Klei Aê Diê Blŭ: Galati 4:21-31
Êlan kliăng: “Snăn Ơ phung ayŏng adei, drei amâo jing ôh phung anak mơ̆ng mniê hlŭn, ƀiădah phung anak mơ̆ng mniê êngiê” (Galati 4:31)
Klei êmuh ksiêm mĭn: Khua ƀĭng kna Y-Pôl yua rup phung anak mơ̆ng mniê hlŭn leh anăn êngiê čiăng bi hmô kơ ya klei? Ya ngă phung đăo Galati amâo brei lŏ gĭr ktưn ôh, čiăng jing phung dưi dưn ngăn? Si ai tiê klei mĭn brei drei mă bruă kơ Aê Diê?
Phung Yuđa mđing mĭn kơ ama, amâodah hlei jing aduôn aê sa čô mnuih hĭn kơ mđing mĭn kơ amĭ. Hlăm hră Galati, lu blư̆ Khua ƀĭng kna Y-Pôl ăt lač hŏng phung dlăng hră snei, “phung mâo klei đăo yơh jing phung anak čô Y-Abraham sĭt” (Galati 3:7; dlăng thiăm Galati 3:29). Khădah snăn, tinei ñu dôk kčah sa klei êmuh kơ phung đăo Galati čiăng mâo Khua Yang Yêsu êjai, čiăng lŏ wĭt hŏng klei bhiăn êjai čiăng rơ̆ng dưi yap kpă ênô: Hlei jing amĭ ayŏng amai adei?
Čiăng bi mklă hŏng phung đăo anei, Khua ƀĭng kna Y-Pôl mă rup bi hmô mơ̆ng dua phung anak mơ̆ng dua čô mô̆ Y-Abraham: Anak mơ̆ng mniê êngiê leh anăn mơ̆ng mniê hlŭn (Klei Mphŭn Dơ̆ng kdrêč 16). Anak H’Agar, mniê hlŭn “anak kkiêng leh tui si kđeh” (êlan 23, 29), jing hlăm klei gĭr anak mnuih kñăm mâo mnuih lŏ čuê, leh anăn “kkiêng kơ phung anak hlŭn” (êlan 24). Bi anak mơ̆ng mniê êngiê snăn “kkiêng leh tui si klei ƀuăn”, jing anak Aê Diê brei kơ Y-Abraham čiăng jing mnuih lŏ čuê (êlan 23), leh anăn “kkiêng leh tui si Yang Mngăt Jăk” (êlan 29). Knhal tuč, anak mơ̆ng mniê hlŭn kkiêng hlue si klei gĭr kđeh asăr snăn arăng suôt, amâo mâo kdrêč mơ̆ng ngăn aê đưm Y-Abraham ôh .
Amâo brei phung đăo Galati lŏ rŭng răng ôh, Khua ƀĭng kna Y-Pôl bi mklă anôk jing diñu: “Ơ phung ayŏng adei, diih jing msĕ si Y-Isăk, jing phung anak mơ̆ng klei ƀuăn” (êlan 28) leh anăn “Snăn Ơ phung ayŏng adei, drei amâo jing ôh phung anak mơ̆ng mniê hlŭn, ƀiădah phung anak mơ̆ng mniê êngiê” (êlan 31). Phung đăo Galati ăt msĕ si Y-Isăk, jing phung lŏ čuê klei ƀuăn. Ngăn dưn klei bi mtlaih jing dŏ diñu leh. Diñu amâo lŏ gĭr hŏng kđeh asăr ôh čiăng năng dưi jing mnuih lŏ čuê dưn ngăn anăn.
Hlăm lăn ala “djăp mta mnơ̆ng mâo ênoh mdê mdê”, klei bi mtlaih amâo bi mlih hŏng klei ngă bruă jăk ngă kơ lu mnuih ƀuh amâo mơak ôh. Lu blư̆ drei msĕ si phung đăo ti Galati, čiăng mâo Khua Yang Yêsu êjai, čiăng ngă thiăm bruă mkăn êjai čiăng ƀuh hơĭt ai tiê kơ klei bi mtlaih pô mâo jing năng djŏ. Lu mnuih yua klei gĭr hlăm kđeh asăr msĕ si myơr, hur har mă bruă hlăm Sang Aê Diê… kyua mĭndah jih jang bruă anăn pô năng mâo klei bi mtlaih!
Khua Yang Yêsu bi leh jih jang bruă ti kyâo bi kal leh, jih jang klei gĭr drei amâo dưi ba klei bi mtlaih ôh, ƀiădah knŏng bi êdah ai tiê khăp kơ Khua Yang kyuadah Ñu bi tui leh drei.
Drei đăo sĭt kơ drei dưi dưn klei bi mtlaih leh mơ̆ amâodah ka?
Wah lač: Ơ Khua Yang, akâo kơ Ih đru kâo kkuh mpŭ, mă bruă, myơr, mă bruă jăk hŏng ai tiê klei mĭn mơ̆ng mnuih êngiê kyua thâo kâo dưn leh klei bi mtlaih Ih brei. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 17-18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
