Klei Aê Diê Blŭ: I Y-Pêtrôs 3:3-6
Êlan kliăng: “Đăm diih duah mprăp bi siam ti êngao hŏng klei ƀôñ ƀŭk, mprăp hŏng mah, leh anăn hŏng čhiăm ao diih hơô, ƀiădah mprăp bĕ ti lam hgăm hlăm ai tiê hŏng mnơ̆ng amâo thâo rai tuč ôh, jing knuih êdu leh anăn êđăp ênang. Klei anăn jing yuôm snăk ti anăp Aê Diê.” (I Y-Pêtrôs 3:3-4)
Klei êmuh ksiêm mĭn: Ya klei khua ƀĭng kna Y-Pêtrôs lŏ mtă thiăm kơ phung mô̆ đăo kơ Krist? Jing sa čô mô̆, drei thâo kral ya jing klei tal êlâo hĭn leh anăn si diih dôk ngă tui si klei mtă anei?
Phung mniê jing tĭng phung siam snăn bruă digơ̆ bi msiam, čŭt hơô hlue si ênuk yan yap jing klei bhiăn ngă yơh. Khua ƀĭng kna Y-Pêtrôs ăt kăn kăm ghă mơh klei anei, ƀiădah ñu dôk bi msĕ kdrăp siam ti êngao hŏng klei siam hlăm lam kơ klei hdĭp myang leh anăn knuih jăk. Ñu amâo kăm ghă ôh phung mniê đăo kơ Krist bi msiam pô, ƀiădah ñu mtă mtăn đăm duah mprăp hơô đei čhiăm ao tơl êgao hnơ̆ng (êlan 3b), boh blŭ “hơô” čiăng lač “păn din bŏ asei mlei”.
Phung đăo kơ Krist brei thâo bi myuôm leh anăn kiă kriê asei mlei Khua Yang hrih mjing, čiăng thâo răng kriê bi mjuăt klei suaih asei mlei kơ pô. Wăt hlăm klei čŭt hơô djŏ knuih, bi guôp hŏng anôk kdrăn bruă nao ăt jing bi êdah klei thâo mpŭ kơ arăng mơh. Tơdah sa čô mniê thâo huĭ mpŭ kơ Aê Diê leh anăn thâo mpŭ kơ klei kkuh mpŭ kơ Aê Diê, sĭt nik ñu jing pô thâo răng leh anăn thâo ruah jăk čhiăm ao čŭt hơô pioh nao kơ anôk kkuh mpŭ.
Ƀiădah lĕ, hlue si klei mĭn khua ƀĭng kna Y-Pêtrôs, kdrăp ti êngao jing yuôm ƀiădah mnuih hlăm lam jing yuôm kdlưn lu hĭn mơh. Tơdah pioh leh mmông mprăp kơ čhiăm ao čŭt hơô bi djŏ guôp čiăng nao kkuh mpŭ kơ Aê Diê, snăn brei drei pioh lu mmông hĭn mơh mprăp ai tiê klei mĭn čiăng nao ti anăp Khua Yang. “Duah mprăp bi siam ti êngao” (êlan 3a) jing klei pioh lu đei mmông leh anăn prăk kăk kơ bruă anăn, leh anăn tơdah drei yap klei yuôm drei pô leh anăn arăng mkăn hŏng čhiăm ao klei čŭt hơô bi msiam ti êngao. Y-Yakơ mtô snei klei dlăng yap leh anăn klei ngă hŏng mnuih mkăn hlue si klei mdrŏng sah ƀuh ti êngao jing klei ngă soh hŏng Khua Yang (Y-Yakơ 2:1-4).
Snăn, sa čô mniê đăo kơ Krist brei uêñ mĭn kơ knuih êdu êun leh anăn kriêp ñăt (êlan 4b). Mtao Sa-lô-môn ăt bi mđĭ mơh knuih anei mơ̆ng phung mô̆ tơdah ñu mtô: “Jăk hĭn dôk hlăm anôk êhiŏ êyăng kơ dôk mbĭt hŏng sa čô mô̆ kreh bi mneh msao leh anăn ră ăl” (Klei Bi Hriêng 21:19). Klei êdu êun leh anăn kriêp ñăt anei yơh jing klei bi êdah ti êngao kơ klei đup gưt kơ ung, mtô leh hlăm êlan 1-2. Si ngă sa čô mô̆ đăo kơ Krist dưi mâo knuih yuôm bhăn anei? “Kyuadah phŭn dô phung mniê doh jăk čang hmăng kơ Aê Diê, mprăp diñu pô msĕ snăn leh anăn đup gưt kơ ung diñu” (êlan 5). Tơdah amâo mâo ôh klei čang hmăng kơ Aê Diê leh anăn gưt kơ Klei Ñu mtô kăp đup gưt kơ ung, snăn phung mniê dleh yơh dưi hdĭp msĕ snăn, boh nik hŏng phung mô̆ thâo duah prăk lu hĭn, mâo anôk bruă hlăm ƀuôn sang dlông hĭn, leh anăn mâo knuih kjăp ktang hĭn kơ ung diñu.
Si ngă drei dôk dlăng yuôm klei ƀuh ti êngao amâodah knuih jing hlăm lam lu hĭn?
Wah lač: Ơ Khua Yang, akâo kơ Khua Yang brei klei pap kơ phung mô̆ đăo kơ Krist đăm dlăng yuôm đei klei mprăp ti êngao ôh, ƀiădah brei thâo uêñ mĭn mprăp knuih jăk hlăm lam mbĭt hŏng jih jang knuih jăk siam čiăng dưi jing phung hưn bi sĭt kơ Khua Yang.
Dlăng Klei Aê Diê Blŭ hlăm tlâo thŭn: Y-Mathiơ 8:28-9:34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
