II Kevcai 6:4-9
Nqe cim:
“Nej yuav tsum muab qhia rau nej tej menyuam, thiab niaj hnub hais txog tej lus ntawd, tsis hais thaum nej nyob hauv tsev, thaum nej taug kev, thaum nej so thiab thaum nej ua haujlwm.” (II Kevcai 6:7).
Lus nug rau sawvdaws xav:
– Vim li cas cov Yixalayees yuav tsum qhia kev ntseeg rau tej menyuam?
– Lawv yuav tsum qhia kev ntseeg zoo li cas?
– Nimno, peb puas siv tau cov qauv ntawd los qhia kom peb cov menyuam paub kev ntseeg?
Txhua tus neeg Yixalayees, Mauxes puavleej qhia kom lawv yuav tsum nco ntsoov tej lus tseemceeb, yog zeem paub tus Tswv thiab hlub tus Tswv. Qhov no yog qhov uas tseemceeb tshaj, lawv tsis yog ua rau lawv xwb tiamsis muaj feem xyuam “muab qhia rau” tej menyuam, kom lawv paub thiab ua lub neej haum tus Tswv siab.
Mauxes ntuas cov Yixalayees yuav tsum nquag qhia kev ntseeg rau tej menyuam thiab niaj hnub ua tes haujlwm no hauv txhua kis kev ua neej – “niaj hnub hais txog tej lus ntawd, tsis hais thaum nej nyob hauv tsev, thaum nej taug kev, thaum nej so thiab thaum nej ua haujlwm.” (nqe 7). Tus Tswv Txojlus tsis yog tej lus txeev muab zais cia txog athiv mam muab los qhib ib zaug xwb tiamsis yuav coj nrog nraim yus, ua li cas kom Vajtswv Txojlus nyob ze, swm, yoojyim pom, muab sau rau ntawm tej ncej thiab tej roojvag.
Los ntawm Mauxes tej lus ntuas, peb kawm tau hais txog qhia kev ntseeg rau tej menyuam. Qhov ua ntej tshaj plaws yog saib tes haujlwm qhia kev ntseeg yog ib tes haujlwm muaj hauvpaus hauv ntsis, niaj hnub ua, peb yuav tsum tau nquag, ua siab ntev thiab tswj kom ua tau zoo.
Hauv tsevneeg, peb muaj feem ua tus qauv coj cov menyuam nyeem Vajtswv Txojlus ua ntej mus pw, thov Vajtswv hauv tsevneeg. Thiab kuj qhia cov menyuam nyeem Vajtswv Txojlus txhua hnub, kawm kom nco tau cov nqe Vajluskub tshwjxeeb thiab muaj khoom nplig txhawb zog. Kuj muaj feem muab cov nqe Vajluskub dai rau ntawm tej phab ntsa kom tsevneeg yoojyim nco. Hauv Pawg Ntseeg, peb yuav tsum pab cov menyuam kom koom tau nrog cov ntseeg hauv cov chav kawm hnubkaj, pehawm txhua pab.
Cia li muab tej haujlwm qhia kev ntseeg los ua txoj hau kev ua neej thiab siv txhua lub sijhawm qhia Vajtswv Txojlus rau tej menyuam. Xws li thaum ntsia pom tej chaw zoo nkauj, cia li qhia rau cov menyuam paub tias tus Tswv yog tus uas tsim. Hauv tej kev noj haus, qhia cov menyuam paub tias tus Tswv pub muaj txhua yam… Yuav tsum paub tes haujlwm qhia kev ntseeg tsis yoojyim xws li qhia kev txawj ntse. Yog li cov niamtxiv yuav tsum kawm thiab ua raws tus Tswv tej lus qhia, kom xwv yus lub neej ua tau qauv zoo rau tej menyuam xyaum.
Thov Vajtswv,
Tus Tswv, thov Koj qhia kom nyuam yaus paub qhia kev ntseeg rau tej menyuam kom lawv totaub thiab siv hauv kev ua neej, loj hlob rau txojkev kawm paub tus Tswv thiab hlub Koj. Thov Koj pab nyuam yaus ncaj ncees thiab siv lub neej ua qauv rau tej menyuam xyaum. Amees.
Peb puas txaus siab siv sijhawm, dag zog thiab lub siab qhia Vajtswv Txojlus rau cov menyuam thiab cov neeg nyob ibncig peb?
Nyeem Vajluskub hauv peb lub xyoo: Tes Haujlwm 21:1-36
Kênh Youtube BHKTHN:
