Klei Aê Diê Blŭ: Rôm 10:1-4
Êlan kliăng: “Kyuadah Krist bi ruê̆ klei bhiăn, čiăng bi mâo klei kpă ênô kơ jih jang hlei pô đăo.” (Rôm 10:4)
Klei êmuh ksiêm mĭn: Ya klei ngă kơ Khua ƀĭng kna bi mĭn kơ phung ƀuôn sang Israel? Ya klei ñu ngă leh čiăng đru digơ̆ thâo săng djŏ kơ klei kpă ênô? Ya drei ngă čiăng đru phung mkăn mâo klei bi mtlaih kyua klei đăo?
Khua ƀĭng kna Y-Pôl bi êdah klei rŭng răng hlăm ai tiê, čang hmăng phung ƀuôn sang Israel mâo klei bi mtlaih. Klei anei brei ƀuh phung ƀuôn sang Aê Diê ruah ăt ka mâo ôh klei bi mtlaih tơdah diñu tui duah nanao klei kpă ênô hŏng klei djă pioh klei bhiăn. Khua ƀĭng kna Y-Pôl thâo leh klei soh čhuai anei hlăm klei đăo pô hđăp, ară anei ñu jih ai tiê đru digơ̆ thâo klei sĭt nik.
Êlâo hĭn ñu wah lač brei kơ digơ̆ (êlan 1). Ñu akâo kơ Aê Diê mơak hmư̆ leh anăn bi mčah ai tiê khăng. Leh anăn, ñu bi mni kơ ai tiê digơ̆ hur har kơ Aê Diê. Digơ̆ jih ai tiê tui tiŏ klei kpă ênô, hlue ngă djŏ klei bhiăn kkuh mpŭ leh anăn jih ai tiê hriăm klei bhiăn Aê Diê. Khădah snăn, ñu ăt lač mơh klei sĭt mơ̆ng ai tiê hur har anei kyua amâo djŏ hlue si klei thâo ôh (êlan 2). Lŏ lač jing, klei hur har ƀiădah amâo mâo ôh klei thâo săng djŏ srăng atăt diñu truh kơ klei kñăm soh čhuai leh anăn kyua snăn, jih jang klei gĭr srăng jing hơăi mang.
Ñu mblang klă hĭn jing phung ƀuôn sang Israel soh čhuai leh amâo thâo ôh klei kpă ênô Aê Diê, anăn jing klei kpă ênô mơ̆ng klei đăo, anăn diñu duah hdră mblang, mkŏ mjing klei kpă ênô hlue si klei mĭn pô hŏng hdră djă pioh klei bhiăn čiăng dưi yap jing kpă ênô. Diñu amâo gưt hlue si hdră Aê Diê ôh čiăngdưi yap jing kpă ênô (êlan 3). Khua ƀĭng kna Y-Pôl amâo phat kđi diñu ôh kơ klei tui tiŏ klei bhiăn ƀiădah ñu hưn mdah leh sa klei bi mguôp yuôm bhăn snăk anăn jing: “Kyuadah Krist bi ruê̆ klei bhiăn, čiăng bi mâo klei kpă ênô kơ jih jang hlei pô đăo” (êlan 4). Lač mdê, klei bhiăn leh anăn klei hưn êlâo dưi jing sĭt mơ̆ng klei hdĭp Khua Yang Yêsu Pô Bi Mtlaih. Ñu hriê čiăng ngă kơ klei bhiăn jing kluôm ênŭm (Y-Mathiơ 5:17). Bruă klam klei bhiăn jing brei anak mnuih ƀuh klei soh pô čiăng thâo kơ klei čiăng dưi mâo Aê Diê pap brei. Khua Yang Yêsu jing hdră msir leh anăn jing hdră msir sa anăn kơ klei čiăng anei.
Khua ƀĭng kna Y-Pôl mñă klă: Klei kpă ênô dưi mâo kyua klei pap Aê Diê brei kơ drei hlăm klei đăo. Khua Yang Yêsu mâo jih jang klei dưi čiăng yap kpă ênô kơ grăp čô đăo kơ Ñu mơ̆ng klei Khua Yang djiê leh ti kyâo bi kal čiăng bi tui anak mnuih. Klei anei jing hlăm klei đăo amâo djŏ kyua bruă ngă ôh. Hruê anei lu mnuih soh čhuai duah klei bi mtlaih hŏng bruă ngă jăk đru kơ pô mkăn. Knhal tuč si klei hdĭp diñu srăng jing? Akâo kơ Aê Diê đru drei thâo gĭr wah lač, bi êdah klei khăp leh anăn hưn Klei Mrâo Mrang Jăk Khua Yang Yêsu čiăng diñu dưi mâo klei bi mtlaih kyua klei đăo.
Drei dôk ktrŏ ai tiê kơ klei bi mtlaih kơ hlei pô leh anăn si drei đru diñu?
Wah lač: Ơ Khua Yang, kâo bi mni kơ Ih brei leh kơ kâo klei bi mtlaih mơ̆ng klei đăo kơ Khua Yang Yêsu. Akâo kơ Ih đru kâo thâo atăt ba mngăt phung Ih dưm riêng gah kâo leh anăn yua kâo čiăng atăt digơ̆ wĭt kơ Khua Yang. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Rôm 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
