I Pêtrôs 5:8-11
“Bơ̆n athei chơ̆n jơhngơ̆m păng kơchăng kơdih, yua kơ yŏng pơgơ̆r yang kơnê̆ mă ayăt kơ bơ̆n, sư nơnăm jơ̆p-jang arum thoi kiĕk wă rôp sa bơ̆n.” (I Pêtrôs 5:8)
Nơ̆r jet tơchĕng pơwao:
– Yua kơ kiơ Bơngai Lui kăl kơ kơchăng hăm yang kơnê̆?
– Lu bơ̆n kăl kơchăng thoi yơ?
– Lu bơ̆n đei pơtrŭt liơ wă kơ ling-lang kơchăng tơblah hăm tơdrong yang kơnê̆ chă đon?
Đơ̆ng rŏng kơ ‘Bok Pêtrôs bơho khul bơngai lui athei lui gơnang kơ Kră Yang, pơjao dôm tơdrong jơ̆l hăt phăt ol kơ Kră Yang (trong 7). Sư tơ’blŏk kơ lu sư athei pơgơ̆t păng kơchăng. ‘Bar nơ̆r âu wă bơtho athei đĭ jơhngơ̆m kơchăng, yua kơ bơngai ayăt noh jơ̆ yang kơnê̆ răp chop jum dăr kon pơlei Kră Yang. Sư yua nơ̆r “thoi kiĕk arum” “răp chop” “wă rôp sa” wă tơ’bôh tơdrong hli krưp, tơdrong khĕnh hơwĕng, tơdrong kơnê̆ yang sa tan păng lu khŭl yang kơnê̆ kiơ̆ sư. Athei ling-lang ‘blŏk lu oei tơ anih tơblah gah bơhngol krưp dêh:
“Tơdrong noh ưh kơsĭ tơblah tơduă bơ̆n kon bơngai ôh,bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu” (Êphêsô 6:12). Yua thoi noh kăl kơ băt kơnăl bơngai ayăt kơ bơ̆n noh bu wă kơ ling-lang kơchăng hăm bơngai ayăt kơ bơ̆n.
Thoi noh, kơplah lu bơ̆n tơ’bơ̆p tơdrong pơmat tat, đe pơm kơnê̆, păng kơdih kâu ‘bôh pơsĕl sơ’ngon, rơdu tơrăn, ưh pă gơh pơm kiơ, tơplih kơ wer weh đơ̆ng Khul Lui păng hăm bơngai lui, dah tơchĕng kơ tơdrong đei truh măng năr truh tơ bơ̆n mah pă hơmet hiă, na lu bơ̆n “Thoi noh na bơ̆n athei lui mă kơjăp wă kơ bơ̆n gơh puh sư mă ataih . Iĕm kư̆m băt bơih đĭ-đăng ‘nhŏng oh bơngai lui oei jơ̆p jă kơ teh đak tă đei tơdrong gleh thoi iĕm mơ̆n” (trong 9). Rai đei đe hil areh, pơm kơnê̆, lu bơ̆n athei rai băt gơnang kơ jơhngơ̆m pran đơ̆ng Kră Yang pơm ăn kơ bơ̆n nuih pran lăm Sư. Athei “Chĕp đao han đơ̆ng Yang Bơhngol ‘Lơ̆ng ăn; ‘noh wă pơtih gia kơ bơ̆n, athei bơ̆n iŏk nơ̆r ‘Bok Kei-Dei tơbăt ăn kơ đe” (Êphêsô 6:17) wă kơ tơblah hăm yang kơnê̆ na sư gô weh ataih đơ̆ng lu bơ̆n. Mă-lei wă kơ đei Nơ̆r ‘Bok Kei-Dei tam dei dei wă kơ tơblah hăm yang kơnê̆ lăm rim tơdrong đei truh phara pha, na lu bơ̆n athei pơnam kơ đŏk, pơhrăm, tơchĕng kơ Nơ̆r ‘Bok Kei-Dei măng năr.
‘Bok Pôl kư̆m pơtrŭt kon pơlei Kră Yang pơ̆n nuih kơchăng hăm tơdrong yang kơnê̆ tơblah, kơplah noh sư pơma khan Bơngai Lui ưh kơ oei minh ‘nu minh drô̆, kơplah đei tơdrong truh, tơdrong anat anot mă-lei “ Iĕm kư̆m băt bơih đĭ-đăng ‘nhŏng oh bơngai lui oei jơ̆p jă kơ teh đak tă đei tơdrong gleh thoi iĕm mơ̆n” (trong 9). Kư̆m thoi noh, đơ̆ng đei tơdrong truh , anat anot, Kră Yang ‘Bok Kei-Dei gô pơm kơ đon lui lu bơ̆n rai kơjăp thoi kơđông tih, arăng thoi mam mă thoi đe jôr tơ lăm ŭnh. Păng adrol hloh ‘noh jơ̆ tơdrong arih ‘lơ̆ng rŏ ling-lang lăm ‘Bok Krist đei ‘măn ăn kơ lu bơngai gơh gơ̆t păng kơchăng wă blah hăm yang kơnê̆ dĭng truh năr tôch (trong 10). Apinh Kră Yang ăn kơ bơ̆n wei kơjăp đon lui, kơchăng ‘bơ̆t anăp yang kơnê̆ chă đon wă blah lu bơ̆n, adrin đŏk păng hŏk pơhrăm Nơ̆r Kră Yang wă kơ đei tơdrong mơsêh pran đơ̆ng Nơ̆r Kră Yang tơgŭm lu bơ̆n ling-lang oei kơjăp lăm năr đei tơdrong truh, păng kĕ jei ‘bơ̆t anăp yang kơnê̆ tơblah.
Ơ Kră Yang, inh apinh Ih Kră Yang mơsêh mơyang tơgŭm inh băt kơnăl kơ lu bơngai ayăt lăm năr đei tơdrong truh mă inh gô tơ’bơ̆p. Apinh tơgŭm inh wă kơ huay kơ pơhơi mă-lei băt kơ gơh gơ̆t păng kơchăng păng ling-lang wei răk Nơ̆r Ih lăm jơhngơ̆m inh wă kơchăng hăm tơdrong yang kơnê̆ wă blah. Yua anăn Kră Yang Yêsu Krist, Amen.
Lu bơ̆n oei kơchăng păng blah hăm yang kơnê̆ thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Nahum 2
