Klei Aê Diê Blŭ: Y-Luk 11:5-13
Êlan kliăng: “Yêsu blŭ sa klei bi hriêng kơ digơ̆ čiăng bi hriăm digơ̆ jing yuôm wah lač nanao amâo êdu ai ôh.” (Y-Luk 18:1)
Klei êmuh ksiêm mĭn: Ya knuih Khua Yang Yêsu kñăm tơdah wah lač? Ya ngă brei mâo hĕ knuih anei? Ya mta klei brei drei bi mlih hlăm klei wah lač?
Knuih kdlưn hĭn hlăm klei blŭ bi hriêng anei jing klei dôk gĭr. Jih boh blŭ hlăm êlan 9-10 msĕ si akâo, duah, khŏk, čiăng lač kơ klei dôk ngă ară anei hin, lač kơ knhuang klei ngă nanao. Snăn, wah lač amâo djŏ jing sa mta bruă klei đăo bhiăn ngă khă bi leh ôh, amâodah sa hlăm lu mta hdră čiăng mgaih mkra klei dleh dlan pô ôh, ƀiădah brei drei ngă hŏng klei sĭt kpă, hŏng jih ai tiê, hŏng sa knuih dôk gĭr.
George Muller, pô mkŏ mjing bruă rông phung hđeh anak êrĭt hing ang, ti čar Anh hlăm gưl ênuk 19, jing sa čô mnuih dôk gĭr wah lač. Ñu kčưm dơ̆ng wah lač kơ mah jiăng ñu đăo kơ Khua Yang Yêsu mơ̆ng hlăk ñu adôk mda snăk, leh anăn klei wah lač anei ñu ăt djă pioh nanao êbeh kơ 60 thŭn. Boh tŭ dưn jing sa hlăm dua čô mah jiăng ñu đăo leh kơ Khua Yang êlâo bhiâo kơ George Muller djiê. Leh anăn mah jiăng tal dua ñu đăo kơ Khua Yang êdei kơ George Muller wĭt kơ Khua Yang hlăm brô sa thŭn.
Mâo sa mta klei khăng bi êmuh snei, djŏ mơ̆ dôk gĭr wah lač nanao kơ sa mta klei čiăng mâo, jing kyuadah kƀah klei đăo kơ Aê Diê? Ya ngă Khua Yang Yêsu čiăng kơ drei dôk gĭr wah lač? Brei drei mđing snei, klei dôk gĭr wah lač amâo djŏ čiăng kơ Khua Yang hmư̆ ôh ƀiădah čiăng bi êdah klei drei đăo kơ Aê Diê. Dôk gĭr wah lač krơ̆ng drei dôk kjăp hlăm Khua Yang, amâo mgei, amâo phưi lui, amâodah tui duah êlan mgaih mkra mkăn ôh. Leh anăn dôk gĭr wah lač bi klă klei drei wah lač jing sĭt êdi.
Mta klei lŏ čuê čiăng thâo, dŭm sui dôk gĭr? Anei jing sa klei êmuh dleh lŏ wĭt lač, leh anăn klei wĭt lač djŏ guôp hŏng mta klei mdê mdê: Êlâo hĭn, brei drei dôk gĭr wah lač kơ jih jang mta klei drei thâo sĭt nik jing klei Aê Diê čiăng, msĕ si wah lač kơ mngăt mnuih dôk rai luč dưi mâo klei bi mtlaih, kơ klei dưi jing doh jăk kơ drei pô, kơ klei đĭ hriê kơ prŏng leh anăn mâo klei sa ai hlăm Phung Sang Aê Diê, kơ klei hdĭp myang kơ grăp čô hlăm sang pô, đa đa mkăn… Ƀiădah lĕ, mâo lu mta klei djŏ guôp hŏng klei Aê Diê čiăng ƀiădah drei amâo thâo klă ôh Khua Yang brei kơ drei amâodah hơăi, msĕ si boh klei George Muller tuôm. Dôk gĭr wah lač brei kơ mnuih mkăn đăo kơ Khua Yang jing klei djŏ, ƀiădah si ñu dưi thâo klă klei bi mtlaih srăng brei kơ dua čô mah jiăng ñu? Hlăm boh klei anei brei mđing hmư̆ klei bi êdah mơ̆ng Yang Mngăt Jăk.
Hĭn mơh, pô wah lač brei mâo klei đăo kơ Aê Diê, brei drei đăo kơ Aê Diê jing Pô thâo klă ya klei jing jăk hĭn kơ drei (êlan 11-13). Leh anăn klei jăk hĭn Aê Diê brei kơ drei jing Yang Mngăt Jăk, jing Pô atăt gai drei wah lač, jing Pô wah lač brei kơ drei, jing Pô đru drei thâo săng klei Aê Diê čiăng (Rôm 8:26-27).
Mâo mơ̆ ya mta klei bi kgăn drei amâo dưi dôk gĭr wah lač?
Wah lač: Ơ Khua Yang, akâo Ih đru kâo đăo knang kơ Ih hŏng jih ai tiê hlăm djăp mta boh klei truh hlăm klei hdĭp, tui duah nanao klei Khua Yang čiăng leh anăn kăp đup gưt jih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
