Loos 10:1-4
Nqe cim:
“Rau qhov Yexus Khetos twb los ua rau txoj kevcai ntawd tiav lawm, Vajtswv thiaj suav hais tias txhua tus uas ntseeg yog neeg ncaj ncees.” (Loos 10:4)
Lug nug rau sawvdaws xav:
– Yam dabtsi ua rau Timthawj Paulus hnyav siab txog haivneeg Yixalayees?
– Nws tau ua dabtsi los pab lawv paub tseeb txog qhov uas tau suav tias ncaj ncees?
– Peb ua dabtsi los pab lwm tus txais tau txojkev cawmdim los ntawm kev ntseeg?
Timthawj Paulus qhia tshwm nws txojkev mob siab, kev ntshaw kom nws haivneeg Yixalayees tau cawmdim. Qhov no qhia pom hais tias tus Tswv haivneeg yuav tsis tau txais txojkev cawmdim yog hais tias lawv pheej nrhiav kev ncaj ncees los ntawm kev ua raws txoj kevcai. Timthawj Paulus twb ntsib qhov yuamkev no nyob hauv nws txojkev ntseeg qub, nimno nws tas siab tas ntsws pab lawv zeem paub qhov tseeb.
Qhov xubthawj, timthawj Paulus thov Vajtswv pab lawv (nqe 1). Nws thov tus Tswv teb nws tej lus thiab hloov cov Yixalayees lub siab tawv los ua siab mos siab muag. Txuas ntxiv, nws qhuas txog lawv txojkev muab siab npuab Vajtswv. Lawv tau tas siab nrhiav txojkev ncaj ncees, xyuamxim ua raws tej kevcai pehawm thiab rau siab ntso kawm tus Tswv tej kevcai. Tiamsis, timthawj Paulus kuj hais ncaj qha hais tias lawv kub siab, los lawv tsis paub qhov tseeb (nqe 2). Hais tau hais tias, kub siab tiamsis tsis paub qhov tseeb yuav coj lawv mus rau tej homphiaj yuamkev thiab thaum zoo li ntawd, tej uas lawv siv siv zog ua yuav tsis muaj qabhau dabtsi li.
Timthawj Paulus hais meej ntxiv hais tias, haivneeg Yixalayees raug yuamkev lawm, lawv tsis zeem paub Vajtswv txojkev ncaj ncees dhau ntawm txojkev ntseeg, lawv thiaj nrhiav kev ncaj ncees raws tus kheej siabnyiam dhau ntawm kev coj raws txojkev cai kom ua tau neeg ncaj ncees. Lawv tsis ua raws tus Tswv txojkev kom tau kev ncaj ncees (nqe 3). Timthawj Paulus tsis txiav txim rau lawv txog qhov uas lawv coj raws txoj kevcai tiamsis nws hais tawm ib qhov kev sib txuas tseem ceeb heev uas yog: “…Yexus Khetos twb los ua rau txoj kevcai ntawd tiav lawm” (nqe 4). Hais tau hais tias, txoj kevcai thiab tej lus cev tseg tau muaj tiav nyob hauv Cawmseej Yexus lawm. Nws los hauv ntiajteb yog los ua tiav txoj kevcai (Mathais 5:17). Lub homphiaj ntawm txoj kevcai yog qhia rau tibneeg pom tus kheej tej kev txhaum, kom lawv zeem paub kev cheemtsum tau tus Tswv zam txim. Tswv Yexus yog txoj haukev thiab yog txoj kawg pab kom lawv tau tus Tswv zam txim.
Timthawj Paulus hais meej hais tias: Peb tau kev ncaj ncees twb yog vim tus Tswv txojkev hlub muab pub rau peb dhau ntawm txojkev ntseeg. Tswv Yexus muaj cai ua rau cov uas ntseeg Nws tau kev ncaj ncees dhau ntawm Nws txojkev tuag saum tus ntoo khaublig. Qhov no yog hais txog sab kev ntseeg, tsis yog kev ua haujlwm. Niaj hnub nim no, muaj coob leej ntau tug yuamkev mus nrhiav txojkev cawmdim dhau ntawm nws tej haujlwm ua zoo. Thaum tas simneej lawv yuav mus qhov twg? Thov tus Tswv pub rau peb ua siab ntev thov Vajtswv pab, qhia tshwm kev hlub thiab ua timkhawv txog Tswv Yexus Txojmoo Zoo kom lawv txais tau txojkev cawmdim los ntawm kev ntseeg.
Thov Vajtswv,
Tus Tswv, nyuam yaus ua Koj tsaug vim Koj tau pub rau nyuam yaus tau txojkev cawmdim los ntawm kev ntseeg Tswv Yexus. Thov tus Tswv pab nyuam yaus paub hlub cov neeg ibncig tus ntsujplig thiab siv nyuam yaus coj tau lawv los cuag Koj. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb tabtom hnyav siab txog txojkev cawmdim rau leejtwg thiab peb pab lawv licas?
Nyeem Vajluskub hauv peb lub xyoos: Loos 9
Kênh Youtube BHKTHN:
