Yaxayas 12:1-6
Nqe cim:
“Cia li hu nkauj qhuas Vajtswv vim Nws tau ua tej txujci tseemceeb. Cia kom lub ntiajteb tau hnov zaj no” (Yaxayas 12:5).
Lus nug rau sawvdaws xav:
- Vajtswv tau ua dabtsi pub rau Nws haiv neeg?
- Ntu Vajluskub no nqua hu Vajtswv haiv neeg ua dabtsi?
- Vim li cas Vajtswv yog tus tsimnyog qhuas?
- Peb ua lub neej txhua hnub qhuas thiab txhawb nqa Vajtswv li cas?
Yaxayas tshooj 12 yog haiv neeg Yudais ib zaj lus qhuas Vajtswv uas thaum lawv tau Vajtswv coglus tseg txog tus Mexiyas lub tebchaws pub rau lawv thiab tau Vajtswv rov txhim kho lawv dua (tshooj 11). Lo lus “hnub ntawd” yog hais txog hnub uas Vajtswv rov sau Nws haiv neeg los rau hauv Yexus Khetos txojkev tswjkav ncaj ncees. Thaum ntawd Vajtswv haiv neeg txhua tus yuav hloov siab rau kev txhaum thiab tau Vajtswv zam lawv lub txim txhaum (nqe 1).
Tus cev lus Yaxayas rov hais txog lo lus “Vajtswv yog kuv tus Cawmseej” hauv (nqe 2) yog xav hais txog lub ntsiab hauv tshooj ntawd yog kev cawm dim. Los ntawm tus Tswv lo lus cogtseg pab cawm, haiv neeg Yudais yuav: “cia siab rau Nws thiab tsis muaj kev ntshai” vim “tus Tswv yog kuv lub zog kuv thiaj hu nkauj qhuas Nws” (nqe 2). Cov lus no kuj yog lus qhuas Vajtswv ib yam li haiv neeg Yudais cov lus qhuas thaum lawv tawm nram Iziv tebchaws los (Khiavdim 15:2), thiab zoo li Exalas cov lus qhuas Vajtswv thaum rov muab lub Tuamtsev fij rau Vajtswv zaum ob (Ntawv Nkauj 118:14).
Tus cev lus Yaxayas hais tias haiv neeg Yudais yuav muaj kev zoo siab “Cov neeg nqhis dej zoo siab heev rau cov dej ntshiab li cas, Vajtswv haiv neeg zoo siab heev thaum Nws cawm lawv dim li ntawd” (nqe 3), qhov ntawd xav hais txog kev zoo siab thaum tau txais Vajtswv lub tebchaws hauv tus Mexiyas. Ntxiv mus, Yaxayas ntuas sawvdaws hais tias: “Ua tus Tswv tsaug! Hu Nws los pab nej los mas! Qhia tej uas Nws tau ua tas los rau txhua haiv neeg” (nqe 4). Tej yam hais no yog haiv neeg Yudais thiab peb cov uas yog Vajtswv haiv neeg li feemxyuam. Peb yuav tsum ua Vajtswv tsaug tsis tseg thiab qhia txog tus Cawmseej Yexus uas tsimnyog qhuas rau txhua tus paub. Vajtswv yog tus “ua tau tej txujci tseemceeb” (nqe 5). Vajtswv ua siab ntev rau tibneeg los ntawm qhov uas Nws pub kev cawm dim rau tibneeg txhua tus. Saib ntawm qhov uas Vajtswv pub kev cawm dim rau tibneeg xwb, twb tsimnyog peb qhuas Vajtswv thiab qhia kom tibneeg hnov txog Nws zaj lawm.
Thaum xaus tshooj no kuj muaj lus nqua hu Vajtswv haiv neeg hais tias,“Nej txhua tus uas nyob hauv nroog Xi-oos cia li qw thiab hu nkauj” vim “Cov Yixalayees tus Vajtswv Dawbhuv uas yog tus muaj fwjchim loj kawg nkaus, Nws nyob nrog nraim Nws haiv neeg”(nqe 6). Cov lus nqua hu no kuj siv rau peb cov uas yog Vajtswv menyuam niaj hnub nimno thiab. Peb yuav tsum nco ntsoov Vajtswv kev cawm peb dim lawm thiab cia li hu nkauj qhuas Vajtswv. Hauv peb lub neej txhua hnub, peb yuav tsum ua tej yam qhia tshwm kev nco tus Tswv txiaj ntsig los ntawm qhov uas qhia rau lwm tus paub txog tus Tswv txojkev cawmdim thiab Nws txaus siab pub kev cawmdim rau txhua tus uas los cuag Nws.
Thov Vajtswv,
Vajtswv, thov pab nyuam yaus ua lub neej qhia tshwm Koj kev pab cawm nyuam yaus lawm, thiab npaj nroos hu nkauj qhuas Koj tib leeg xwb, vim Koj yog tus tsimnyog qhuas. Amees.
Peb lub neej puas yog ib zaj nkauj qhuas Vajtswv, li tsimnyog yuav tsum muaj lawm?
Nyeem Vajluskub hauv peb lub xyoo: Y 61:1-62:12
Kênh Youtube BHKTHN:
