Qhov Chaw Nkaum Ruaj Khov – 25/9/2022

491

 

 

Pajlug 18:9-13

Nqe cim:

Tus Tswv zoo ib yam li lub chaw tsomfaj uas ruaj khov heev thiab yog qhov chaw cawm siav uas cov neeg ncaj ncees vamkhom(Pajlug 18:10).

 

Lus nug rau sawvdaws xav: Qhov chaw twg muaj chaw nkaum ruaj khov? Nqi zog sib txawv li cas thaum cia siab rau tej nyiaj txiag thiab cia siab rau tus Tswv? Tsimnyog peb muaj tus cwjpwm thiab kev xav li cas thaum ntsib kev txomnyem?

Tibneeg xav kom muaj kev kaj siab tiamsis tsis muaj leejtwg tau txojkev kaj siab tseeb. Vajntxwv Xalumoos qhia paub txojkev kaj siab tseeb tsuas yog thaum tibneeg cia siab rau tus Tswv, vim Nws yog qhov chaw ruaj khov rau tibneeg nkaum. Cia kom tau txojkev kaj siab tseeb, vajntxwv ntuas tibneeg yuav tsum ua:

Tim ib, yuav tsum ntseeg thiab cia siab rau tus Tswv (nqe 10). Vajtswv Txojlus qhia paub tus neeg ncaj ncees tsis yog zam kev txomnyem, tiamsis lub sijhawm raug txomnyem lawv nyob hauv tus Tswv kev tiv thaiv. Tus Tswv txojkev tiv thaiv tau muab piv zoo li lub chaw tsomfaj lossis tus ntsayeej ruaj khov. Chaw tsomfaj ruaj khov qhia paub lub nroog muaj zog, ruaj khov thiab tsis muaj leejtwg txeeb tau. Tim ob, tsis txhob tub nkeeg tiamsis yuav tsum nqis tes ua kom sai, tamsim (nqe 9). Tus cwjpwm tso dhau, tub nkeeg tau muab piv rau cov neeg rhuav tshem vim nws ua kom puastsuaj yam uas muaj peevxwm yuav ua tau. “Tus neeg tub nkeeg” ua kom nws tus kheej thiab sawvdaws poob. Tim peb, tsis txhob xav yuam kev tias nyiaj txiag tiv thaiv tau tibneeg nyob ruaj khov (nqe 11). Tus neeg npluanuj pheej xav tias nyiaj txiag zoo li tus ntsayeej siab tiv thaiv lawv, tiamsis tus Tswv muaj peevxwm ua tau kom tus ntsayeej puastsuaj (Pajlug 11:28). Khoom nyiaj txiag ua tsis tau kom muaj kev kaj siab tseeb thiab nyob ntev. Tim plaub, yuav tsum txo hwjchim (nqe 12-13). Lub siab khavtheeb ua rau poob ntsejmuag raws li tus Tswv Txojlus qhia: Tus Tswv yuav ua kom lawv poob ntsejmuag, thiab lawv tej npab yuav tsaug leeg. Nws yuav muab cov Mau-am tej chaw tsomfaj thiab lawv tej ntsayeej uas siab rhuav kom puastsuaj thiab tsoo kom tawg tas xyaw hmoov av” (Yaxayas 25:11b-12). Dua li ntawd, khavtheeb ua rau tibneeg cia siab rau tus kheej ntau dua li uas cia siab rau tus Tswv thiab nkaum hauv Nws.

Kev mob nkeeg, tsovrog, dej nyab, toj pob kuav…ua rau tibneeg nyob tsis kaj siab. Khoom nyiaj txiag, tej kev txawj ntse kuj tsis yog qhov chaw nkaum ruaj khov rau tibneeg. Tsuas yog Vajtswv xwb thiaj nyob mus ibtxhis, Nws yog lub Pobzeb ruaj khov rau cov uas los nkaum hauv Nws. Qhov teebmeem yog saib peb puas ntseeg tus Tswv, puas txo hwjchim txais yuav tus Tswv lossis tsis txais yuav Nws. Ntau zaus twb tsimnyog peb maj nroos los cuag tus Tswv los peb tseem cia siab rau tej nyiaj txiag thiaj ua rau peb ntsib kev txomnyem. Thov Vajtswv pab rau peb txhua tus, thaum raug kev txomnyem paub xyaum Daviv tus qauv thov Vajtswv:“Tus Tswv yog tus tiv thaiv kuv; Nws yog kuv lub chaw fajxwm uas ruaj khov. Kuv tus Vajtswv yog tus tiv thaiv kuv, kuv nrog Nws nyob tso siab plhuav. Nws tiv thaiv kuv ib yam li daim thaiv hniav ntaj, nws tiv thaiv kuv thiab pab kuv dim(Phau Ntawv Nkauj 18:2).

 

Thov Vajtswv,

Tus Tswv, Koj yog nyuam yaus Leej Txiv tus uas nyob saum ntuj, Koj yog qhov chaw nkaum ruaj khov uas nyuam yaus nrhiav tau kev kaj siab ibtxhis. Thov Koj pab kom nyuam yaus cia siab rau Koj, nrhiav Koj heev dua li uas nrhiav tej nyiaj txiag. Amees.

Peb puas nrhiav tus Tswv ua ntej thaum uas peb raug kev txomnyem?

 Nyeem Vajluskub hauv peb lub xyoos: Yaxayas 17:1-18:7

Kênh Youtube BHKTHN:

https://www.youtube.com/c/bhkthn

Bài trướcKhánh Hòa: Ra Mắt Điểm Nhóm Thị Trấn Khánh Vĩnh
Bài tiếp theoAnôk Đuĕ Dăp Êđăp Ênang – 25/9/2022