Pajlug 30:11-14
Nqe cim:
“Rau qhov tej neeg nyias yuav xav txog nyias xwb, lawv yuav xav tsis txog lwm tus li. Lawv yuav ntshaw nyiaj, yuav khavtheeb, yuav muab hlob, yuav tsis mloog niam txiv lus, yuav tsis ris luag txiaj ntsig, thiab yuav saib tsis taus Vajtswv txoj kevcai;” (2 Timautes 3:2)
Lus nug rau sawvdaws xav:
– Lo lus twg hais mus hais los hauv plaub nqe Vajluskub no thiab muaj lub ntsiab dabtsi?
– Ob qhov cim xub thawj ntawm xeebntxwv phem yog dabtsi?
– Cov cim no tabtom tshwm muaj rau tiam peb nyob no li cas?
Plaub nqe Pajlug no puavleej qhib thawj los ntawm lo lus “muaj tej tus” hais txog ib qib neeg, ib cov xeebntxwv lossis ib pab neeg uas ibtxwm muaj lub cim los ntawm qhov teebmeem txog kev ua zoo lossis muaj ib lub siab meej tseeb li cas. Lo lus hais mus hais los plaub zaug no qhia pom meej lub ntsiab hais ua ntej ntawm plaub nqe Pajlug no, thiab qhov ntawd tau qhia meej heev hauv Tswv Yexus tej lus qhia. Hauv plaub phau Moo Zoo, lo lus “xeebntxwv” muaj 16 zaug. Thaum uas siv qhov hu ua “xeebntxwv”, Tswv Yexus xav qhia txog tiam xeebntxwv phem, tsis tseeb, tawmtsam thiab yuav muab Nws ntsia rau saum ntoo khaublig (Mathais 23:13, 34-36) thiab kuj yog tiam uas yuav txhawb nqa tus uas tawmtsam Yexus Khetos (Mathais 24:4-6). Yog li ntawd, tus yam ntxwv uas tsis lees yuav Vajtswv yeej tsis hloov pauv txij tiam Ankus kwv lam li 3.000 xyoos ua ntej, los txog rau tiam Tswv Yexus thiab txog rau niaj hnub nim no.
Ankus qhia tawm plaub lub cim ntawm cov xeebntxwv phem. Tim ib yog tsis hwm niam txiv (nqe 11). Tsis hwm niam txiv tsis yog tsuas“foom phem” xwb (Khiavdim 21:17; Levis Kevcai 20:9) tiamsis tseem yog “tsis foom koob hmoov”, lub ntsiab yog tsis hlub, tsis hmov tshua thiab tsis ua tiav feem xyuam menyuam rau niam txiv. Tsis hwm niam txiv yog txoj kev txhaum piav tawm xub thawj vim menyuam tsis hwm niam txiv ces twb ua txhaum tibneeg txoj kevcai ua zoo lawd, tsis tas li ntawd, tsis tu niam txiv thaum laus yog qhia tawm lub tsamthawj kev ntseeg ntawm ib tug ntseeg, vim ua li ntawd “tseem phem heev dua tus uas tsis ntseeg Vajtswv” (1 Timautes 5:4, 8). Hais rau lwm seem, kev foomphem, tsis hwm niam txiv yog tej kev txhaum limhiam loj dhau tshaj tibneeg tej kevcai ua zoo. Niaj hnub nim no, tej zaum tibneeg yuav “foom phem” thiab “tsis foom koob hmoov” rau niam txiv los ntawm ntau txoj kev sib txawv xws li: Tawmtsam niam txiv txoj cai lossis saib tsis taus niam txiv tej lus qhuab ntuas, ua rau niam txiv poob koob npe tsis paub txaj muag li, ntshaw niam txiv tug, tsis kam lees tu niam txiv…
Tim ob yog ua tsis tseeb (nqe 12). Nqe pajlug no piav qhia txog ib tiam neeg ua phem uas pheej xam pom yus “dawbhuv” tiamsis tseeb tiag ces “tsis tau ntxuav kev phem kev qias pov tseg”. Tiam neeg no ua tsis tau raws txoj kevcai ua zoo, saib tsis taus thiab tawmtsam tej yam muaj nqis uas ibtxwm muaj los thiab ibtxwm coj (Mathais 23:27-28; 2 Timautes 3:1-5). Dab Ntxwgnyoog pheej dag tus neeg txhaum kom lawv muaj qhov saib pom yus zoo. Tibneeg niaj hnub nim no pheej ntaus nqis rau yus los ntawm qee yam lossis tus cwjpwm uas yus pom tias yog, tiamsis tsis kam txais yuav qhov tseeb txog yus sab ntsujplig uas twb raug puastsuaj lawd. Kiag hauv tuamtsev, ntau tus tibneeg kuj ua tsis tseeb, lawv ceev kevcai ntseeg, paub txoj kevcai ntseeg uas ibtxwm ua los, tiamsis tsis ua neej raws li txoj kev ntseeg uas ibtxwm ntseeg los ntawd.
Thov Vajtswv,
Vajtswv, nyuam yaus ua Koj tsaug vim Koj tau cawm nyuam yaus dim ntawm cov xeebntxwv cajces phem. Thov pub rau nyuam yaus yog cov ntsev las thiab lub teeb ci rau neeg ntiajteb kom paub Koj thiab tau txais kev cawmdim. Nyuam yaus tuav Tswv Yexus Khetos lub npe thov, Amees.
Peb tsev neeg, cov xeebntxwv puas ua neej qhia tshwm Vajtswv rau tebchaws?
Nyeem Vajluskub hauv peb lub xyoos: Pajlug 29
Kênh Youtube BHKTHN:
