Klei Aê Diê Blŭ: Klei Mmuñ Hđăp 9:15-20
Êlan kliăng: “Yêhôwa bi êdah ñu pô leh, ñu phat kđi leh; phung ƀai djŏ ñuăl diñu pô ngă” (Klei Mmuñ Hđăp 9:16)
Klei êmuh ksiêm mĭn: Si boh klei phung ƀuôn sang dôk găn? Ya ngă phung ƀai leh anăn phung ƀuôn sang wơr bĭt Aê Diê nao hlăm Ƀuôn Phung Djiê? Si klei mtô drei brei hdĭp ti anăp Pô phat kđi kpă ênô?
Klei Mmuñ Hđăp 9:15-17 lač kơ boh klei phung ƀuôn sang hdĭp soh hŏng klei kñăm jăk siam Aê Diê kčah leh. Diñu mâo klei mĭn ngă jhat kơ pô mkăn ƀiădah Aê Diê kpă ênô ngă kơ diñu lĕ hlăm ƀăng êlam diñu klei leh, wiă boh jhat diñu buh leh, leh anăn Ñu răng mgang phung arăng ktư̆ juă. Phung ƀai jing phung ngă soh kơ knhuah hdĭp: amâo huĭ mpŭ kơ amĭ ama, mdjiê mnuih, ngă knhông, tlĕ dăp, hưn klei luar, ră, ngă jhat kơ pô mkăn leh anăn plah mă ngăn drăp pô mkăn. Hlăk êjai anăn, dŭm djuê ana wơr Aê Diê, amâo yap ôh Ñu jing Pô Hrih Mjing mâo klei dưi kiă kriê diñu kyua anăn bi kdơ̆ng hŏng Aê Diê, ngă mgao, amâo kkuh mpŭ kơ Aê Diê, krah rup leh anăn kkuh kơ rup yang. Diñu dlăng kơ Anăn Yêhôwa hơăi mang, amâo mkŏ mjing ôh klei bi mguôp sĭt suôr hŏng Aê Diê leh anăn amâo ngă ôh klei Aê Diê mtă jao kơ anak mnuih.
Djŏ mơ̆ Aê Diê ngă ktang đei tơdah brei phung ƀai leh anăn phung djuê ana wơr Aê Diê “kdŭn đuĕ nao kơ Ƀuôn Phung Djiê” (êlan 17)? Klei Aê Diê phat kđi jing kpă ênô nanao; amâo mâo ôh sa čô mnuih amâo huĭ mpŭ kơ Aê Diê ƀiădah dưi hdĭp kpă ênô, thâo djŏ hŏng pô mkăn. Mơ̆ng leh anak mnuih lĕ hlăm klei soh, grăp čô mnuih jing soh leh sơăi. Klei jing klei soh ngă kơ anak mnuih ƀrư̆ hruê ƀrư̆ măk ƀai hĭn. Grăp čô mnuih năng dôk ti war pui. Ƀiădah kyua klei pap, Aê Diê brei leh kơ anak mnuih klei pap bi tui mơ̆ng klei Khua Yang Yêsu klam brei klei soh. Hlei pô đăo kơ Khua Yang Yêsu dưi bi grăng hŏng Aê Diê, mă klei myang bi mlih mơ̆ng Yang Mngăt Jăk čiăng hdĭp djŏ hlăm klei bi mguôp hŏng Aê Diê leh anăn mnuih.
Mtao Đawit mñă kơ phung găp djuê ngă soh leh jing “knŏng mnuih” (êlan 20), klei hdĭp mâo wưng kčah, kkiêng leh anăn hdĭp ti lăn ala sa wưng bhiâo leh anăn djiê leh anăn tŭ klei Aê Diê phat kđi. Anak mnuih amâo dưi kiă kriê ôh klei êdei anăp leh anăn klei hdĭp pô kyua anăn amâo mâo klei êđăp ênang ôh. Diñu čiăng kiă kriê ngăn drăp leh anăn klei dưi čiăng mjing anôk knang, ƀiădah jih jang klei anăn jing hơăi mang. Anak mnuih jing dŏ Aê Diê leh anăn amâo dưi ôh hŏng Aê Diê pô myang hĭn. Kyua anăn, đăm đăo knang ôh hlăm mnêč pô ngă jhat kơ pô mkăn, diñu pô srăng lĕ hlăm ƀăng êlam diñu klei leh. Drei đăo kơ Aê Diê, mâo Aê Diê yap jing kpă ênô, brei đăo kjăp hlăm Pô kpă ênô mgang nanao drei ti anăp mnêč phung ƀai, leh anăn dôk êđăp ênang kpă ênô leh anăn thâo khăp truh knhal tuč.
Si knuih hdĭp drei bi êdah klei đăo knang hlăm klei phat kđi kpă ênô mơ̆ng Aê Diê?
Wah lač: Ơ Khua Yang kpă ênô leh anăn klei khăp jing Ama kâo! Kâo thâo kâo jing sa čô mnuih soh mâo Aê Diê pap brei leh anăn răng mgang mơ̆ng klei arăng ngă jhat. Akâo kơ Ama bi hriăm kâo knuih huĭ mpŭ, thâo hdơr knga kơ Aê Diê, knang kơ Ih, hriăm hdĭp kpă ênô leh anăn thâo khăp msĕ si Ama kâo hlăm adiê. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
