Klei Aê Diê Blŭ: Klei Mtô Mñă Klei Bhiăn 25:4
Êlan kliăng: “Đăm guôm hĕ ôh amung êmô dôk juă mdiê” (Klei Mtô Mñă Klei Bhiăn 25:4).
Klei êmuh ksiêm mĭn: Klei bhiăn “đăm guôm hĕ ôh amung êmô dôk juă mdiê” ya čiăng lač? Ya ngă Aê Diê mtă kơ phung ƀuôn sang ñu brei ngă jăk kơ hlô mnơ̆ng rông? Ya klei hriăm ih mâo kơ ih pô mơ̆ng klei mtă anei?
Kdrêč 25 čih kơ klei bhiăn klei tŭ dưn kơ anak mnuih, knŏng êlan 4 jing sa klei bhiăn kơ klei răng mgang hlô mnơ̆ng rông pioh yua hlăm bruă ngă lŏ hma: “Đăm guôm hĕ ôh amung êmô dôk juă mdiê.” Êjai dôk êbat hiu hlăm kdrăn tač, phung Israel ƀơ̆ng kpŭng mana lĕ mơ̆ng adiê, ƀiădah tơdah mŭt dôk leh hlăm Lăn Aê Diê Ƀuăn, digơ̆ srăng hdĭp hŏng bruă rông hlô mnơ̆ng leh anăn buh pla. Aê Diê brei klei bhiăn anei čiăng răng mgang hlô mnơ̆ng rông, kyuadah srăng mâo đa đa pô rông knŏng thâo yua ai mnơ̆ng rông ƀiădah amâo čiêm rông digơ̆ bi jăk ôh. Klei bhiăn Aê Diê mtă klă kơ pô rông amâo dưi guôm ôh amung êmô dôk juă mdiê. Čiăng lač brei pô rông thâo uêñ kơ mnơ̆ng rông dôk mă bruă suăi kơ ñu.
Hlô mnơ̆ng ăt jing dŏ Aê Diê hrih mjing hŏng klei kñăm ciăng jao kơ anak mnuih kiă kriê (Klei Mphŭn Dơ̆ng 1:26). Kyuanăn phung ƀuôn sang Aê Diê amâo dưi ktư̆ juă leh anăn bi knap digơ̆ ôh, ƀiădah čiêm rông digơ̆ bi jăk msĕ si klei bhiăn Aê Diê mtă leh. Mâo đa đa mnơ̆ng rông mă bruă suăi snăk kơ pô rông ñu, bi klăk, brei pô rông uêñ mơh kơ klei suaih pral mnơ̆ng rông. Dưi lač, Aê Diê uêñ mĭn čêč kdrêč kơ klei hdĭp phung ƀuôn sang Ñu ti anôk Lăn Ñu Ƀuăn čiăng kơ digơ̆ hdĭp tui si klei Ñu čiăng leh anăn gưt kơ klei bhiăn Ñu. Čiăng hŏng klei dôk dơ̆ng ƀơ̆ng huă mdê anei phung găp djuê riêng gah srăng thâo kơ Anăn guh kơang Aê Diê, Pô bi kbiă leh digơ̆ mơ̆ng čar jing hlŭn.
Hruê anei klei hriăm anei ăt mñă kơ drei, Aê Diê jao kơ anak mnuih bruă kiă kriê jih jang hlô mnơ̆ng pioh mă bruă kơ anak mnuih, ƀiădah brei drei mđing mơh amâo dưi ngă klei ktư̆ juă hlô mnơ̆ng ôh ƀiădah thâo uêñ mĭn ngă jăk kơ mnơ̆ng rông. Brei drei bi leh bruă kiă kriê jih jang mnơ̆ng êbat ban Aê Diê jao hlăm klei kpă ênô tui si klei Ñu mtă leh.
Khua ƀĭng kna Y-Pôl ăt yua klei bhiăn anei mơh kơ Phung Sang Aê Diê tơdah mtă kơ phung anak čô Aê Diê đăm wơr bĭt ôh bruă đru mtrah prăk kăk kơ phung tŭ klei dleh dlan hlăm bruă mtô mjuăt leh anăn răng kriê klei hdĭp myang digơ̆ (I Kôrantô 9:9; I Y-Timôthê 5:18). Ñu blŭ kñăm tơdah Aê Diê uêñ kơ klei brei djăp mnơ̆ng ƀơ̆ng kơ êmô dôk juă mdiê, snăn brei Phung Sang Aê Diê uêñ mơh kơ bruă đru prăk kăk kơ phung lui hruê mmông, ai tiê, hur har mă bruă kơ Khua Yang. Brei Phung Sang Aê Diê yua bi djŏ prăk kăk kơ bruă anei, amâo djŏ knŏng hjăn kơ khua pô mtô, pô mtô ôh, ƀiădah uêñ msĕ mơh kơ phung mkăn yua jih hruê mmông digơ̆ đru bruă mkăn hlăm Phung Sang Aê Diê. Tơdah drei yua prăk bi mơak kơ Khua Yang, Ñu srăng lŏ thiăm brei kơ drei čiăng bi leh klei Ñu čiăng.
Si drei mĭn kơ klei Aê Diê jing mơ̆ng êlan Klei Aê Diê Blŭ hruê anei?
Wah lač: Ơ Khua Yang, Pô hrih mjing jih jang mnơ̆ng. Bi hriăm kâo thâo khăp hlô mnơ̆ng jing dŏ Ih hrih mjing leh. Đru kâo leh anăn Phung Sang Aê Diê thâo uêñ kơ klei đru mtrah kơ phung mă bruă kơ Ih hŏng jih ai tiê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
