Klei Aê Diê Blŭ: I Y-Pêtrôs 5:12
Êlan kliăng: “Hŏng Y-Silas, pô kâo yap jing sa čô adei sĭt suôr, kâo brei čih leh dua tlâo boh anei kơ diih” (I Y-Pêtrôs 5:12a).
Klei êmuh ksiêm mĭn: Hlei Y-Silas jing? Ya knuih ñu mâo kdlưn hĭn? Hŏng si klei mĭn ñu dôk mă bruă kơ Khua Yang?
Hlăm klei kkuh čhưn ti knhal tuč hră mơĭt, Khua ƀĭng kna Y-Pêtrôs bâo kơ anăn Y-Silvan, pô ñu hưn jing “sa čô adei sĭt suôr.” Y-Silvan jing anăn iêô mkăn kơ Y-Silas, pô mâo klei dưi jing mnuih ƀuôn sang Rôm (Bruă Phung Khua Ƀĭng Kna 16:37), jing sa čô hlăm phung arăng ruah brei djă ba hră mơĭt mơ̆ng klei Phung Sang Aê Diê bi kƀĭn prŏng ti ƀuôn Yêrusalem kơ Sang Aê Diê ƀuôn Antiôs (Bruă Phung Khua Ƀĭng Kna 15:22). Gơ̆ jing pô tuôm nao leh mbĭt hŏng Y-Pôl hlăm klei hiu hưn Klei Mrâo Mrang Jăk gưl tal dua (Bruă Phung Khua Ƀĭng Kna 15:40-41); pô Khua ƀĭng kna Y-Pôl hưn bi êdah hlăm klei kkuh čhưn hlăm dua pŏk hră mơĭt kơ phung đăo ti ƀuôn Têsalônik (I Têsalônik 1:1; II Têsalônik 1:1); leh anăn gơ̆ jing pô tuôm mă leh bruă kơ Khua Yang mbĭt hŏng Y-Timôthê ti ƀuôn Kôrantô (II Kôrantô 1:19). Jih jang Klei Aê Diê Blŭ čih leh brei ƀuh Y-Silvan, jing Y-Silas, jing sa čô hlăm lu phung jing gơ̆ng kmeh hlăm Phung Sang Aê Diê ênuk tal êlâo. Leh anăn, anăn Y-Silas čih ti knhal tuč hră mơĭt anei hŏng bruă jing sa čô pô đru čih jih jang klei Khua ƀĭng kna Y-Pêtrôs răk hlăm hră mơĭt kơ phung đăo dôk tar ƀar anôk hlăm čar Asi ênuk Mtao Nêrôn ngă jhat kơ Phung Sang Aê Diê.
Drei ƀuh Y-Silas mâo dŭm knuih jăk kdlưn hĭn snei: Tal sa, gơ̆ jing sa čô mnuih sĭt suôr. Khua ƀĭng kna Y-Pêtrôs amâo hưn kơ gơ̆ jing mnuih hriăm lu, mâo bruă mă amâodah jing sa čô mnuih thâo ôh, ƀiădah ñu hưn bi êdah kơ gơ̆ jing: “pô kâo yap jing sa čô adei sĭt suôr” (êlan 12). Anei jing sa hlăm dua păn knuih mơ̆ng Yang Mngăt Jăk (Galati 5:22-23), jing knuih Khua Yang bi mni leh anăn čiăng ƀuh hlăm grăp čô drei tơdah mă tŭ leh talăng Ñu jao (Y-Mathiơ 25:21).
Tal dua, Y-Silas amâo duah bi mni kơ ñu pô ôh, ƀiădah knuih jăk ñu mâo Khua ƀĭng kna Y-Pêtrôs lŏ hưn bi sĭt, leh anăn klei hưn bi sĭt hlăm hră anei mâo lu mnuih thâo. Mâo đa đa mnuih hưn ktưn kơ diñu pô kâo jing snei, kâo jing snăn! Ai tiê drei mă bruă kơ Khua Yang, Khua Yang thâo leh anăn pô mkăn thâo. Đăm duah bi mni kơ drei pô hlăm klei mĭn mgao ôh, kyuadah “jih klei bi mni snăn jing jhat” (Y-Yakơ 4:16).
Tal tlâo, măng ai hlăm ya bruă ñu ngă, mă bruă kơ Khua Yang mbĭt hŏng Khua ƀĭng kna Y-Pôl, Khua ƀĭng kna Y-Pêtrôs, amâodah mbĭt hŏng êkei hlăk ai Y-Timôthê, ñu ăt mă bruă sĭt suôr hŏng jih ai tiê mơh. Tinei Y-Silas knŏng jing sa čô pô čih hră dôk hmư̆ leh anăn čih hră mơĭt đru Khua ƀĭng kna Y-Pêtrôs, ƀiădah ñu ăt mă bruă hŏng jih ai tiê. Grăp čô drei măng ai hlăm anôk drei dôk, ya bruă drei klam, si klei hdĭp jing ăt brei drei mă bruă sĭt suôr hŏng jih ai tiê hŏng klei mĭn “Ya mta bruă diih ngă, ngă bĕ hŏng jih ai tiê, msĕ si mă bruă kơ Khua Yang, amâo djŏ kơ mnuih ôh” (Kôlôs 3:23).
Akâo Khua Yang đru grăp čô drei jing nanao sa čô dĭng buăl jăk leh anăn sĭt suôr čiăng truh ti hruê knhal tuč mâo klei Khua Yang bi mni: “Jăk leh, Ơ dĭng buăl jăk leh anăn sĭt suôr. Ih dôk sĭt suôr hlăm bruă điêt, kâo srăng brei ih kiă kriê lu. Mŭt bĕ leh anăn mâo klei hơ̆k mơak mbĭt hŏng Khua ih” (Y-Mathiơ 25:23 ).
Si klei Y-Silas mă bruă bi mđĭ ai brei drei dôk sĭt suôr?
Wah lač: Ơ Khua Yang, đru kâo mâo ai tiê thâo luă gŭ, bi luă gŭ kâo pô čiăng mă bruă kơ Ih sĭt suôr nanao tơl knhal tuč. Čiăng snăk mơ̆ng klei kâo mă bruă, lu mnuih mâo klei bi mđĭ ai leh anăn dôk kjăp hlăm klei đăo. Kâo wah lač hlăm Anăn Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Nahum 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
