II Vajntxwv 8:9-13
Nqe cim:
“Elisas ntsejmuag ntshaus ntsho saib ntsoov Haxayees ua rau Haxayees ntsejmuag liab tag. Tamsim ntawd, Elisas txawm quaj ua kua muag poob dawb vog” (II Vajntxwv 8:11).
Lus nug rau sawvdaws xav:
- Haxayees tuaj cuag tus cevlus Elisas ua dabtsi?
- Vim licas tus cevlus Elisas thiaj quaj thaum ntsib Haxayees?
- Qhov uas tus cevlus Elisas quaj, ua rau peb pom dabtsi txog yam zoo ntawm tus neeg ua tus Tswv tes haujlwm?
Haxayees ua raws li vajntxwv Npeehadas tej lus tuaj cuag tus cevlus Elisas nug txog vajntxwv tus mob. Tus cevlus Elisas lo lus teb muaj ob feem. Ib feem yog lo lus teb rau vajntxwv hais tias vajntxwv yuav tsis raug mob tuag. Lwm feem yog lo lus teb rau Haxayees hais tias vajntxwv Npeehadas yuav tuag vim lwm yam. Txuas ntxiv yog ob lo lus cev tseg hais tias Haxayees yuav sawv los ua cov Xilias tus vajntxwv thiab nws yuav ua phem heev rau haivneeg Yixalayees (nqe 12).
Nyob hauv I Vajntxwv 19:15-17, Vajtswv txib tus cevlus Eliyas ua peb txoj haujlwm, tiamsis Eliyas tsuas ua tiav tes haujlwm hliv roj xaiv Elisas ua tus cevlus xwb, yog li ntawd tus cevlus Elisas yuav tsum hloov nws tus xibhwb chaw ywg roj rau Haxayees thiab Yehus. Tus cevlus Elisas nyuaj siab thiab quaj, vim nws tabtom ywg roj rau Haxayees tus uas yuav ua phem rau Vajtswv haivneeg thiab lub tebchaws, txawm li ntawd los nws yuav tsum mloog Vajtswv lus. Tes haujlwm no qhia pom hais tias tus cevlus Elisas zeem paub meej nws tus kheej thiab nws tes haujlwm, nws thiaj tsis ua haujlwm raws tus kheej siab xav. Leejtwg yog tus tseemceeb nyob hauv peb lubneej thiab peb tes haujlwm? Tus Tswv tseeb yog peb tus Tswv lawm tau? Peb yuav tsum rov soj tus kheej: Peb yog ib tug ua tus Tswv haujlwm, peb puas saib tus kheej thiab txhua yam peb muaj tseemceeb dua qhov uas ua rau Vajtswv tau koobmeej?
Nyob hauv no, Tus cevlus Elisas tsis saib qhov uas zoo rau tus Tswv haivneeg yog qhov tseemceeb tshajplaws. Peb sim xav, yog thaum cov Yixalayees paub hais tias Tus cevlus Elisas ywg roj rau Haxayees ua vajntxwv kav tebchaws Xilias, lawv yuav xav licas? Tej zaum lawv yuav hais tias nws yog tus ntxeev siab rau tebchaws. Tus cevlus Elisas nyuaj siab thiab quaj, vim pom txog tej kev phem txaus ntshai uas tus Tswv haivneeg yuav ntsib, tiamsis ntawd yog Vajtswv tej lus samhwm, thiab txawm yuav ua rau tus Tswv haivneeg ntxhov siab, los nws yuav tsum mloog Vajtswv lus. Yog ib tug ua tus Tswv tes haujlwm, peb puas saib qhov uas ua rau Vajtswv tau ntsejmuag tseemceeb dua txhua yam? Muaj ntau tug zais tej kev txhaum hauv Pawg Ntseeg thiab cav hais tias vim xav kom Pawg Ntseeg tsis muaj kev kub ntxhov, tiamsis qhov uas Pawg Ntseeg sib haum tsis tseemceeb npaum Vajtswv tej lus samhwm thiab tsis tseemceeb npaum Vajtswv lub koobmeej. Yam peb yuav tsum ntshaw, yog ua txhua yam raws li Vajtswv lub siab nyiam thiab ua kom Nws tau koobmeej, tomqab ntawd Vajtswv mam ua rau Pawg Ntseeg muaj kev tau zoo, sib haum xeeb, sib koom tes.
Thov Vajtswv
Tus Tswv, thov pab nyuam yaus paub saib qhov uas ua raws Koj siabnyiam thiab ua rau Koj tau koobmeej ua yam tseemceeb. Thov pab nyuam yaus ua raws Koj lub siabnyiam txhua sijhawm txawm yuav muaj dabtsi tshwmsim tuaj. Amees.
Peb puas ua txhua yam rau Vajtswv tau koobmeej lawm tau?
Nyeem Vajluskub hauv peb lub xyoos: Yaxayas 33
Kênh Youtube BHKTHN:
