I Petus 3:3-6
Nqe cim:
“Nej tsis txhob xav hais tias nej yuav tsum ntxias plaubhau zoo zoo lossis coj nyiaj coj kub lossis hnav tej tsoos zoo zoo nej thiaj yuav zoo nkauj. Tsis yog li ntawd, qhov uas nej zoo nkauj yog qhov uas nej muaj lub siab dawb siab zoo thiab paub cai, thiaj yog qhov uas Vajtswv pom hais tias muaj nqis” (I Petus 3:3-4).
Lus nug rau sawvdaws xav:
– Timthawj Petus muab txojcai twg hais ntxiv rau tus pojniam ntseeg Yexus?
– Yog ib tug pojniam, peb paub hais tias dabtsi thiaj yog yam tseemceeb hauv lub neej thiab nej tabtom ua raws li txojcai no licas?
Pojniam yog cov uas zoo nkauj yog li ntawd qhov uas lawv tu cev zoo, coj nyiaj kub, tseev zam ces tau ntaus nqi hais tias yog cai. Timthawj Petus kuj tsis txwv qhov no, tiamsis nws tabtom muab kev zoo nkauj ntawm lub cev sab nraud los sib piv rau kev zoo nkauj ntawm tus ntsujplig thiab tus cwjpwm sab hauv. Nws tsis txwv pojniam tu cev kom zoo nkauj, tiamsis tsis txhob ua dhau cai. Nws ntuas kom txhob “hnav tej tsoos zoo zoo” (nqe 3b), lo lus “hnav” hais ntawm no yog hais txog qhov uas “muab kauv puv nkaus rau lub cev”.
Tus ntseeg Yexus yuav tsum saib taus thiab saibxyuas lub cev uas tus Tswv tsim, kom paub tu cev thiab txhim kho tus kheej. Txawm yog qhov uas hnav zoo xws sijhawm, xws teb xws chaw xwb, los twb yog ua qhia tshwm kev saib taus lwm tus lawm. Yog tus pojniam uas hwm Vajtswv thiab saib taus kev pehawm, ces nws yuav xyuamxim hnav tej tsoos tsho thaum tuaj hauv Tsev Pehawm.
Txawm li ntawd los, raws li Timthawj Petus kev xav, lub cev sab nraud kuj tseemceeb tiamsis tseemceeb tsis cuag tus neeg sab hauv. Yog twb siv sijhawm npaj tsoos tsho hnav mus pehawm tus Tswv lawm, ces peb haj yam yuav tsum siv ntau sijhawm los npaj lub siab thiab kev xav thaum ntsib tus Tswv. Qhov uas “tu lub cev sab nraud xwb” (nqe 3a PTT) yog thaum peb siv ntau sijhawm thiab nyiaj txiag los ua tes haujlwm ntawd, thiab yog thaum peb ntaus nqi rau tus kheej thiab lwm tus los ntawm kev hnav tsoos, tu cev zoo thiab coj nyiaj kub. Yakaunpaus qhia hais tias yog ntaus nqi thiab xaiv lwm tus ntsej muag los ntawm kev npluanuj sab nraud ces yog ua txhaum rau tus Tswv (Yakaunpaus 2:1-4).
Yog li ntawd, cov niam tsev uas ntseeg Yexus yuav tsum saib hlob qhov uas muaj lub siab dawb siab zoo thiab paub cai (nqe 4b). Vajntxwv Xalumoos kuj saib hlob cov pojniam tus yamntxwv no thaum nws qhia hais tias: “Mus nyob tom tiaj suabpuam zoo dua li nrog tus pojniam uas tsawm taus thiab yws taus nyob ua ib tse” (Pajlug 21:19). Lub siab dawb siab zoo thiab paub cai yog kev ua qhia tshwm sab nraud txog kev hwm tus txiv uas hais txog hauv nqe 1-2. Yuav ua cas tus pojniam ntseeg Yexus thiaj muaj tus yamntxwv zoo no? Vajluskub qhia hais tias: “Cov pojniam txheej thaum ub uas mloog Vajtswv lus thiab muab siab rau ntseeg, lawv muaj lub siab zoo li ntawd thiab lawv mloog lawv tej txiv lus” (nqe 5). Yog tsis muab siab rau ntseeg thiab mloog Vajtswv lus los hwm tus txiv, ces lawv yuav ua tsis tau lub neej zoo li ntawd, tshwjxeeb yog cov pojniam uas nrhiav tau ntau nyiaj heev dua tus txiv, muaj meejmom siab, thiab coj tus cwjpwm heev dua tus txiv.
Thov Vajtswv,
Tus Tswv, taij thov Koj pub koob hmoov rau cov pojniam ntseeg Yexus uas tsis npaj ua zoo nkauj sab nraud tiamsis npaj ua zoo nkauj sab hauv thiab coj tus cwjpwm zoo, kom lawv ua tau timkhawv zoo rau Koj. Amees.
Peb tabtom saib hlob tus neeg sab hauv lossis tus neeg sab nraud?
Nyeem Vajluskub hauv peb lub xyoos: Mathais 8:28-9:34
Kênh Youtube BHKTHN:
