Khiavdim 30:22-33
Nqe cim:
“Yog leejtwg txhob txwm ua dua ib co roj kom zoo li cov no lossis muab cov roj no mus hliv rau tus neeg uas tsis yog povthawj, tus ntawd yuav raug rho tawm hauv kuv haivneeg Yixalayees mus” (nqe 33).
Lus nug rau sawvdaws xav:
– Ua cov roj dawbhuv raws li tus qauv twg?
– Cov roj ntawd yuav siv licas thiab muaj qabhau dabtsi?
– Tus Tswv xav tau yam dabtsi ntawm Nws haivneeg thaum Nws rau txim rau cov neeg uas ua dua ib cov roj txawv thiab siv cov roj tshwjxeeb tsis raws cai?
– Koj kawm tau dabtsi dhau zaj kawm hnub no?
Cov roj dawbhuv yog muab tej khoom tsw qab uas zoo tshaj plaws los ua, muab sib xyaws ua ke li no: kaum ob choj hmoov tshuaj tsw qab mules, rau choj nroj tsw qab, rau choj kabtsib tauj tsw qab, thiab kaum ob choj ntoo kubtwm. Hliv ib taub roj txiv ntoo ntxiv rau kom ua tau ib co roj tshwjxeeb hu ua “roj txhawb meejthawj”. Tus Tswv qhia kom yuav tsum siv cov roj no “pleev lub Tsevntaub uas yog kuv qhov chaw sib ntsib thiab lub Phijxab uas ntim Vajtswv tej lus cog tseg”, nrog rau lub rooj thiab tej cuabyeej uas siv rau lub rooj, lub teeb thiab tej cuabyeej uas siv rau lub teeb, lub thaj hlawv hmoov tshuaj tsw qab, lub thaj uas hlawv tej khoom fij thiab tej cuabyeej uas siv rau lub thaj ntawd, thiab lub phiab tooj uas ntxuav tes taw thiab lub taw phiab. Aloos thiab nws cov tub kuj yuav tsum muab cov roj no txhawb meejthawj rau, thiab muab lawv tsa ua cov povthawj ua tus Tswv tes haujlwm.
Tus Tswv Txojlus qhia paub qhov muaj nqis ntawm cov roj dawbhuv no yog pleev kom tej khoom dawbhuv thiab txhawb meejthawj rau neeg. Txawm yog cov neeg Yixalayees hu ua haivneeg dawbhuv, haivneeg uas muab tshwj tseg tshwjxeeb rau tus Tswv tiamsis tsuas yog cov povthawj thiaj tau muab cov roj txhawb meejthawj siv ua haujlwm tabmeeg Nws xwb. Rau qhov cov roj no yog yam roj tshwjxeeb siv rau tej haujlwm dawbhuv, yog muab lwm yam los ua cov roj no lossis siv cov roj tshwjxeeb no tsis raws cai yuav raug ntiab tawm hauv cov neeg Yixalayees mus. Tus Tswv muaj kev npaj thiab homphiaj thaum Nws kom Nws haivneeg ua ib yam dabtsi twg thiab tus Tswv xav kom lawv mloog Nws lus. Adas thiab Evas ua xyem xyav rau tus Tswv txojkev zoo, nkawd thiaj poob qhov uas tsis mloog tus Tswv lus thaum nkawd noj tsob txiv txwv hauv lub Vaj Edees, yog li nkawd thiaj raug ntiab tawm hauv lub vaj mus, nkawd raug txomnyem, raug kev ploj kev tuag thiab tej cajces tom qab no puavleej raug kev ploj tuag ib yam nkaus. Cov roj dawbhuv tsuas siv fij rau tus Tswv nkaus xwb yog ib zaj kawm, yog ib yam sim tus Tswv haivneeg.
Yog tus ntseeg Yexus, peb tau tus Tswv pub lub meejmom ua povthawj rau Vajtswv (I.Petus 2:9), tus Tswv ua kom peb dawbhuv los ntawm tus Cawmseej Yexus cov ntshav tsimtxiaj, peb tau txhawb meejthawj los ntawm Vaj Ntsujplig tus uas nyob hauv peb lub siab. Peb tau txoj koob hmoov mus cuag tau Vajtswv Vaj Peb Leeg hauv lub meejmom ua povthawj. Tus Tswv kuj xav kom peb tsis txhob cia tej kev dag ntxias ua rau peb coj tsis tau raws li tus Tswv txoj kevcai, thiab tsis txhob muab Vajtswv Txojlus qhov tseeb hloov kom yoojyim.
Koj puas txaus siab hlo ua raws li tus Tswv Txojlus qhia hauv phau Vajluskub thiab?
Thov Vajtswv,
Tswv Yexus, ua Koj tsaug uas Koj cov ntshav ntxuav kom nyuam yaus dawbhuv! Nyuam yaus zeem paub txhua txoj kevcai uas Koj muab yog ua kom nyuam yaus muaj kev kaj siab. Thov Koj pub rau nyuam yaus nquag kawm Koj Txojlus thiab mloog Koj lus, nyuam yaus thiaj tau lub neej kaj siab. Amees.
Nyeem Vajluskub hauv peb lub xyoo: Phau Ntawv Nkauj 99:1-100:5
Kênh Youtube BHKTHN:
