II Kevcai 20:10-20
Nqe cim:
“Thaum nej mus tua nej cov yeebncuab tej nroog, nej yuav tsum cia sijhawm rau cov neeg nyob hauv lub nroog tsa tes thov nej. Yog lawv qhib roojvag thiab tsa tes thov nej, lawv yuav tau ua nej qhev thiab ua haujlwm rau nej” (II Kevcai 20:10-11).
Lus nug rau sawvdaws xav:
- Mauxes cobceem Vajtswv haivneeg cov tubrog yuav tsum ua licas rau tej neeg hauv cov nroog uas lawv yuav mus txeeb?
- Tus cai, tsuas pub tua cov txivneej yog hais rau tej lub nroog zoo licas?
- Peb kawm tau yam dabtsi hauv tus cai no?
Nyob hauv ntu Vajluskub no, Mauxes cobceem haivneeg Yixalayees txog tus cai yuav tau ua thaum mus ntaus rog ntawm tej nroog nyob ib ncig tebchaws coglus tseg. Txojcai no tsis zoo li tej pab tubrog uas mus huab noj huab haus txeeb luag tej nroog uas ntsib leejtwg los tua huv tibsi. Hais txog tej nroog uas nyob nraum ntug tebchaws coglus tseg, Vajtswv xav kom Nws haivneeg siv kev sib txuas lus kom sawvdaws muaj kev sib raug zoo, coglus zoo nrog haivneeg Yixalayees. Hauv lub nroog twg, tej neeg tsa tes thov ces lawv tsis raug tua, tsuas raug lees them se thiab ua cov Yixalayees qhev, tau nyob qab tswjhwm ntawm Vajtswv haivneeg. Tiamsis tej neeg hauv lub nroog twg tsis tsa tes thov thiab qhib qhov roojvag rau cov Yixalayees tej tubrog ces tus Tswv pub cai muab cov neeg nyob hauv tej txivneej tua kom tuag tas huv tibsi, txhob cia ib tug dim li thiaj tsis muaj tus ntxeev siab. Ncua sijhawm ntawd, tej haivneeg ib ncig pheej txhij tubrog tuaj ua rog rau Vajtswv haivneeg, tus Tswv thiaj pub cai rau Nws haivneeg npaj nroos ua rog kom ceev tau lawv lub tebchaws tsis poob rau lwm haivneeg tes. Tiamsis tus Tswv yeej qhia Nws haivneeg yuav tsum ua pab tubrog uas muaj lub siab hlub tshua.
Txawm li ntawd los, txojkev ua zoo tsis siv rau tej nroog nyob hauv lub tebchaws coglus tseg. Hais txog tej haivneeg uas nyob hauv thaj av coglus tseg, cov Yixalayees yuav tsum tua txhua tus yam uas ua pa kom tuag huv tibsi. Vim lawv yog tej neeg uas phem kawg, ua tej kev txhaum loj kawg tawmtsam Vajtswv. Yog li ntawd, Vajtswv thiaj hais kom Nws haivneeg yuav tsum tua tej haivneeg ntawd tuag tu noob, Mauxes hais tias: “lawv thiaj tsis coj nej mus pe lawv tej vajtswv, kom nej ua txhaum tawmtsam Vajtswv” (nqe 18).
Ntu Vajluskub hnub no ua rau peb pom, kev ua rog tivthaiv tebchaws los yuav tsum muaj lub siab hlub tshua txog cov tawmtsam uas thov tseg siav, tsuas tua cov uas tsis thov thiab cov yuav tsum raug tua kom tuag tu noob thiaj tsis muaj kev txhaum hauv tus Tswv haivneeg. Niaj hnub nimno, cov ntseeg yeej yog cov sawv cev ntawm kev thajyeeb “…muaj lub siab kub lug mus qhia txojmoo zoo uas hais txog txojkev kaj siab…” (Efexus 6:15) rau tibneeg txhua tus. Peb yuav tau ua lubneej ntawm tus yamntxwv nrhiav kev thajyeeb thiab thov Vajtswv pub muaj kev kaj thajyeeb rau lub ntiajteb, tsis yog pheej yws txog kev ua tsov rog tsis muaj kev kaj siab xwb.
Thov Vajtswv,
Vajtswv yog tus Tswv ntawm kev thajyeeb. Thov pab nyuam yaus muaj lubneej hlub tshua, qhia tshwm kev thajyeeb ntawm Koj, npaj nroos coj Txojmoo Zoo uas yog txojkev kaj siab rau txhua tus. Amees.
Peb puas cia sijhawm los thov Vajtswv pub kev thajyeeb rau peb lub tebchaws thiab lub ntiajteb no lawm?
Nyeem Vajluskub hauv peb lub xyoo: Exekees 34:20-35:15
Kênh Youtube BHKTHN:
