2 Kevcai 25:4
Nqe cim:
“Thaum nej tabtom muab nyuj mus tsuj nplej hauv tshav nplej, nej tsis txhob muab hnab looj nyuj qhovncauj” (2 Kecai 25:4)
Lus nug rau sawvdaws xav:
– Nqe kevcai uas hais tias: “tsis txhob muab hnab looj nyuj qhovncauj” muaj lub ntsiab li cas?
– Vim li cas tus Tswv qhia kom Nws haiv neeg yuavtsum ua ncaj rau tej tsiaj txhu?
– Tej lus qhia no muaj qabhau dabtsi rau koj?
Nyob rau hauv 2 Kevcai tshooj 25 yog qhia kevcai rau tibneeg, tshwjxeeb nyob hauv nqe 4 yog kevcai qhia kom ua zoo tu tej tsiaj txhu uas siv los pab ua liaj ua teb pab tes taw: “tsis txhob muab hnab looj nyuj qhovncauj”. Thaum uas tseem nyob tom tiaj suab puam, Vajtswv haiv neeg tau noj tej Manas uas poob saum ntuj los, tiamsis thaum uas lawv los txog teb chaws Kana-as lawm, lawv yuavtsum tau cog qoob loos thiab yug tsiaj txhu lawv thiaj tau noj. Vajtswv muab nqe kevcai no los tiv thaiv tej tsiaj txhu, vim muaj qee tus tswv nws tsuas paub siv tej tsiaj lub zog tiamsis nws tsis paub hlub tsiaj li. Vajtswv Txojlus qhia meej hais tias, thaum uas nyuj tabtom mus tsuj nplej hauv tshav nplej tus tswv tsis txhob muab hnab looj nyuj qhovncauj. Qhov ntawd muaj lub ntsiab hais tias, tus tswv yuavtsum tau pub tsiaj noj thaum uas tsiaj tabtom ua haujlwm rau tus tswv.
Tej tsiaj txhu puavleej yog Vajtswv tsim thiab muab cob rau tibneeg kav (Chivkeeb 1:26). Vim li ntawd, Vajtswv haivneeg yuavtsum tsis txhob tsimtxom tej tsiaj txhu, tiamsis yuavtsum tau yug thiab tu li tus Tswv tej kevcai. Muaj tej yam tsiaj txhu ua haujlwm hnyav heev pab tej tswv, yog li ntawd cov tswv yuavtsum paub hlub tej tsiaj. Vajtswv yeej niaj hnub tsomkwm Nws haivneeg thiab pab kom lawv ua tau lub neej raws li Nws lub siab nyiam, los ntawm lawv lub neej zoo qhia rau tej neeg ib ncig paub txog Vajtswv yog tus uas coj lawv khiav tawm nram tebchaws ua cev qhev los.
Timthawj Paulus kuj siv nqe kevcai no rau cov Pawg ntseeg thaum uas nws qhia txog tes haujlwm cov ntseeg yuav tsum tau ua pab tus Xibhwb saib xyuas pawg ntseeg uas niaj hnub qhia Vajtswv Txojlus rau lawv thiab tu lawv sab ntsujplig (I Kausleethaus 9:9; I Timautes 5:18). Paulus ntuas hnyav txog tus Tswv twb qhia kom tibneeg yuavtsum paub tiv thaiv tej tsiaj txhu, pub tej tsiaj txhu noj thaum uas siv tsiaj los ua haujlwm, tsimnyog Pawg ntseeg haj yam yuavtsum xam pom txog Vajtswv cov tub qhe, los ntawm muab nyiaj hli pab lawv, vim lawv siv tagnrho sijhawm, dag zog, siab ntsws los saib xyuas Pawg ntseeg. Pawg ntseeg yuavtsum siv nyiaj kom tsimnyog los yug tus Kx, Xf uas saib xyuas pawg ntseeg. Thaum uas siv Vajtswv tej nyiaj hauv Pawg ntseeg mus raws li Vajtswv lub siab nyiam mas Vajtswv yuav foom koobhmoov ntxiv rau Pawg ntseeg kom muaj siv tsis tu ncua thiab ua tiav Vajtswv tes haujlwm.
Thov Vajtswv
Tus Tswv, Koj yog tus uas tsim tagnrho txhua tsav yam hauv ntiajteb no. Thov pab kom nyuam yaus paub hlub tej tsiaj uas Koj tsim. Thov pab kom nyuam yaus thiab Pawg ntseeg paub hlub txog cov neeg uas tas siab tas ntsws ua Koj tes haujlwm saib xyuas pawg ntseeg. Nyuamyaus tuav Tswv Yexus lub npe thov Amees.
Peb xav li cas txog Vajtswv tus yam ntxwv dhau los ntawm nqe Vajluskub hnub no?
Nyeem Vajluskub hauv peb lub xyoos: Chivkeeb 18
Kênh Youtube BHKTHN:
