Klei Aê Diê Blŭ: Y‑Êsai 12:1-6
Êlan kliăng: “Mmuñ bi mni bĕ kơ Yêhôwa kyuadah Ñu ngă leh lu klei yuôm bhăn; brei arăng thâo kral klei anăn tar ƀar lăn ala” (Y‑Êsai 12:5)
Klei êmuh ksiêm mĭn: Ya klei Aê Diê ngă leh kơ phung ƀuôn sang Ñu? Ya klei trăn Klei Aê Diê Blŭ anei iêô mthưr brei phung ƀuôn sang Aê Diê ngă? Si ngă Aê Diê năng kơ arăng mpŭ mni? Si drei mpŭ mni kơ Khua Yang hlăm knhuah hdĭp drei grăp hruê?
Y‑Êsai kdrêč 12 jing sa klei mmuñ phung ƀuôn sang Israel bi mni leh anăn hơêč hmưi kơ Aê Diê hlăk diñu mă tŭ klei hưn êlâo kơ Ƀuôn Ala Mtao hlŏng lar Yang Mêsi leh anăn klei lŏ mkŏ mjing phung ƀuôn sang Aê Diê (kdrêč 11). Klei blŭ “hlăm hruê anăn” čiăng lač kơ hruê Aê Diê srăng bi kƀĭn mguôp phung ƀuôn sang Israel ti gŭ klei kiă kriê kpă ênô mơ̆ng Khua Yang Yêsu Krist. Hlăk anăn, jih jang phung ƀuôn sang Israel srăng kmhal kơ klei soh leh anăn Khua Yang srăng pap brei. Diñu srăng myơr klei bi mni Khua Yang kyuadah Ñu mă mđuĕ hĕ klei Ñu ngêñ kơ diñu (êlan 1).
Khua pô hưn êlâo Y‑Êsai lŏ mñă pruê̆ blŭ klă “Nĕ anei, Aê Diê jing Pô bi mtlaih kâo” (êlan 2) kñăm akŏ phŭn kơ kdrêč anei jing klei bi mtlaih. Hŏng klei Ñu ƀuăn ngă klei bi tui, phung ƀuôn sang Israel srăng “knang leh anăn amâo huĭ ôh” kyuadah Ñu jing “klei ktang kâo leh anăn klei mmuñ kâo” (êlan 2). Anei ăt jing klei lŏ wĭt mmuñ hlăm klei mmuñ phung Israel hơêč hmưi kơ Aê Diê, hlăk diñu kbiă đuĕ mơ̆ng čar Êjip (Klei Kbiă 15:2), leh anăn hlăm klei mmuñ hlăk Y‑Êsra lŏ myơr Sang Yang kơ Aê Diê tal dua (Klei Mmuñ Hđăp 118:14).
Khua pô hưn êlâo Y‑Êsai iêu mthưr phung ƀuôn sang Israel “Hŏng klei hơ̆k mơak ih srăng djăt êa mơ̆ng kbăng êa klei bi mtlaih” (êlan 3) lač kơ klei diñu dưi dưn klei jăk mơak mơ̆ng Aê Diê hŏng Yang Mêsi. Tui tluôn, ñu mtă mtăn diñu “Bi mni bĕ kơ Yêhôwa, iêô wah lač kơ Anăn Ñu; yăl dliê bĕ bruă Ñu ngă ti krah phung găp djuê mnuih; hưn bĕ Anăn Yêhôwa mâo klei mpŭ!” (êlan 4). Anei jing bruă phung ƀuôn sang Israel mbĭt hŏng jih jang phung anak Aê Diê hruê anei. Brei drei bi mni kơ Aê Diê nanao leh anăn hưn bi lar kơ jih jang mnuih thâo kơ Yang Krist drei, jing Pô năng mpŭ mni leh anăn hơêč hmưi. Ñu ngă leh “lu klei yuôm bhăn” (êlan 5). Khua Yang bi êdah leh klei jăk Ñu hŏng klei bi mtlaih Khua Yang brei kơ jih jang mnuih. Knŏng sa mta phŭn knhal anăn ăt năng leh kơ drei hơêč hmưi kơ Khua Yang leh anăn hưn brei tar lăn ala thâo kral Ñu.
Kdrêč anei bi ruê̆ hŏng klei iêô mthưr phung buôn sang Aê Diê lŏ sa blư̆, “Ur kraih leh anăn ur hơ̆k bĕ” kyuadah Khua Yang “Pô Doh Jăk Isael jing prŏng ti krah diih” leh anăn năng mpŭ mni (êlan 6). Anei ăt jing klei iêô mthưr pioh kơ grăp čô phung đăo hruê anei mơh. Brei drei thâo hdơr knga kơ Khua Yang klei bi mtlaih Ñu pioh brei leh kơ drei leh anăn hŏng asăp kraih ktang hơêč hmưi kơ Khua Yang. Hlăm klei hdĭp grăp hruê, brei drei bi êdah klei hdơr knga kơ Khua Yang hŏng klei hưn kơ arăng thâo kơ klei Khua Yang bi mtlaih leh anăn Ñu mkăp hmiêt brei klei bi mtlaih kơ jih jang hlei pô kmhal kơ klei soh nao kơ Ñu.
Si ngă klei hdĭp drei jing sa klei mmuñ bi mni hơêč hmưi kơ Khua Yang leh mơ̆?
Wah lač: Ơ Khua Yang, akâo Ih đru kâo bi êdah klei thâo hdơr knga bi mni Khua Yang kyua klei bi mtlaih Ih pioh leh kơ kâo leh anăn kăp mmuñ bi mni kơ Ih hŏng knhuah hdĭp kâo kyuadah knŏng hjăn Ih yơh jing Pô năng hơêč hmưi.
Dlăng Klei Aê Diê Blŭ hlăm tlâo thŭn: Y‑Êsai 61:1–62:12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
