I Timôthê 2:1-8
“Tơ rim anih akŭm tơduă iĕm, inh wă kơ lu drŏ-nglo krao khan kơ ‘Bok Kei-Dei, lu bơngai drŏ-nglo bu mă đei jơhngơ̆m ‘lơ̆ng tơpăt ưh kơ hil kơ đe.” (I Timôthê 2:8)
Nơ̆r jet tơchĕng pơwao:
– Yơ̆r ti ‘lơ̆ng rơgoh ngơk tơplĕnh krao khan wă khan kiơ?
– Yua kơ kiơ Pôl bơtho lu bơngai drŏ-nglo ‘nĕ kơ “ ơh blĕk păng pơjah pơjăng?
– ‘Bai pơhrăm bơtho lu bơ̆n krao khan hăm ‘bar pah ti păng hăm jơhngơ̆m thoi yơ?
Đơ̆ng rŏng kơ nơ̆r bơtho tơ’bôh ‘măn kơ Timôthê athei nuih kơ tơblah hăm yang kơnê̆ păng đei lăm jơhngơ̆m ‘lơ̆ng (I Timôthê 1:18-20), Pôl pơma gah tơdrong krao khan, mă-lei dang ei sư kơnhăm kơ lu bơngai noh “lu bơngai drŏ-nglo”. Lăm I Timôthê 2:8, minh ‘nu jơ̆ng ‘bang bơtho lu bơngai drŏ-nglo kăl kơ pơm păng ưh kơ kăl kơ pơm.
Blŭng a, sư roi tơ’bôh tơdrong lu sư kăl kơ pơm hăm nơ̆r “inh wă kơ đĭ đăng lu bơngai drŏ-nglo yơ̆r ti ‘lơ̆ng rơgoh, na krao khan” khul bơngai lui blŭng a juăt kơ krao khan rok thoi lu bơngai Juđê iung dơ̆ng kơplah krao khan, ‘bar pah ti yơ̆r tơ kơpal, tơpang ti bơlang tơ kơ pal plĕnh, kơplah noh sơ̆, pôl yua nơ̆r “‘lơ̆ng rơgoh” păng nơ̆r tơ’bôh, yua kơ kiơ? Lăm Hơriso đei jet “Bu gơh tŏk tơ kông Kră Yang? Bu gơh kĕ dơ̆ng lăm anih rơgoh Sư? Noh lu bơngai đei ti rơgoh păng jơhngơ̆m rơgoh, Ưh kơ wă ăn bơhngol sư tơdrong yoch glăi, kŭm ưh kơ pơkă hơlĕnh.” (Hơriso 24:3-4). Tơpang ti yơ̆r wă krao khan kăl kơ tơpang ti ưh kơ yoch kơnê̆ ‘mê̆ ‘mach đơ̆ng chĕp bơwei lơ tơdrong kơnê̆, dah ưh, nơ̆r krao khan bơngai noh jing ưh kơ đei gĭt kăl, drŏ-nglo noh bơih jing minh ‘nu bơngai lăm tơdrong jang, yua kơ thoi noh, kơplah bơ̆jang, bơngai drŏ-nglo kăl kơ tơchĕng pơwao tơdrong bơ̆n kơdih jang hăm ‘lơ̆ng rơgoh ‘bơ̆t anăp Kră Yang, hăm oei đei pơgăn ưh tơdrong krao khan păng tơdrong tơ’bưh bơ̆n kơdih hăm Kră Yang?
Tơdrong mă ‘bar, Pôl wă tơ’blŏk dơ̆ng athei krao khan tơplih kơ tơdrong blĕk ơh, tơdrong âu sư oei pơma tơdrong tơ’bưh hăm đĭ đăng bơngai, phara ‘biơ̆ kơ lu bơngai pơgơ̆r (1-7). Sơ̆p hla bơar nơ̆r ‘Bok Kei-Dei lơ wơ̆t pơtrơp tơdrong lu bơ̆n đei iŏk tơdrong mơnat păng lu bơ̆n kư̆m mơnat ăn kơ bơngai nai, blĕk ơh, chhŭr nuih noh wă tơdra kơ minh ‘nu bơngai tam mă mơn iŏk tơdrong mơnat đơ̆ng Kră Yang, kơplah băt mơn kơdih ưh kơ tôm kăl kơ tơdrong mơnat đơ̆ng Kră Yang, lu bơ̆n nhen thoi minh ‘nu bơngai gơh găt hăm bơngai nai, hăm lu bơngai pơgơ̆r lăm teh đak.
Mă pêng, Pôl bơtho bơngai drŏ-nglo athei krao khan, ‘nĕ kơ pơjah pơjăng, bơngai drŏ-nglo ngăl arih grê gah đon tơchĕng, bơngai drŏ-kăn ngăl grê gah đêl đei mơn, gah minh tơdrong, lăm đon tơchĕng noh tơchĕng rŏ kơ tơnen dêh, mă khan thoi ei, oei pơkeh tơdrong kiơ̆ kơ đon tơchĕng kơdih lăm tơdrong oei đei tơdrong glăi. kơplah gơnang kơ tơdrong tơchĕng thoi noh lu bơ̆n ngăl ‘bônh kơ pơjah pơjăng ưh kơ tôch.
Bơngai lui kăl kơ krao khan hăm tơpang ti păng jơhngơ̆m ‘l.ơ̆ng rơgoh, hăm tơdrong lu bơ̆n hlôh ưh kơ lei lăi, kư̆m ‘nĕ kơ pơkeh tơdrong hăm jơhngơ̆m blĕk ơh păng pơjah pơjăng, mă-lei hăm jơhngơ̆m krao khan.
Kơkuh kơ Ih ơ Kră Yang, apinh Ih tơgŭm inh ‘blŏk hơdrol hloh kơ tôm tơdrong. athei adrin krao khan, apĭnh hăm tơpang ti păng jơhngơ̆m ‘lơ̆ng rơgoh wă kơ Kră Yang gơh mơ̆ng păng tơl tơwih, krao khan yua anăn Kră Yang Yêsu Krist, Amen.
Lu bơ̆n hăm đei krao khan hăm tơpang ti păng jơhngơ̆m ‘lơ̆ng rơgoh?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Tơdrong Jang 3
Kênh Youtube BHKTHN:
