Klei Aê Diê Blŭ: II Bruă Mtao 8:9‑13
Êlan kliăng: “Y‑Êlisê dôk dlăng kơ ñu tơl ñu hêñ, leh anăn mnuih Aê Diê hia. Y‑Hasael lač, “Si ngă khua kâo hia lĕ?” (II Bruă Mtao 8:11).
Klei êmuh ksiêm mĭn: Ya klei Y‑Hasael nao duah khua pô hưn êlâo Y‑Êlisê? Si ngă khua pô hưn êlâo hia êjai dôk ti anăp Y‑Hasael? Bruă khua pô hưn êlâo Y‑Êlisê ngă, brei drei ƀuh si knuih jing sa čô mnuih mă bruă kơ Aê Diê?
Y‑Hasael ngă tui si klei mtao Y‑Ben-Hadat mtă, nao duah khua pô hưn êlâo Y‑Êlisê čiăng êmuh kơ klei ruă mtao. Klei khua pô hưn êlâo Y‑Êlisê wĭt lač mâo dua kdrêč. Kdrêč tal êlâo wĭt lač kơ mtao Y‑Ben-Hadat, mtao amâo srăng djiê kyua klei ruă ôh. Kdrêč tal dua jing klei blŭ hŏng Y‑Hasael, mtao Y‑Ben-Hadat srăng djiê kyua klei mkăn. Tui tluôn dua klei khua pô hưn êlâo blŭ. Y‑Hasael srăng jing sa čô mtao Siri jhat ƀai, leh anăn ñu srăng ba klei bi rai, klei bi mdjiê kơ phung ƀuôn sang Israel (êlan 12).
Hlăm I Bruă Mtao 19:15-17 Aê Diê jao kơ khua pô hưn êlâo Y‑Êli tlâo mta bruă, ƀiădah khua pô hưn êlâo Y‑Êli knŏng mrâo bi leh bruă trôč êa ƀâo mngưi kơ Y‑Êlisê, kyuanăn khua pô hưn êlâo Y‑Êlisê srăng hrô kơ nai ñu bi leh bruă trôč êa ƀâo mngưi kơ Y‑Hasael leh anăn kơ Y‑Yêhu. Ƀiădah, khua pô hưn Y‑Êlisê ruă ai tiê êdimima kyuadah ñu thâo ñu dôk trôč êa ƀâo mngưi kơ Y‑Hasael jing sa čô jhat ƀai srăng bi rai lăn čar leh anăn phung ƀuôn sang Aê Diê, ƀiădah ñu ăt gưt asăp Aê Diê mơh. Bruă ngă anei brei ƀuh khua pô hưn êlâo Y‑Êlisê thâo săng klă ñu amâo jing phŭn kơ ñu pô leh anăn kơ bruă ñu dôk djă ôh kyuanăn ñu ăt ngă bi leh bruă jao kơ ñu wăt tơdah si ai tiê ñu jing. Hlei pô jing phŭn kơ klei hdĭp leh anăn kơ bruă drei djă? Si ngă Khua Yang jing Khua drei sĭt mơ̆? Brei drei ksiêm drei pô sĭt kpă: jing mnuih mă bruă kơ Aê Diê, si ngă drei dưm klei mơak klei ênguôt amâodah klei tŭ dưn kơ drei pô ti dlông klei guh kơang Aê Diê mơ̆?
Tinei, khua pô hưn êlâo Y‑Êlisê amâo dưm klei tŭ dưn kơ phung ƀuôn sang Aê Diê jing ti dlông hĭn ôh. Dôk mĭn lăng ya klei srăng truh tơdah phung ƀuôn sang Israel thâo khua pô hưn êlâo Y‑Êlisê yơh jing pô trôč êa ƀâo mngưi kơ Y‑Hasael jing mtao Siri? Năng ai diñu srăng lač kơ ñu jing pô lhiăr kơ lăn čar. Khua pô hưn êlâo ênguôt ruă ai tiê leh anăn hia kyua ƀuh êlâo klei truh huĭ mduĭ kơ phung sang Aê Diê srăng tlă anăp, ƀiădah anei jing klei Aê Diê mtă, jing Khua, jing Pô ñu dôk mă bruă, leh anăn wăt tơdah bi ruă knap phung ƀuôn sang Aê Diê, ñu ăt gưt asăp Aê Diê mơh. Jing sa čô mă bruă kơ Aê Diê, si ngă drei dưm klei guh kơang Aê Diê ti dlông hĭn kơ jih jang klei tŭ dưn mkăn mơ̆? Lu mnuih mkuôm mkăm klei soh hlăm Phung Sang Aê Diê leh anăn blŭ mgang kyua čiăng mâo klei êđăp ênang hlăm Phung Sang Aê Diê, ƀiădah brei hdơr klei êđăp ênang hlăm Phung Sang Aê Diê amâo dưi prŏng hĭn kơ klei Aê Diê mtă ôh, amâo dưi ti dlông hĭn kơ klei guh kơang Aê Diê ôh. Klei drei tui duah hlăm jih jang klei jing gưt ngă tui si klei Aê Diê čiăng leh anăn kyua klei guh kơang Ñu, hlăk anăn klei êđăp ênang, klei bi mguôp sa ai hlăm Phung Sang Aê Diê srăng mâo boh tui tluôn.
Drei ngă jih jang bruă kyua klei guh kơang kơ Aê Diê mơ̆?
Wah lač: Ơ Khua Yang, brei kâo dưm klei guh kơang leh anăn klei Ih čiăng êlâo hĭn hlăm klei hdĭp kâo. Brei kâo gưt ngă klei Khua Yang čiăng kluôm dhuôm wăt tơdah ya mta klei truh dưn mơh.
Dlăng Klei Aê Diê Blŭ hlăm tlâo thŭn: Y‑Êsai 33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
