Klei Aê Diê Blŭ: Klei Mtô Mñă Klei Bhiăn 7:1-6
Êlan kliăng:
“Kyuadah ih jing sa phung ƀuôn sang doh jăk kơ Yêhôwa Aê Diê diih; Yêhôwa Aê Diê ih ruah ih leh čiăng kơ diih jing sa phung ƀuôn sang jing dŏ ñu, kbiă mơ̆ng jih jang phung ƀuôn sang ti rŏng lăn ala” (Klei Mtô Mñă Klei Bhiăn 7:6).
Klei êmuh ksiêm mĭn: Ya jing anôk mdưm sĭt êmĭt kơ phung ƀuôn sang Israel, Y-Môis đru diñu brei thâo săng? Ya ngă Aê Diê iêu kơ phung ƀuôn sang Israel jing phung ƀuôn sang doh jăk Ñu? Si čiăng mblang klei anei kơ phung ƀuôn sang Aê Diê? Ya klei mñă bi hdơr kơ drei mơ̆ng klei hriăm anei?
Hlăm đơ dŭm kdrêč tal êlâo hdruôm hră Klei Mtô Mñă Klei Bhiăn, Y-Môis khăng mtô mblang kơ phung ƀuôn sang Israel thâo kơ hlei Aê Diê jing hŏng diñu, kñăm čiăng đru diñu brei thâo si hdĭp hŏng Aê Diê. Ƀiădah hlăm kdrêč anei, Y-Môis mtô mblang kơ diñu brei thâo klă hlei diñu jing leh anăn ya klei Aê Diê čiăng hmăng mơ̆ng diñu. Dưi lač snei, hdră Aê Diê pioh kơ phung ƀuôn sang Israel jing klei ruah diñu brei jing sa phung ƀuôn sang doh jăk leh anăn jing sa ngăn dưn pioh hjăn kơ Ñu. Y-Môis amâo bi mđĭ ai diñu brei gĭr ktĭr čiăng dưi jing phung ƀuôn sang doh jăk Aê Diê ôh, ƀiădah ñu lač brei kơ diñu thâo, diñu yơh jing phung ƀuôn sang doh jăk Aê Diê, Aê Diê Pô yơh ruah leh ƀuôn sang diñu mơ̆ng jih jang phung ƀuôn sang ti rŏng lăn ala brei jing sa phung ƀuôn sang jing dŏ pioh hjăn kơ Aê Diê (êlan 6).
Snăn, klei phung buôn sang Israel jing sa phung ƀuôn sang doh jăk, ƀuôn sang pioh hjăn kơ Aê Diê jing kluôm dhuôm mơ̆ng Aê Diê pô kruak čua kyuadah mâo klei bi mguôp sĭt êmĭt plah wah Aê Diê hŏng phung ƀuôn sang Ñu. Anôk mdưm jing phung ƀuôn sang doh jăk jing sa anôk mdưm ti dlông yuôm bhăn Aê Diê pioh brei kơ phung ƀuôn sang Israel, amâo djŏ mâo hŏng klei gĭr ktĭr mơ̆ng mnuih ôh, hĭn mơh amâo djŏ mâo mơ̆ng klei bi mlih dua nah tĭng ôh. Sĭt yơh kyuadah jing phung ƀuôn sang doh jăk Aê Diê, kyuanăn ƀuôn sang Aê Diê mâo bruă čuăn brei ngă hĕ bruă klam pioh kơ diñu, ƀiădah amâo djŏ ôh anôk mdưm jing phung ƀuôn sang doh jăk dưi bi mlih hŏng klei gĭr diñu pô. Kyuanăn yơh dưi mâo klei Aê Diê ruah brei jing phung ƀuôn sang doh jăk kơ Ñu jing sa klei kdrưh mơak êdimi kơ phung ƀuôn sang Israel.
Tơdah dlăng wĭt kơ klei hdĭp drei pô, ƀuh kơ pô jing sa čô mnuih soh amâo mâo klei năng ôh dôk ti anăp Aê Diê, ƀiădah drei ăt mâo klei pap brei jing phung ƀuôn sang doh jăk Ñu (I Y-Pêtrôs 2:9). Klei hriăm hruê anei mñă bi hdơr kơ drei snei, phung đăo jing “phung ƀuôn sang doh jăk” amâo djŏ kbiă mơ̆ng klei gĭr drei pô ôh, ƀiădah hŏng bruă Aê Diê ngă leh kơ drei hlăm Yang Krist kyua hŏng klei Ñu pap. Khua ƀĭng kna Y-Pêtrôs brei thâo: “Mphŭn dô diih amâo jing sa phung ƀuôn sang ôh, ƀiădah ară anei diih jing leh phung ƀuôn sang Aê Diê. Mphŭn dô diih amâo tuôm mă tŭ ôh klei Aê Diê pap, ƀiădah ară anei diih mă tŭ leh klei pap anăn.” (I-Y-Pêtrôs 2:10). Leh anăn brei drei hdơr mơh, leh dưi jing anak Aê Diê, dưi jing phung ƀuôn sang doh jăk Ñu, amâo djŏ ôh drei ngă tui si pô čiăng. Ƀiădah brei thâo săng kơ anôk mdưm ƀuôn sang doh jăk Aê Diê kăp hdĭp kpă ênô, doh jăk, năng hŏng anôk mdưm yuôm bhăn anăn.
Si ngă drei dôk hdĭp năng hŏng anôk mdưm jing ƀuôn sang doh jăk Aê Diê mơ̆?
Ơ Khua Yang, bi mni kơ Ih kyua anôk mdưm ƀuôn sang doh jăk yuôm bhăn Ih brei leh kơ kâo. Akâo kơ Ih đru kâo hdĭp năng hŏng klei jing ƀuôn sang doh jăk Aê Diê, čiăng kơ lu mnuih dưi thâo kral Khua Yang găn hŏng knhuah hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
