Klei Aê Diê Blŭ: Klei Mtô Mñă Klei Bhiăn 24:6;10-13
Êlan kliăng: “Tơdah yang hruê lĕ, brei diih bi wĭt mnơ̆ng mgơ̆ng kơ ñu, čiăng kơ ñu dưi pĭt hlăm ao jhung ñu leh anăn hơêč hmưi kơ diih; klei anăn srăng jing klei kpă ênô kơ diih ti anăp Yêhôwa Aê Diê diih” (Klei Mtô Mñă Klei Bhiăn 24:13)
Klei êmuh ksiêm mĭn: Ya klei Aê Diê kăm amâo brei pô brei čan ngă kơ mnuih ƀun ƀin hriê čan prăk? Tơdah pô brei čan ngă djŏ tui si klei Aê Diê mtă, ya klei digơ̆ srăng mă tŭ? Ya mta klei yuôm bhăn klei hriăm anei bi hriăm drei?
Kyuadah anak mnuih bŏ hŏng klei soh leh anăn čiăng mkăm pioh nanao knŏng kơ pô yơh kyuanăn hlăm Klei Mtô Mñă Klei Bhiăn kdrêč 15, Aê Diê mtă kơ phung ƀuôn sang Ñu bi êdah klei kmah kơ mnuih ƀun ƀin čiăng kơ “amâo srăng mâo mnuih ƀun ƀin ôh ti krah diih” (Klei Mtô Mñă Klei Bhiăn 15:4).
Lŏ čuê tinei, Aê Diê brei dŭm mta klei bhiăn čiăng răng mgang mnuih ƀun ƀin tuôm hŏng klei dleh dlan snăk snăn mgô̆ digơ̆ nao čan lĭng. Drei mâo klei bi mđĭ ai lu snăk tơdah Aê Diê Pô Prŏng uêñ mĭn hĕ kơ phung ƀun ƀin nao čan lĭng, mgơ̆ng mnơ̆ng mâo ênoh ăt adôk hlăm sang pô, leh anăn brei klei bhiăn răng mgang klei tŭ dưn kơ digơ̆. Klei kpă ênô Aê Diê kăm mnuih mdrŏng amâo dưi mă ôh sa boh êsŭng amâodah boh tâo êsŭng tĭng dlông, ao jhung mnuih ƀun ƀin tơl yang hruê lĕ jing mnơ̆ng pioh mgơ̆ng. Kyuadah mnơ̆ng anăn jing dŏ digơ̆ pioh hdĭp, êsŭng pioh tăp mdiê kuê bi mâo mnơ̆ng ƀơ̆ng huă grăp hruê, bi ao jhung pioh mgang digơ̆ kơ klei êăt êjai mlam (êlan 6, 12-13). Êngao tinăn, mnuih mdrŏng amâo dưi mŭt sang mnuih ƀun ƀin mă mnơ̆ng mgơ̆ng tui si čiăng ôh. Anei jing bruă ngă bi luč knuih mnuih ƀun ƀin. Kyuanăn yơh, Aê Diê mtă pô brei čan knŏng dôk guôn ti êngao lui pô čan srăng djă ba mnơ̆ng digơ̆ mgơ̆ng (êlan 10-11). Jih jang klei Aê Diê mtă amâo djŏ knŏng čiăng mâo ai tiê jăk ti krah phung ƀuôn sang Aê Diê, pô brei čan mâo klei hơêč hmưi mơ̆ng pô čan ôh, ƀiădah mâo wăt klei Aê Diê tŭ: “klei anăn srăng jing klei kpă ênô kơ diih ti anăp Yêhôwa Aê Diê diih” (êlan 13b). Klei dôk dơ̆ng hŏng ai tiê jăk anăn jing klei mtrŭt phung ƀun ƀin tui duah mông găl čiăng bi mlih klei hdĭp digơ̆.
Tơdah iêô mthưr phung đăo ti ƀuôn Kôrantô bi mguôp đru phung đăo ti ƀuôn Yêrusalem tuôm hŏng klei knap mñai, Khua ƀĭng kna Y‑Pôl lač, “Klei diih mâo lu êbeh ară anei srăng bi djăp klei diñu kƀah, leh anăn čiăng kơ klei diñu mâo lu êbeh srăng bi djăp klei diih kƀah. Snăn srăng mâo klei bi knar” (II Kôrantô 8:14). Phung đăo kơ Krist amâo dưi hdĭp bi ktlah mdê hŏng phung ƀun ƀin ôh, leh anăn kăn dưi thâo lei hbĭl drei srăng tuôm hŏng klei ƀun knap. Klei hriăm hruê anei bi hriăm drei hdĭp hŏng klei kpă ênô, bi uêñ mĭn bi đru hdơ̆ng găp hŏng klei khăp, bi thâo săng čiăng kơ phung ƀun ƀin amâo mâo klei hêñ ôh, leh anăn phung mdrŏng sah kăn bi mđĭ kơ diñu pô rei, ƀiădah jih jang mbĭt mđrăm bi êdah klei khăp sĭt suôr, bŏ hŏng klei jăk ti krah hdơ̆ng phung ayŏng adei hlăm Khua Yang.
Si ngă drei uêñ mĭn leh anăn đru dŏng mơ̆ phung knap mñai hlăm Phung Sang Aê Diê?
Wah lač: Ơ Khua Yang, đru kâo mâo ai tiê kmah, thâo khăp leh anăn thâo pap čiăng kơ kâo dưi đru phung ayŏng adei hlăm Phung Sang Aê Diê dôk hlăm klei dleh dlan knap mñai. Kâo wah lač hlăm anăn Yêsu Krist. Amen.
Dlăng Klei Aê Diê Blŭ hlăm tlâo thŭn: II Kôrantô 5:16-7:1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
