Klei Aê Diê Blŭ: Klei Mtô Mñă Klei Bhiăn 25:5-10
Êlan kliăng: “Tơdah phung ayŏng adei dôk mbĭt, leh anăn sa čô hlăm diñu djiê hĕ amâo mâo anak êkei ôh, mô̆ pô djiê anăn amâo dưi lŏ dôk ung hlăm găp djuê mkăn ôh; adei ung gơ̆ srăng nao kơ gơ̆ leh anăn mă gơ̆ jing mô̆ ñu, leh anăn ngă tui hlue klei bhiăn djŏ kơ adei ung gơ̆” (Klei (Mtô Mñă Klei Bhiăn 25:5)
Klei êmuh ksiêm mĭn: Si ngă klei bhiăn Aê Diê kruak čua kơ sa čô mniê djiê ung ƀiădah ka mâo anak êkei ôh? Ya klei yuôm mâo mơ̆ng klei anei? Si ngă ih uêñ mĭn kơ phung mniê djiê ung hlăm Phung Sang Aê Diê?
Anei jing klei bhiăn amâo tuôm ƀuh ôh hlăm klei dhar kreh drei ênuk anei, ƀiădah mơ̆ng ênuk phung aê đưm, klei bhiăn anei lar snăk ti krĭng Giăm Ngŏ, msĕ si hlăm phung Hêtit, phung Asiri (Klei Mtô Mñă Klei Bhiăn 25:5-10). Hlăm hdruôm hră Klei Mrâo Mrang Jăk čih yăl dliê phung Sadusi ăt yua klei bhiăn anei mơh čiăng lông dlăng Khua Yang Yêsu (Y-Mathiơ 22:23-33). Klei bhiăn Aê Diê mtă sa čô ayŏng adei pô djiê yơh srăng dôk mô̆ ayang anei, snăn kơh čiăng kơ anăn pô djiê anăn arăng amâo lăm ôh ti krah phung Israel. Klei bhiăn anei dưi mă yua hŏng tlâo mta klei čoh čuăn. Tal sa, digơ̆ jing ayŏng adei sa tian hdĭp mbĭt sa boh sang. Tal dua, pô djiê amâo mâo anak êkei ôh. Leh anăn tal tlâo, adei pô djiê anăn dôk hliê leh anăn tŭ ư dôk mô̆ pô djiê anăn leh anăn mâo anak hŏng gơ̆.
Klei bhiăn anei amâo djŏ knŏng čiăng djă pioh anăn gŏ sang hlăm hră čih anăn găp djuê ôh, ƀiădah wăt čiăng răng mgang mniê djiê ung mơh. Kyuadah tui si klei dhar kreh ênuk anăn, arăng dlăng kơ klei amâo mâo anak êkei jing klei bi hêñ prŏng kơ phung mniê. Hĭn mơh, tơdah mniê djiê ung dôk hjăn păn gơ̆ srăng tuôm hŏng lu klei dleh dlan hlăm klei hdĭp kyuadah hlăm ênuk anăn ung yơh jing pô mă bruă phŭn hlăm gŏ sang.
Klei bhiăn kruak čua msĕ mơh kơ klei tơdah ayŏng adei pô djiê amâo čiăng ngă ôh klei čuê nuê hŏng iê amai ñu, ñu dưi hngah ƀiădah ñu srăng luč knuih kơhưm kyuadah ñu srăng tŭ klei arăng mưč, “hlăm phung Israel sang ñu arăng pia sang mnuih arăng toh hĕ leh klĭt juă” (êlan 10).
Hruê anei amâo lŏ yua klei bhiăn anei ôh, ƀiădah mâo mta klei brei drei mđing, sa kdrêč hlăm klei bhiăn anei jing čiăng đru bi juh ai tiê wăt đru hŏng mnơ̆ng dhơ̆ng kơ mniê djiê ung. Mphŭn dô ăt msĕ si ară anei mơh, djiê ung jing sa klei luč liê prŏng snăk kơ ai tiê, klei anăn srăng bi dleh dlan hĭn kơ klei hdĭp mniê djiê ung. Khua ƀĭng kna Y-Pôl mtă: “Tơdah sa čô mniê đăo mâo hlăm găp djuê ñu phung mniê djiê ung, brei ñu đru digơ̆; đăm bi ktrŏ kơ Phung Sang Aê Diê ôh, čiăng kơ Phung Sang Aê Diê dưi đru phung mniê djiê ung sĭt” (I Y-Timôthê 5:16). Kyuanăn brei Phung Sang Aê Diê wăt grăp čô drei uêñ mĭn, đru dlăng ba phung mniê djiê ung dôk hlăm klei dleh knap. Kyuadah kdlưn hĭn kơ jih jang, digơ̆ yơh jing phung čiăng mâo klei đru djăp mta hlăm klei hdĭp, čiăng kơ ai tiê digơ̆ dôk kjăp leh anăn mâo klei hơĭt đru bi mguôp mă bruă kơ Khua Yang.
Drei tuôm đru mơ̆ phung mniê djiê ung hlăm Phung Sang Aê Diê?
Wah lač: Ơ Khua Yang, Pô khăp leh anăn uêñ mĭn kơ jih jang phung mniê djiê ung dôk hlăm klei dleh knap. Akâo Khua Yang yua kâo đru bi juh, bi mđĭ ai leh anăn đru hŏng mnơ̆ng dhơ̆ng kơ phung mniê djiê ung hlăm Phung Sang Aê Diê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
