu ngă hlăk tuôm hŏng klei dleh dlan? Ya klei đru ñu ăt dưi dôk sĭt suôr hiu hưn Klei Mrâo Mrang Jăk? Ya ngă brei drei dôk sĭt suôr hiu hưn Klei Mrâo Mrang Jăk?
Khua ƀĭng kna Y-Pôl mñă wĭt kơ phung đăo ti ƀuôn Têsalônik kơ klei ñu mbĭt hŏng êpul ñu bi knal hlăm bruă hiu hưn Klei Mrâo Mrang Jăk. Bruă Phung Khua Ƀĭng Kna kdrêč 16 brei thâo kơ klei dleh suăi khua ƀĭng kna Y-Pôl mbĭt hŏng mah jiăng ñu găn leh ti ƀuôn Philip. Kyua klei ñu suôt yang jhat mơ̆ng sa čô mniê êra jing hlŭn kơ pô hiu mdian, phung khua ñu ƀuh klei anăn ngă kơ diñu luč klei dưi ƀơ̆ng lu prăk snăn diñu kčŭt khua ƀĭng kna Y-Pôl leh anăn Y-Silas ba kơ phung khua kiă kriê. Arăng hiêk toh čhiăm ao digơ̆ dua, čăm hŏng giê, hnuh jơ̆ng leh anăn krư̆ hlăm lam war mmăt. Wăt tơdah tŭ “klei knap leh anăn klei arăng ngă jhat”, khua ƀĭng kna Y-Pôl ăt kăn kdŭn rei hlăm bruă mtô Klei Mrâo Mrang Jăk. Leh kbiă đuê̆ mơ̆ng ƀuôn Philip, ñu mbĭt hŏng phung mah jiăng ñu lŏ nao truh ti ƀuôn Têsalônik hiu hưn Klei Mrâo Mrang Jăk.
Khua ƀĭng kna Y-Pôl kñăm “hmei ăt mâo klei jhŏng hlăm Aê Diê hmei čiăng hưn kơ diih klei mrâo mrang jăk Aê Diê ti krah lu klei bi kdơ̆ng.” (êlan 2). Klei bi kdơ̆ng, klei dleh dlan amâo dưi mkhư̆ ghă ai tiê sĭt suôr sa čô mnuih hur har kyua Klei Mrâo Mrang Jăk. Khua ƀĭng kna Y-Pôl kñăm klă mngač bruă mtô Klei Mrâo Mrang Jăk jing bruă tui si Aê Diê yap leh ñu năng jao kơ ñu (êlan 4a), snăn yơh ñu hŏng jih ai tiê hiu hưn mtô lač wăt klei truh dleh dlan dưn. Klei kñăm čiăng knhal tuč kơ bruă ñu hiu hưn mtô lač Klei Mrâo Mrang Jăk čiăng “bi mơak kơ Aê Diê” amâo djŏ čiăng “bi mơak kơ mnuih” ôh (êlan 4b). Khua ƀĭng kna Y-Pôl kñăm hŏng phung đăo ti ƀuôn Têsalônik kơ bruă ñu hiu hưn Klei Mrâo Mrang Jăk amâo kbiă hriê mơ̆ng klei čhuai amâodah klei čhŏ mrŏ ôh, kăn mơ̆ng klei mplư rei. Ƀiădah ñu ăt sĭt suôr nanao hiu hưn mtô lač čiăng bi mơak kơ Khua ñu jing Aê Diê, Pô ksiêm ai tiê ñu (êlan 3-4).
Klei hưn Klei Mrâo Mrang Jăk dưi bi msĕ hŏng ngăn dưn Aê Diê jao kơ grăp čô anak Ñu, leh anăn sĭt yơh Khua Yang amâo čiăng ôh drei jing phung kiă kriê sang “dơr mdăp” hĕ ƀiădah brei jing phung kiă kriê sang sĭt suôr “lŏ bi mđĭ” ya mta bruă Aê Diê jao “thâodah mông găl amâodah amâo găl ôh” (II Y-Timôthê 4:2). Sĭt suôr jing knuih yuôm sa čô kiă kriê sang. Tơdah kƀah knuih anei, drei amâo dưi jing pô kiă kriê sĭt suôr kơ Aê Diê ôh. Sĭt suôr jing klei jih ai tiê ngă ya mta bruă drei ƀuăn rơ̆ng leh thâodah tŭ klei kƀah wư, ruă knap amâodah wăt tuôm hŏng klei bi kdơ̆ng. Pô sĭt suôr jing mnuih năng knang leh anăn mâo ai tiê kjăp phĭt êlâo êdei ăt dôk sa hnơ̆ng. Sa čô kiă kriê sang sĭt suôr čuăn gĭr dôk kjăp ngă bruă khua ñu jao tơl knhal tuč khă tuôm hŏng klei knap mñai, dleh dlan dưn. Brei drei tui hlue klei bi hmô mơ̆ng khua ƀĭng kna Y-Pôl dôk sĭt suôr hiu hưn mtô lač Klei Mrâo Mrang Jăk Aê Diê jao.
Si ngă drei sĭt suôr hiu hưn Klei Mrâo Mrang Jăk Aê Diê jao mơ̆?
Ơ Khua Yang, akâo kơ Ih đru kâo đăm kdŭn tluôn, êdu ai ôh tơdah kah mbha Klei Mrâo Mrang Jăk, thâodah tuôm hŏng klei bi kdơ̆ng amâodah dleh dlan. Akâo Khua Yang thiăm brei kơ kâo mâo ai tiê jhŏng msĕ si khua ƀĭng kna Y-Pôl čiăng kơ kâo dưi dôk sĭt suôr hiu hưn Klei Mrâo Mrang Jăk.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 12:1-13:7
Kênh Youtube BHKTHN:
