Klei Aê Diê Blŭ: II Klei Yăl Dliê 18:1-3
Êlan kliăng: “Đăm bi mđua knông hŏng phung amâo đăo ôh. Kyuadah ya klei bi mguôp dưi mâo klei kpă hŏng klei wê? Amâodah ya klei bi mguôp klei mngač dưi mâo hŏng klei mmăt?” (II Kôrantô 6:14)
Klei êmuh ksiêm mĭn: Mơ̆ng ya klei mtao Y‑Jôsaphat bi mguôp jing êpul kmha hŏng mtao Y‑Ahap jhat ƀai snăk? Klei čuăn ngă anei ba truh si boh klei jing kơ mtao Y‑Jôram? Klei hriăm anei hưn êlâo brei ih răng kơ ya klei dôk ung mô̆ hŏng phung amâo đăo kơ Aê Diê?
Mtao Y‑Jôsaphat kčưm dơ̆ng jing sa čô mtao jăk, huĭ mpŭ kơ Aê Diê, ƀiădah tơdah mâo leh klei dưi prŏng mâo klei đĭ kyar, mtao lĕ hlăm klei soh prŏng ngă klei bi mguôp êpul kmha hŏng mtao Y‑Ahap, sa čô mtao Israel jhat ƀai snăk sơưn wăt bi kdơ̆ng hŏng Aê Diê. Êlan 2-3 hưn mthâo, Y‑Jôram anak êkei mtao tŭ ư bi kuôl hŏng H’Athali, anak mniê mtao, jing anak H’Jêsabel kyua klei kñăm kơ bruă kđi čar, mtao Y‑Jôsaphat čiăng bi mguôp hŏng čar Israel čiăng dưi bi kdơ̆ng hŏng phung čar Siri jhŏng ktang. Ƀiădah Y‑Jôram anak êkei mtao amâo tuôm đing mĭn ôh mơ̆ng klei ñu bi kuôl anei yơh, ñu ba sa drei ala yuôm jhat ktang mŭt hlăm sang pô, ala jhat anei yơh bi ram rai klei hdĭp ñu (II Klei Yăl Dliê 21:5-7), leh anăn êdei kơnăn lăm giăm tuč jih djuê ana mtao Y‑Đawit (II Klei Yăl Dliê 22:10).
Wăt mtao Y‑Jôsaphat leh anăn Y‑Jôram anak êkei mtao mĭndah jing klei thâo mĭn yơh bi mguôp êpul kmha hŏng mtao Y‑Ahap, ƀiădah diñu amâo tuôm mĭn ôh diñu lĕ leh hlăm mnêč Satan čiăng yua H’Athali bi rai ƀuôn ala mtao Yuđa, bi mdjiê jih jang phung anak čô mtao Y‑Jôram, wăt bi rai hdră klei bi mtlaih mơ̆ng Aê Diê hŏng klei brei Yang Krist trŭn hriê jing mnuih mơ̆ng găp djuê Y‑Đawit (II Bruă Mtao 8:19; Klei Mmuñ Hđăp 132:17). Ƀiădah hŏng klei ktang myang Aê Diê kiă kriê, Sa-tan amâo dưi bi leh ôh mnêč hdră ñu (II Klei Yăl Dliê 22:10-12).
Đăm wơr bĭt ôh bruă Satan kñăm jing kăp bi rai Ƀuôn Ala Mtao Aê Diê. Msĕ si H’Athali čiăng bi mdjiê jih jang anak čô Y‑Đawit, tinei Satan čiăng bi mdjiê klei hdĭp mngăt phung anak Aê Diê, leh anăn sa hlăm lu mta hdră êlan jing klei bi dôk ung mô̆. Kyuanăn yơh Aê Diê kăm ghă ktang tĭt amâo brei phung ƀuôn sang Ñu bi dôk hŏng phung mniê tue ôh hlăk diñu mŭt hlăm Lăn Aê Diê Ƀuăn.
Klei bi dôk ung mô̆ hŏng phung amâo đăo plah mă leh lu lĭn mnuih hlăm Phung Sang Aê Diê kyuadah lu phung hlăk ai êkei mniê lui klei đăo tơdah leh dôk ung mô̆ hŏng phung amâo đăo. Hruê anei brei drei bi mâo hĕ ai tiê klei mĭn msĕ si Y‑Êsra leh anăn Y‑Nêhêmi, ênguôt hnĭng, kơŭ kơyăm, rŭng răng, leh anăn bi kmhal phung ƀuôn sang tơdah diñu bi kuôl hŏng phung amâo mâo đăo (Y‑Nêhêmi 13:23-29). Brei thâo ruă ênguôt, čŏk hia, kmhal kơ klei soh kyuadah klei bi dôk ung mô̆ hŏng phung amâo đăo dôk lar hlăm găp djuê phung đăo kơ Krist leh anăn hlăm Phung Sang Aê Diê. Mbĭt djiêô anăn, brei amĭ ama mđing uêñ mrô sa kơ klei phung anak dôk ung mô̆ jing klei wah lač leh anăn mtô lač diñu dơ̆ng mơ̆ng êjai diñu adôk hđeh hlăk krah kơ klei hdĭp ung mô̆ bi mơak kơ Khua Yang. Phung Sang Aê Diê brei mâo bruă klam anei êjai mtô bi hriăm hlăm Sang Aê Diê, boh nik nak kơ êpul hlăk ai hlăk krah.
Si ngă drei uêñ mĭn wah lač, mtô lač phung anak drei kơ klei hdĭp ung mô̆ jăk mơak hlăm Khua Yang mơ̆?
Wah lač: Ơ Khua Yang, akâo kơ Ih brei kâo mâo klei pap thâo mtô lač phung anak aneh kơ klei dôk ung mô̆ čiăng kơ Phung Sang Aê Diê dưi mâo gưl čuê dưn klei sĭt suôr kkuh mpŭ leh anăn huĭ mpŭ kơ Aê Diê.
Dlăng Klei Aê Diê Blŭ hlăm tlâo thŭn: Y‑Luk 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
