Pajlug 27:5-6
Nqe cim:
“Tabmeeg sib qhia zoo dua li cia nws xav hais tias koj tsis quavntsej nws” (Pajlug 27:5)
Lus nug xav:
– Vajntxwv Xalumoos muab “cov lus sib qhia” piv rau “hlub zais tsis qhia” zoo li cas?
– Xalumoos muab kev phoojywg tseeb piv rau kev phoojywg cuav li cas?
– Peb cheemtsum muaj tus cwjpwm twg thaum mloog tus Tswv thiab cov neeg muaj kev ntseeg tej lus hais?
Ob nqe Pajlug hnub no muaj cov lo lus tau muab los tib hais txog txojkev phoojywg tseeb: “ntuas tabmeeg” thiab “hlub twjywm”; “phoojywg ntaus” thiab “yeebncuab mas nwj cuav”. Nqe 5 yog kev sib piv ntawm “cov lus ntuas” thiab “hlub twjywm”. Txojkev hlub yuav tsum qhia tshwm, thiab qee zaus qhov kev qhia kev hlub meej tseeb yog cov lus ntuas tas siab, tej zaum yuav ntuas txog qib uas ua nruj. Cov lus ntuas sib sib thiab tseeb uas hais tawm ntawm lub homphiaj xav pab, yuav pab txhim tsa tus cwjpwm thiab kev ua phoojywg. Cov lus cem ntuas tabmeeg uas puv nkaus kev hlub muaj qabhau heev; tiamsis yog hlub twjywm tsis hais ces yuav pab tsis tau. Hlub ua twjywm, txawm yog zoo, los coj qhia tsis tau tus neeg txhaum kom loj hlob. Vajtswv saib hnyav qhov tseeb, hlub ces ntuas tabmeeg zoo dua li uas hlub nyob twjywm tsis hais dabtsi. Kev ntuas qhia ncaj ncees coj tau koob hmoov los rau tus uas raug taw qhia.
Nqe 6 piv rau kev phoojywg tseeb thiab phoojywg cuav. Tej qhov txhab uas cov phoojywg ntaus raug vim lub siab hlub tiag muaj nqis dua cov yeebncuab qhov kev nwj cuav. Tej qhov txhab feem ntau yog yeebncuab ntaus, tiamsis yog thaum phoojywg zoo qhuab ntuas ua rau raug mob ua qhov txhab, ces yog lub cim qhia tshwm lub siab hlub tshua tseeb tiag ntawm tus phoojywg rau tus raug mob. Ib yam nkaus li ntawd, kev nwj pheej txuas nrog rau tus neeg yus hlub, tiamsis thaum tau nwj los ntawm yeebncuab, ces tsuas yog tus duab cuav, yog kev ua saib tsis taus, tsis tseeb ntawm tus neeg ntawd rau tus nws nwj (Pajlug 7:13; Mathais 26:49). Tus phoojywg tseeb nws “ntaus ua qhov ntxhab”, tsis yog rhuav tshem tiamsis yog kho kom rov ua qhov zoo. Tej qhov ntxhab ntawd yog “ua zoo”, vim ua los ntawm txojkev hlub thiab lub siab tseeb. Dua li ntawd, yeebncuab muaj kev nwj ntau zaus, qhuas, lossis ua zoo cuav, tiamsis lub homphiaj ces yog ua kom puas xwb. Peb saib cov phoojywg tseeb muaj nqis, thiab cheemtsum cais tau kev hlub tseeb thiab tej lus hais cuav.
Vajtswv cov menyuam yuav tsum loj hlob lub neej sab ntsujplig thaum tau tus Tswv qhuab ntuas los ntawm Nws Txojlus, Vaj Ntsujplig, thiab los ntawm cov neeg muaj kev ntseeg zoo. Peb tsis txhob ntshai qhov uas luag hais, tiamsis cheemtsum khaws tej lus ntuas zoo li koob hmoov. Dua li, peb kuj thov Vajtswv pub txojkev txawj ntse rau peb zeem paub tej lus uas coj tau peb mus cuag tau Yexus Khetos, thiab tej lus uas tsuas ua kom haum peb siab.
Thov Vajtswv,
Vajtswv, thov Koj pab kom nyuam yaus txo hwjchim txais yuav tej lus qhia thiab saib tej uas cov phoojywg tseeb qhia muaj nqis. Kuj thov Vajtswv Koj pub rau nyuam yaus muaj kev txawj ntse thiab kev hlub hais qhov tseeb. Kom nyuam yaus lub neej ua tau raws li qhov tseeb thiab Koj txojkev hlub. Nyuam yaus tuav Tswv Yexus Khetos lub npe thov, Amees.
Peb qhib siab txais yuav tej lus qhia los ntawm tus cwjpwm twg?
Nyeem Vajluskub hauv peb lub xyoo: Nahus 1
Kênh Youtube BHKTHN:
