Klei Aê Diê Blŭ: Y-Yôhan 20:1-18
Êlan kliăng:
“Yêsu lač kơ ñu, “Ơ mniê, si ngă ih hia lĕ? Hlei ih duah?” (Y-Yôhan 20:15a)
Klei êmuh ksiêm mĭn: Tơdah ƀuh msat dơr Khua Yang êhŏng, si klei H’Mari Mađala ngă? Hlei pô êmuh ñu: “Si ngă ih hia lĕ? ” Ya jing phŭn knhal sĭt ngă kơ ñu hia? Tơdah thâo ƀuh Khua Yang kbiă lŏ hdĭp leh, si klei ñu ngă? Drei dôk hdĭp hŏng ai tiê klei mĭn Khua Yang ăt dôk djiê amâodah Khua Yang hdĭp leh?
H’Mari Mađala jing sa čô mniê ƀuh bơ̆k bâo lu hlăm hdruôm hră Klei Bi Mguôp Mrâo. Êjai phung ƀĭng kna sĭt suôr êbuh lĕ amâodah lui Khua Yang, H’Mari ăt kjăp ai tiê tui hlue Khua Yang (kdrêč 19), leh anăn “aguah ưm”, “êjai adiê adôk mmăt” ñu truh leh ti msat Khua Yang (êlan 1). Ƀiădah, tơdah ƀuh boh tâo arăng klŭng leh mơ̆ng msat, năng gơ̆ mĭn yơh Khua Yang kbiă lŏ hdĭp leh, ƀiădah lĕ ñu êran nao hưn kơ phung ƀĭng kna: “Arăng mă mđuĕ leh Khua Yang mơ̆ng msat” (êlan 2). Bi kngăr êdi, hlăm klei čih hưn kơ Khua Yang Yêsu kbiă lŏ hdĭp, boh blŭ gơ̆ “hia” lač truh kơ pă bliư̆ (êlan 11, êlan 13, êlan 15). Si ngă ñu hia hlăm hruê năng kơ klei bŏ dlai hŏng klei hơ̆k mơak? Si ngă Khua Yang bi êdah kơ ñu hŏng lu mta êlan ƀiădah ñu ăt dôk hia mơh? Kyuadah mơ̆ng mphŭn tơl truh kơ ƀuh Khua Yang, hlăm klei mĭn ñu ăt djă pioh nanao yơh klei ti anôk arăng “dưm Khua Yang kâo”, “mă mđuĕ Khua Yang kâo”. Ñu khăp kơ Khua Yang, ƀiădah Khua Yang ñu dôk duah jing Khua Yang djiê leh anăn dơr, Khua Yang arăng dưi “dưm” amâodah “mă mđuĕ” ti anôk anei anăn. Wăt tơl ƀuh leh Khua Yang dưn, ƀiădah klei tur hlăm klei mĭn anăn ngă kơ ñu “amâo thâo kral ôh gơ̆ jing Yêsu” (êlan 15), ñu ăt “mĭn dah”, “bi mĭn” Khua Yang pô dôk nanao hlăm msat yơh. Ñu đăo tui hluê sa čô Khua Yang bŏ hŏng klei khăp leh anăn săn asei, ƀiădah amâo mâo klei dưi ôh hŏng klei djiê, klei truh jhat.
Bi mni lač jăk kơ Khua Yang, gĭr leh hŏng gơ̆, čiăng kơ tơdah Khua Yang iêu anăn gơ̆ “Ơ H’Mari!” snăn gơ̆ thâo kral yơh. Mmông anăn mtam gơ̆ amâo lŏ hnĭng ênguôt hia ôh, ƀiădah jing pô hưn bi sĭt tal êlâo hĭn kơ Khua Yang Kbiă Lŏ Hdĭp (êlan 18). Êdei tinăn, mâo lu mnuih dưi bi tuôm hŏng Yang Krist Kbiă Lŏ Hdĭp mơh. Hƀuê ênuk Phung Sang Aê Diê brei drei ƀuh lu hlăm phung digơ̆ kăp tŭ djiê kơ klei hưn bi sĭt klei Khua Yang kbiă lŏ hdĭp leh, kyuadah ală digơ̆ ƀuh leh, knga digơ̆ hmư̆ leh.
Khua ƀĭng kna Y-Pôl mtô hlăm hră čih mơĭt I Kôrantô 15:14 snei: “Tơdah Krist amâo kbiă lŏ hdĭp ôh, klei hmei mtô jing hơăi mang, leh anăn klei diih đăo jing hơăi mang mơh.” Bi hdơr Klei Khua Yang kbiă Lŏ Hdĭp, brei ƀuh Khua Yang drei amâo djŏ ôh knŏng khăp kơ drei, kăp tŭ klei săn asei, klei djiê kyua drei. Klei Mrâo Mrang Jăk phung đăo kơ Krist amâo djŏ knŏng mjưh hĕ tăp anôk anăn ôh. Klei Mrâo Mrang Jăk anăn găn hgao mơ̆ng msat čiăng mâo klei dưi hĭn, Khua Yang Yêsu kbiă lŏ hdĭp leh. Pô drei kkuh mpŭ jing Pô Hdĭp amâo djŏ ôh jing Pô djiê.
Si ngă drei dôk kkuh mpŭ leh anăn myơr jih kơ Khua Yang hdĭp amâodah Khua Yang ăt dôk nanao hlăm msat? Si ngă klei hdĭp drei grăp hruê bŏ hŏng klei dăl khư̆, amâo mâo klei dưi, luč klei čang hmăng amâodah bŏ dlai klei hơ̆k mơak, klei čang hmăng mơ̆ng Khua Yang Kbiă Lŏ Hdĭp?
Ơ Khua Yang, klei hdĭp kâo ti lăn ala anei ăt kăn dưi tlaih mơ̆ng klei rŭng ênguôt knap mñai rei, ƀiădah akâo kơ Khua Yang đru kâo hdĭp hŏng ai tiê klei mĭn bŏ hŏng klei čang hmăng leh anăn klei dưi hĭn kyua Khua Yang Pô Bi Mtlaih kâo kkuh mpŭ jing Khua Yang hdĭp.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
