Klei Aê Diê Blŭ: Klei Bi Hriêng 30:11-14
Êlan kliăng: “Kyuadah phung mnuih srăng čuôt klih, khăp kơ prăk, mgao, ngă krưh, blŭ jhat, amâo thâo gưt asăp amĭ ama, amâo thâo hdơr knga, amâo thâo mpŭ kơ Aê Diê ôh,” (II Y-Timôthê 3:2)
Klei êmuh ksiêm mĭn: Ya boh blŭ yua lŏ mñă wĭt hlăm jih pă êlan anei leh anăn si klei čiăng mblang? Ya jing dua mta knuih bi knăl tal êlâo mơ̆ng phung jhat ƀai? Si knuih bi knăl anei bi êdah hlăm ênuk drei dôk hdĭp ară anei?
Pă êlan Klei Bi Hriêng anei kčưm dơ̆ng hŏng boh blŭ “phung”, čiăng lač kơ gưl tal mnuih mdê mdê, kơ djuê ana amâodah kơ sa êpul mnuih mdê hĭn hlăm knhuah hdĭp amâodah hlăm ai tiê klei mĭn diñu. Boh blŭ anei mñă wĭt mñă nao pă blư̆, brei ƀuh klă klei hưn êlâo hlăm êlan Klei Bi Hriêng anei, leh anăn jih klei anei lŏ bi klă hĭn mơh hlăm klei Khua Yang Yêsu mtô. Hlăm hdruôm hră Klei Mrâo Mrang Jăk, boh blŭ “phung anei” yua truh kơ 16 blư̆. Tơdah yua boh blŭ “phung anei”, Khua Yang Yêsu čiăng lač kơ gưl ênuk phung jhat ƀai, ai ngăm, bi kdơ̆ng leh anăn srăng pơ̆ng Ñu ti kyâo bi kal (Y-Mathiơ 23:13, 34-36) ăt jing gưl ênuk phung srăng mpŭ mni kơ pô bi kdơ̆ng hŏng Yang Krist mơh (Y-Mathiơ 24:4-6). Snăn, klei phung lăn ala hngah kơ Aê Diê, amâo mâo klei bi mlih ôh dơ̆ng mơ̆ng ênuk Y-Agur, hlăm brô êbeh kơ 3.000 thŭn êlâo, tơl truh kơ ênuk Khua Yang Yêsu, leh anăn hlŏng truh kơ hruê anei.
Y-Agur bi êdah pă mta knuih bi knăl kơ phung djuê ana jhat ƀai. Tal sa, amâo mpŭ kơ amĭ ama (êlan 11). Klei amâo mpŭ kơ amĭ ama amâo knŏng “tăm pah” (Klei Kbiă 21:17; Bruă Lêwi 20:9) ƀiădah wăt “amâo hơêč hmưi”, mblang jing amâo mâo khăp, amâo uêñ mĭn leh anăn amâo bi leh ôh bruă klam sa čô anak hŏng amĭ ama. Amâo mpŭ kơ amĭ ama jing klei soh dưm tal êlâo hĭn kyua tơdah phung anak amâo mpŭ kơ amĭ ama, snăn jing gao leh klei bhiăn atur phŭn klei hdĭp ênuah ênô sa čô anak mnuih, wăt klei amâo dlăng ba amĭ ama mduôn bi êdah boh klei jing kơ klei đăo sa čô pô đăo msĕ mơh, kyua klei anăn “jing jhat hĭn kơ sa čô amâo đăo ôh” (I Y-Timôthê 5:4, 8). Blŭ mdê, klei tăm pah, amâo mpŭ kơ amĭ ama jing klei jhat ƀai êgao kdlưn hĭn hlăm klei hdĭp ênuah ênô anak mnuih yang đar. Hruê anei, arăng năng ai “tăm pah” leh anăn “amâo hơêč hmưi” kơ amĭ ama hŏng lu mta êlan hdră mdê mdê, msĕ si: bi kdơ̆ng hŏng klei dưi jing amĭ ama, amâodah mưč mač klei amĭ ama ƀuah mkra, bi čhŏ klei hing jăk mơ̆ng amĭ ama hŏng klei amâo thâo hêñ, kar kak kơ ngăn drăp amĭ ama, hngah kơ bruă dlăng ba amĭ ama leh anăn đa đa mkăn…
Tal dua jing klei ai ngăm klei ngă mgưt (êlan 12). Êlan Klei Bi Hriêng hưn mdah kơ gưl ênuk phung ai tiê kpă mnuih hroh trŭn, yap diñu pô jing “doh jăk” ƀiădah boh sĭt “klei čhŏ mrŏ diñu ka rao ôh”. Phung gưl ênuk anei amâo mâo hnơ̆ng čuăn kơ klei hdĭp kpă ênô ôh, dlăng hơăi mang leh anăn bi kdơ̆ng hŏng ênoh yuôm klei bhiăn mơ̆ng mphŭn leh anăn ai tiê klei mĭn (Y-Mathiơ 23:27-28; II Y-Timôthê 3:1-5). Satan khăng mplư phung mnuih soh dlăng kơ diñu pô yơh jing jăk. Anak mnuih hruê anei mkă yap diñu pô tui si hnơ̆ng čuăn amâodah klei djŏ găl diñu pô, leh anăn amâo tŭ ôh boh sĭt klei hdĭp mngăt ai tiê diñu pô rai luč leh. Wăt hlăm Sang Aê Diê, lu mnuih ai ngăm tơdah diñu knŏng djă pioh hdră bhiăn klei đăo, thâo săng atur klei đăo phŭn, ƀiădah amâo dôk hdĭp hlue si klei đăo phŭn anăn ôh.
Si ngă gŏ sang, găp djuê drei dôk hdĭp bi êdah Khua Yang ti krah ala ƀuôn drei dôk hdĭp mơ̆?
Wah lač: Ơ Khua Yang, bi mni kơ Khua Yang bi mtlaih leh kâo mơ̆ng klei soh jhat phung djuê ana jhat ƀai. Akâo Khua Yang đru kâo jing hra leh anăn klei mngač kơ lăn ala, čiăng bi êdah Klei Mrâo Mrang Jăk kơ lăn ala anei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
