Klei Aê Diê Blŭ: Y‑Yêrêmi 38:17‑23
Êlan kliăng: “Đăm lĕ hlăm klei mplư: “Phung mah jiăng jhat bi rai knuih jăk” (I Kôrantô 15:33).
Klei êmuh ksiêm mĭn: Ya klei Khua pô hưn êlâo Y‑Yêrêmi mñă wĭt hŏng Mtao Sêđêkia? Tơdah amâo gưt asăp, ya klei jhat mtao srăng tŭ? Hlei jing “phung mah jiăng mtao”? Ya klei diñu ngă leh ƀuh mtao lĕ hlăm klei diñu mplư? Si ngă drei ngă čiăng dôk kjăp gưt asăp Aê Diê sĭt tlă anăp hŏng klei truh?
Leh mñă wĭt klei Yêhôwa lač, tơdah tŭ klei amâo dưi hŏng phung lĭng kahan Ƀaƀilôn snăn mtao srăng hdĭp leh anăn ƀuôn prŏng amâo rai ôh, bi tơdah mtao amâo ngă snăn snăn mtao hŏng jih ƀuôn prŏng srăng amâo tlaih ôh mơ̆ng klei truh, Khua pô hưn êlâo Y‑Yêrêmi ƀuh mtao dôk ngĭ ngư̆ kyua huĭ luč knuih tơdah tŭ klei amâo dưi (êlan 19), ñu mđĭ ai mtao hŏng klei bi mklă, “Arăng amâo srăng jao ih kơ diñu ôh. Gưt bĕ ară anei asăp Yêhôwa tui si klei kâo lač kơ ih, leh anăn klei jăk srăng truh kơ ih, leh anăn arăng srăng pioh ih dôk hdĭp” (êlan 20). Ñu lač thiăm, tơdah mtao huĭ luč knuih ƀiădah amâo jao ôh snăn srăng lĕ hlăm klei hêñ hĭn, jih mô̆ anak mtao leh anăn phung mniê hlăm sang mtao arăng srăng jao kơ phung Kaldê. Hlăm ênuk anăn, lui arăng mă hĕ mô̆ anak jing sa klei hêñ snăk mơ̆ng phung mtao leh anăn khua kahan tŭ klei amâo dưi hlăm klei bi blah.
Khua pô hưn êlâo Y‑Yêrêmi ăt brei Mtao Sêdêkia thâo klei Yêhôwa hưn kơ ñu phung mniê hlăm sang mtao arăng srăng mă leh anăn srăng lač kơ mtao: “Phung mah jiăng ih knang mplư ih leh, leh anăn dưi hŏng ih leh; ară anei jơ̆ng ih kdlŭt leh hlăm lŭ, phung mah jiăng ih lui ih leh” ( êlan 22b). Boh blŭ “Phung mah jiăng ih” lač kơ phung khua pô hưn êlâo mgưt, diñu hưn leh klei mgưt čiăng mplư mtao đăm jao ôh Ƀaƀilôn, ară anei diñu hơ̆k mơak, leh anăn hlăk ƀuh mtao mâo klei truh, jơ̆ng mtao dluh êlam hlăm klei mplư anăn snăn diñu tlĕ đuê̆, amâo lŏ jing mah jiăng jĕ giăm hŏng mtao ôh. Drei ƀuh Aê Diê sĭt nik bŏ hŏng klei pap, Ñu yua Khua pô hưn êlâo Y‑Yêrêmi čiăng mtă kơ Mtao Sêdêkia lu blư̆, khădah ai tiê ñu amâo đăo prŏng snăk. Mtao amâo đăo ôh leh anăn kăn gưt asăp Aê Diê mtă rei, ƀiădah lŏ hmư̆ klei phung khua pô hưn êlâo mgưt, dlăng digơ̆ jing ƀĭng găp pô năng đăo knang.
Sĭt tlă anăp hŏng klei truh, klă sĭt drei ăt srăng mâo lu klei kčĕ mơ̆ng ƀĭng găp leh anăn phung riêng gah. Drei čiăng klei mtô leh anăn kcĕ mơ̆ng ayŏng adei, ƀĭng găp ƀiădah ăt brei hdơr klei Khua ƀĭng kna Y‑Pôl mñă: “Đăm lĕ hlăm klei mplư: “Phung mah jiăng jhat bi rai knuih jăk” (I Kôrantô 15:33). Brei drei dlăng, hriăm Klei Aê Diê Blŭ grăp hruê čiăng thâo klă klei Aê Diê čiăng leh anăn ăt mâo Aê Diê brei klei thâo mĭn thâo kral klei kčĕ mơ̆ng ƀĭng găp djŏ hŏng Klei Aê Diê Blŭ mơ̆ amâodah hơăi. Đăm ôh msĕ si Mtao Sêdêkia, kyua huĭ hyưt anăn mmăt tĭt hmư̆ hlue si klei kčĕ mơ̆ng phung găp jhat leh anăn klam klei truh jhat ênguôt hnĭng snăk.
Drei thâo răng ksiêm dlăng klei ayŏng adei, ƀĭng găp kčĕ hŏng Klei Aê Diê Blŭ êlâo kơ bi mklă mơ̆?
Wah lač: Ơ Aê Diê khăp hơiêng! Akâo kơ Ih đru kâo sĭt suôr hŏng Klei Aê Diê Blŭ grăp hruê čiăng kâo mâo klei thâo mĭn leh anăn knga hmư̆ klă Klei Aê Diê bi hriăm, čiăng kơ kâo amâo lĕ hlăm klei phung găp jhat mplư ôh.
Dlăng klei Aê Diê Blŭ hlăm tlâo thŭn: Y‑Êsai 45:18‑46:13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
