II Timôthê 1:6-9
Trong tơm: “’Bok Kei-Dei ăn kơ bơ̆n Yang Bơhngol ‘Lơ̆ng Sư. Na Yang Bơhngol ‘Lơ̆ng ưh kơ wă ăn kơ bơ̆n jơhngơ̆m lêl ôh, Sư ăn kơ bơ̆n jơhngơ̆m nuih kơtang. Sư ăn kơ bơ̆n gơh ‘mêm kơ ‘Bok Kei-Dei păng bôl buăl bơ̆n mơ̆n păng ăn kơ bơ̆n jơhngơ̆m chơ̆n tơpă.” (II Timôthê 1:7)
Nơ̆r jet tơchĕng pơwao:
– ‘Bok Pôl pơlung pơtrŭt Timôthê tơdrong kiơ kơplah tơ’bơ̆p tơdrong gleh pơlong lăng?
– Pơm liơ wă kơ Timôthê lăp đon chu pơmat, đei tơdrong pơtrŭt, jơhngơ̆m ‘brưk ‘maih awih awăn, pơm kơdranh ră roi?
– Pơm liơ bơ̆n kĕ hlôi đơ̆ng tơdrong pơlong wă kơ pran kơtang jing bơngai pơm kơdranh ăn kơ Kră Yang?
‘Bok Pôl đơ̆ng lăm hnam bơnă chih kơthơ ăn kơ Timôthê, bơngai oei moh, sư wei lăng Khul Lui Êphêsô wă pơlung pơtrŭt sư kơplah sư tơ’bơ̆p tơdrong gleh pơmat, pơlong lăng lăm tơdrong jang pơdơ̆ng tơiung Khul Lui păng wă kơ jing bơngai pơm kơdranh ăn kơ Kră Yang. ‘Bok Pôl bơtho khan kơ Timôthê athei tơiung tơdrong gơh hơgei dang lĕ thu ŭnh khơ̆ng, ‘nĕ kơ “lêl”, mă-lei athei pơm kơdranh hăm tơdrong gơh hơgei đơ̆ng Kră Yang ăn noh hăm jơhngơ̆m “pran kơtang, đei tơdrong ‘mêm mơnat păng kơchăng”. “lêl” noh jơ̆ minh tơdrong pơgăn tih lăm tơdrong jang pơm kơdranh. Bơngai wă pơm kơdranh ưh kơ lui ngeh kơ sư kơdih gơh pơm kơdranh yua kơ sư hli kơ đe che bơle, hiĕk achơ̆, hli kơ đe pơma plơ̆, hli kơ đe pơm kơnê̆. Păng yua kơ bơ̆n hiơt kơ ‘Bok Kei-Dei ăn kơ bơ̆n nuih kơtang, ‘mêm mơnat păng gơh gơ̆t wă kơ năm hlôi đơ̆ng dôm tơdrong pơlong, arih jing bơngai pơm kơdranh ăn kơ Kră Yang. Bơ̆n bơngai lui, bơ̆n ‘nĕ kơ lê̆ tơdrong gơh hơgei lăm bơ̆n noh hiong dang lĕ pla ŭnh bơ̆n păt hơngăm, mă-lei bơ̆n athei râu tơiung tơdrong gơh hơgei đơ̆ng Kră Yang ăn noh wă awih awăn kơ Kră Yang, mă loi athei pran kơtang pơm kơdranh tơdrong Kră Yang hăm jơhngơ̆m ‘mêm mơnat kơ lu ‘nhŏng oh oei hiong răm păng đơ̆ng jơhngơ̆m bơ̆n kơdih ‘mơ̆i ‘maih pơm kơdranh ră roi, ưh kơ đơ̆ng bu pơgŏ ôh.
‘Bok Pôl khan kơ Timôthê ‘nĕ kơ mơlâu gah tơdrong ‘bok Pôl oei lăm hnam phak, yua kơ đe chĭt sư lăm hnam phak ưh kơ đơ̆ng sư pơm yoch ôh, mă-lei “yua kơ Tơdrong ‘Nao ‘Lơ̆ng noh na chu pơmat” (II Timôthê 2:9). Tơdrong ‘noh trŏ kơ bơ̆n chhôk ‘nă dêh pơdah kơ đe pơdah kơ đe dơ̆ng, ưh kơ gơh mơlâu ôh. Bơ̆n kăl kơ ‘blŏk tơdrong ‘nâu, ‘Bok Kei-Dei ưh kơ pôm pơklaih bơ̆n đơ̆ng yoch đĕch ôh, mă-eli Sư kư̆m krao bơ̆n jang tơdrong jang ‘lơ̆ng rơgoh Sư kiơ̆ kơ tơdrong Sư rĕng kơnhăm păng kiơ̆ kơ tơdrong Sư mơnat. Yua kơ thoi noh na mă khan đei tơdrong kiơ ‘bơ̆t anăp bơ̆n. Yang kơnê̆ chă đon pơgăn bơ̆n thoi yơ hĭ, phŏ kơnh truh tơ đe tah bơ̆n tơ lăm hnam phak jô̆ bơ̆n yoch thoi đe tah ‘bok Pôl tơ lăm hnam phak noh mơ̆n, bơ̆n kư̆m athei lăp đon chu iŏk pơmat, râu tơiung jơhngơ̆m bơ̆n pran kơtang awih awăn păng jing bơngai pơm kơdranh ăn kơ Kră Yang.
Yua kơ jơhngơ̆m kon bơngai yoch bơih, lei bơ̆n bơngai lui, bơ̆n athei tơpăt, roi hơlăng bơ̆n kơdih juăt kơ mơlâu kơ Kră Yang păng mơlâu kơ Tơdrong ‘Nao ‘Lơ̆ng Kră Yang. ‘Bok Pêtrôs kư̆m hlôi sơngah kơ Kră Yang pêng ‘măng yua kơ sư hli tơtơ̆ păng yua kơ sư mơlâu kơplah sư ‘bôh Kră Yang Yêsu đe rôp noh. Lei na lu tơdrong pơlong pơgăn kuă ăn bơ̆n pơm kơdranh tơdrong Kră Yang noh ưh kơ pôm đơ̆ng Satan păng lu tơdrong pran đơ̆ng ‘nguaih đĕch ôh, mă-lei tơdrong pơlong lăng lăm tơdrong jang pơm kơdranh tơdrong Kră Yang, rim ‘nu kơ bơ̆n athei rôp kơjăp tơklep tơlir hăm tu tơm tơdrong pran đơ̆ng plĕnh, đơ̆ng Yang Bơhngol ‘Lơ̆ng ăn, ‘noh jơhngơ̆m nuih kơtang, ‘mêm kơ ‘Bok Kei-Dei, ‘mêm kơ bôl buăl, păng đei jơhngơ̆m gơh gơ̆t. Mưh bơ̆n pơpôi jơhngơ̆m bơ̆n kơdih lei jơhngơ̆m bơ̆n gô ơh, jơhngơ̆m gô hiong, wă tơblah ưh kơ kĕ ôh, mă-lei lăp bơ̆n pơpôi jơhngơ̆m bơ̆n kơ Kră Yang Tơ’ngla mă ăn kơ bơ̆n jơhngơ̆m nuih kơtang lei bơ̆n gô hlôi đơ̆ng tơdrong pơlong, na bơ̆n pran kơtang jing bơngai pơm kơdranh ăn kơ Kră Yang.
Bơ̆n mơ̆ng tơdrong bơtho ‘nâu hei, bơ̆n kăl kơ tơplih tơdrong kiơ wă kơ ling-lang pơtrŭt tơiung jơhngơ̆m bơngai pơm ră roi tơdrong Kră Yang?
Kơkuh kơ Ih ‘Bă mă ‘lơ̆ng rơgoh, tăp dăr kơ inh oei lơ dêh bơngai tam băt kơ Ih. Apinh Ih mơnat ăn gơh hơgei, păng kĕ pran wă kơ inh kĕ hlôi đơ̆ng dôm tơdrong pơlong, pơtrŭt tơiung jơhngơ̆m, pơm kơdranh ră roi ăn kơ lơ bơngai băt tơdrong Ih. Inh krao khan yua anăn Kră Yang Yêsu Krist, Amen!
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 4
Kênh Youtube BHKTHN:
