Klei Aê Diê Blŭ: Klei Bi Hriêng 30:13-14
Êlan kliăng: “…amâo uêñ kơ arăng, amâo thâo pap, mčeh luar, êgao hnơ̆ng, măk ƀai, bi êmut kơ klei jăk, lhiăr, djăl krêñ, mĭn kơ pô thâo lu, khăp kơ klei hlăp amâo djŏ kơ Aê Diê ôh,” (II Y-Timôthê 3:3-4)
Klei êmuh ksiêm mĭn: Ya dua mta knuih bi knăl tui čuê mơ̆ng phung jhat ƀai lŏ lač tinei? Si knuih bi knăl anei bi êdah hlăm ênuk drei dôk hdĭp ară anei?
Knuih bi knăl tal tlâo mơ̆ng phung jhat ƀai jing klei krưh mgao (êlan 13). Y-Agur yua rup “dlăng hŏng klei krưh”, čiăng lač kơ ală dlăng hŏng klei mgao, dlăng kơ arăng hơăi mang. Phung anei amâo dlăng klă kơ ală jih jang mnuih ôh, čiăng thâo săng leh anăn čiăng mâo klei bi mguôp hŏng klei mtăp mđơr. Phung anei dlăng kơ mnuih mkăn knŏng msĕ si mnơ̆ng yua kăp duah klei tŭ dưn kơ diñu pô leh anăn bi kjăp rup jing diñu pô. Phung “ƀô̆ mta krưh mgao” leh anăn “dlăng hŏng klei krưh” hưn mdah kơ sa gưl ênuk phung krưh mgao, dlăng mưč kơ arăng, bi mđĭ ñu pô. Hruê anei lu mnuih dôk “dlăng hŏng klei krưh”, diñu hưn ktưn kơ djuê ana diñu, kơ anôk bruă, klei thâo knhâo, klei mdrŏng sah amâodah klei tŭ jing hlăm bruă knuă diñu. Anăn jing phung mnuih soh hngah klei mpŭ kơ amĭ ama, bi kdơ̆ng hŏng Aê Diê, yap ñu pô yơh jing phŭn, jing hnơ̆ng čuăn klei ênuah ênô, ƀrư̆ mjing diñu krưh mgao, hưn ktưn kơ klei soh diñu, leh anăn mưč mač kơ mnuih kpă ênô (II Têsalônik 2:4).
Knuih bi knăl tal pă phung jhat ƀai jing klei măk ƀai (êlan 14). Êlan Klei Bi Hriêng anei hưn mdah sa gưl ênuk phung măk ƀai, amâo mâo klei thâo khăp. Klei jhat ƀai đĭ hĭn nanao tơl diñu ngă jhat kơ mnuih dôk kŏ krei asei hjăn, jing “phung knap mñai” leh anăn “phung ƀun ƀin”, čiăng bi êdah anôk bruă, klei dưi diñu. Hruê anei, klei jhŏng ktang leh anăn măk ƀai amâo knŏng bi êdah hlăm êlan klông hlăm ƀuôn sang ôh ƀiădah mđung hưn grăp hruê hŏng djăp mta mnơ̆ng yua pioh hưn mthâo bi lar. Drei ăt khăng tuôm ƀuh mơh phung lu ktư̆ juă sa čô mnuih hlăm internet, diñu tui duah čiăng ngă jhat tơl mâo leh anăn hơ̆k kdơ̆k yơh tơdah dưi leh, hưn ktưn kơ diñu pô yơh jing mnuih jăk, ênuah ênô, kăp răng mgang klei kpă ênô!
Wăt tơdah Y-Agur lač kơ lu mta mnuih jing mdê mdê, ƀiădah tĭng sa kdrêč, jih jang êlan Klei Bi Hriêng anei čiăng lač kơ klei krưh mgao sơăi, leh anăn tinei yap jing klei bi rai leh anăn bi jhat jih djăp mta klei bi mguôp. Krưh mgao ngă kơ anak mnuih bi êmut kơ klei dưi kyuanăn diñu bi kdơ̆ng hŏng amĭ ama (êlan 11). Krưh mgao ngă bi bum ală anak mnuih amâo thâo ƀuh ôh klei kƀah diñu pô (êlan 12). Hĭn mơh, krưh mgao ngă kơ mnuih dlăng kơ pô mkăn hơăi mang (êlan 13). Knhal tuč, krưh mgao ngă kơ mnuih jing čuôt klih, yap ñu pô yuôm hĭn, leh anăn mjing diñu mnuih ktư̆ juă, amâo hdĭp mtăp mđơr ôh hŏng phung awăt êdu hĭn kơ diñu (êlan 14). Blŭ mdê, krưh mgao jing sa mta klei soh jhat ƀai kluôm dhuôm, kyua krưh mgao yơh Lucifer bi kdơ̆ng hŏng Aê Diê. Klei krưh mgao bi mklăk kluôm dhuôm hŏng “klei mĭn” luă gŭ, bi ti gŭ pô, đup gưt, leh anăn săn asei mlei mơ̆ng Yang Krist (Philip 2:5-8).
Gŏ sang, găp djuê hdĭp tui hlue Klei Aê Diê Blŭ jing atur čiăng kơ lăn čar dưi dôk hdĭp trei mđao, jăk mơak. Brei drei wah lač bĕ čiăng kơ Khua Yang čuă dlăng lăn čar leh anăn djuê ana drei.
Si ngă drei tuôm wah lač akâo kơ Khua Yang čuă dlăng lăn čar drei mơ̆?
Wah lač: Ơ Khua Yang, akâo Ih đru kâo kiă kriê ai tiê kâo, čiăng hơô klei mĭn Yang Krist, hdĭp hlăm klei khăp nanao leh anăn êbat hŏng klei luă gŭ ti anăp Khua Yang leh anăn mnuih mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Kôlôs 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
