Klei Aê Diê Blŭ: Klei Mtô Mñă Klei Bhiăn 20:10-20.
Êlan kliăng: “Tơdah diih nao giăm sa boh ƀuôn čiăng bi blah hŏng ƀuôn anăn, iêô mthưr kơ klei êđăp ênang. Tơdah ƀuôn anăn lŏ wĭt lač kơ diih jing klei êđăp ênang leh anăn pŏk ƀăng jang kơ diih, snăn jih jang phung ƀuôn sang dôk hlăm ƀuôn anăn srăng tuh jia leh anăn mă bruă kơ diih.” (Klei Mtô Mñă Klei Bhiăn 20:10-11)
Klei êmuh ksiêm mĭn: Ya klei Y-Môis mtă brei phung Israel ngă hŏng phung mnuih ƀuôn sang êlâo kơ wang blah sa boh ƀuôn? Hlăm ya mta klei srăng yua klei mtrŭn knŏng bi mdjiê mă đơ phung êkei hlăm ƀuôn wang blah? Ya klei hriăm drei mâo mơ̆ng dŭm klei mtrŭn anei?
Hlăm trăn anei, Y-Môis ktrâo brei kơ phung Israel lu êlan mdê mdê pioh yua hlăm klei bi blah ti êngao Lăn Aê Diê Ƀuăn. Jih jang klei mtrŭn anei mdê hŏng êlan hdră phung kahan hiu plah mmiă ngă ti anôk diñu truh tinăn diñu bi rai leh anăn bi mdjiê. Bi hŏng dŭm boh ƀuôn ti êngao Lăn Aê Diê Ƀuăn, Aê Diê čiăng phung ƀuôn sang Ñu yua êlan hdră bi grăng kơ klei êđăp ênang čiăng brei klei myun kơ ƀuôn anăn ngă klei bi mguôp êđăp ênang hŏng phung Israel. Hlăm klei bi grăng anei, ti ƀuôn tŭ mŭt srăng mă bruă leh anăn tuh jia kơ phung Israel, ƀiădah bi hrô kơ klei anăn diñu srăng mâo klei êngiê mâo kdriêl leh anăn mâo klei phung Israel răng mgang brei. Ƀiădah lĕ, ti ƀuôn khăng kŏ hngah kơ klei bi grăng leh anăn lŏ bi kdơ̆ng wĭt snăn Aê Diê srăng jao diñu hlăm kngan phung Israel. Đơ phung êkei srăng bi mdjiê jih čiăng đăm diñu lŏ krŭ kdơ̆ng hŏng klei hgăm, blah wĭt tơdah mâo mông găl. Ênuk anăn, phung tue riêng gah khăng ba kahan blah phung ƀuôn sang Aê Diê kyuanăn Aê Diê brei phung ƀuôn sang Ñu prăp êmiêt kơ klei bi blah prŏng čiăng djă pioh kjăp klei êđăp ênang hŏng dŭm čar riêng gah. Ƀiădah hlăm klei bi blah anăn mtam Aê Diê ăt bi hriăm mơh phung ƀuôn sang Ñu bi êdah ai tiê jăk.
Ƀiădah lĕ, êlan bi grăng kơ klei êđăp ênang anăn amâo yua ôh kơ dŭm boh ƀuôn hlăm čar phung Israel amra plah mă. Bi hŏng jih jang phung djuê ana hlăm Lăn Aê Diê Ƀuăn, Aê Diê brei phung Israel bi mdjiê jih jang mnơ̆ng bi êwa. Kyuadah anei jing phung djuê ana soh jhat êdimima, diñu ngă lu klei jhat ƀai, êgao hnơ̆ng ti anăp Aê Diê kyuanăn Aê Diê mtă kơ phung ƀuôn sang Ñu brei bi mdjiê jih phung djuê ana anei čiăng bi luč hĕ klei soh truh ti phŭn agha, leh anăn “čiăng kơ diñu amâo dưi ôh bi hriăm diih ngă tui hlue jih jang bruă soh jhat diñu tuôm ngă leh hlăm klei mă bruă kơ phung yang diñu, huĭdah diih ngă soh hŏng Yêhôwa Aê Diê diih” (êlan 18).
Trăn Klei Aê Diê Blŭ hruê anei brei drei ƀuh wăt hlăm klei bi blah răng mgang ala čar, Aê Diê ăt čiăng mơh phung ƀuôn sang Ñu yua ai tiê jăk ngă klei jăk kơ phung roh. Lui knŏng phung djuê ana jhat ƀai êgao hnơ̆ng jing djuê ana Aê Diê čuăn leh kơ klei bi rai čiăng mkhư̆ gang klei soh tưp kơ phung ƀuôn sang Ñu. Hruê anei, grăp čô phung đăo jing sa čô dĭng ktang kơ klei êđăp ênang ba “klei mrâo mrang jăk êđăp ênang” (Êphêsô 6:15) kơ jih jang mnuih. Hrô kơ klei blŭ duñ duñ, hdĭp hlăm klei rŭng răng leh anăn bi blah ngă, brei drei hdĭp hŏng ai tiê tui duah klei êđăp ênang, leh anăn hur har wah lač akâo klei êđăp ênang kơ ala čar, kơ lăn ala.
Si ngă drei pioh mông wah lač brei akâo klei êđăp ênang kơ ala čar leh anăn kơ lăn ala mơ̆?
Ơ Aê Diê jing Khua Yang kơ klei êđăp ênang. Đru kâo mâo knhuah hdĭp jăk, bi êdah klei mngač klei êđăp ênang Ih, thâo yua klei hur har hưn Klei Mrâo Mrang Jăk kơ klei êđăp ênang nao hưn Klei Mrâo Mrang Jăk kơ lu mnuih.
Dlăng Klei Aê Diê Blŭ hlăm tlâo thŭn: Y-Êskiêl 34:20-35:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
https://www.youtube.com/c/bhkthn
