Klei Aê Diê Blŭ: I Y-Timôthê 2:1-8
Êlan kliăng: “Snăn hlăm jih jang anôk kâo čiăng kơ phung êkei wah lač, yơr kngan doh jăk amâo mâo klei ăl amâodah klei bi mneh msao ôh” (I Y-Timôthê 2:8)
Klei êmuh ksiêm mĭn: Wah lač yơr kngan doh jăk si čiăng lač? Ya ngă Khua ƀĭng kna Y-Pôl mtă kơ phung êkei đăm bi ăl amâodah bi mneh msao ôh? Si klei hriăm bi hriăm drei wah lač hŏng dua nah kngan leh anăn hŏng ai tiê?
Ti tluôn klei mtă mdê kơ Y-Timôthê brei bi blah klei bi blah jăk leh anăn djă pioh ai tiê kpă jăk (I Y-Timôthê 1:18-20), Khua ƀĭng kna Y-Pôl lŏ blŭ djŏ kơ klei wah lač, ƀiădah phung ñu čiăng blŭ ară anei hin jing “kơ phung êkei”. Hlăm I Y-Timôthê 2:8, Khua ƀĭng kna Y-Pôl mtô klei brei phung êkei ngă leh anăn klei amâo dưi ngă ôh.
Êlâo hĭn, ñu blŭ kơ klei čiăng kơ digơ̆ ngă hŏng pruê̆ “Snăn hlăm jih jang anôk kâo čiăng kơ phung êkei wah lač, yơr kngan doh jăk”. Phung Sang Aê Diê ênuk tal êlâo tŭ klei bi hmăi mơ̆ng knhuah phung Yuđa wah lač, yơr dua nah kngan leh anăn mđang dua plă kngan phă adiê. Tinei, Khua ƀĭng kna Y-Pôl thiăm boh blŭ “doh jăk” hlăm klei ñu mtă. Ya ngă? Pô čih Klei Mmuñ Hđăp tuôm êmuh snei: “Hlei dưi dôk dơ̆ng hlăm anôk doh jăk Ñu?” Leh anăn klei wah lač snei: “Pô mâo kngan leh anăn ai tiê doh” (Klei Mmuñ Hđăp 24:3-4). Kngan yơr čiăng wah lač jing kngan amâo bi čhŏ hŏng klei djă amâodah ngă bruă jhat ôh, tơdah amâo djŏ snăn, klei pô anăn wah lač jing hơăi mang. Phung êkei jing phung kơ bruă, kyuanăn, tơdah ngă sa mta bruă, brei phung êkei ksiêm kơ bruă ñu ngă jing doh jăk ti anăp Aê Diê mơ̆ amâodah hơăi, bi gun klei wah lač leh anăn klei bi mguôp ñu pô hŏng Aê Diê mơ̆.
Mta tal dua Khua ƀĭng kna Y-Pôl čiăng mtă jing wah lač hrô kơ klei bi mneh msao, tinei ñu ăt dôk blŭ djŏ kơ klei dôk dơ̆ng hŏng jih jang mnuih, boh nik nak hŏng phung khua kiă kriê (êlan 1-7). Lu blư̆ hdruôm hră Klei Aê Diê Blŭ blŭ bi mă kơ klei – klei pap brei drei srăng mă tŭ hŏng klei drei pap brei kơ pô mkăn. Klei ăl, klei phĭ jing klei bi knăl kơ sa čô ka tuôm djiêl ênŭm ôh klei Khua Yang pap brei. Tơdah thâo kơ drei pô amâo jing mnuih klă ênŭm ôh leh anăn čiăng snăk kơ Khua Yang pap brei, sĭt nik drei srăng thâo pap hĭn kơ klei kƀah pô mkăn, kơ phung khua kiă kriê ala čar.
Tal tlâo, Khua ƀĭng kna Y-Pôl mtă brei phung êkei wah lač, đăm čhĭn kơ klei bi mneh msao amâodah bi tăng ôh. Phung êkei khăng hdĭp hŏng klei thâo săng, phung mniê khăng hdĭp hŏng klei bi kdjhưng ai. Tĭng kơ sa mta klei, klei mĭn bi mgăl jing klei mĭn dlăng msĕ si kjăp, ƀiădah tơdah mgaih mkra djăp mta klei hŏng klei mĭn bi mgăl sơăi klei anăn jing drei jao drei pô kơ atur klei thâo săng mâo kdriêl leh anăn srăng mâo klei čhuai, tơdah yua klei mĭn anei ênưih snăk drei lĕ hlăm klei bi tăng mgăl nanao amâo lŏ thâo ruê̆ ôh.
Brei phung đăo kơ Krist wah lač hŏng dua nah kngan leh anăn hŏng ai tiê doh. Tơdah mâo klei drei amâo bi tŭ ôh hdơ̆ng drei, đăm mgaih mkra hŏng klei ăl leh anăn bi msao ôh, ƀiădah mgaih mkra bĕ hŏng klei wah lač.
Drei wah lač hŏng dua nah kngan leh anăn hŏng ai tiê doh mơ̆?
Wah lač: Ơ Khua Yang, brei kâo hdơr êgao hĭn kơ jih jang klei, brei kâo wah lač, kwưh akâo hŏng dua nah ngan leh anăn hŏng ai tiê doh čiăng kơ Ih hmư̆ leh anăn lŏ wĭt lač. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
