Kalatias 4:21-31
Nqe cim:
“Yog li ntawd cov kwvtij, peb tsis yog tus ntxhais qhev cov menyuam, tiamsis peb yog tus pojniam uas tsis yog qhev cov menyuam.” (Kalatias 4:31)
Lus nug rau sawvdaws xav:
- Timthawj Paulus siv daim duab ob tug menyuam ntawm tus nkauj qhev thiab tus pojniam ywj pheej los piv txog yam dabtsi?
- Vim li cas cov ntseeg hauv Kalatias tsis tas yuav siv lawv lub zog kom tau ua Vajtswv cov tub ki txais yuav tej qub txeeg qub teg?
- Peb yuav tsum ua haujlwm rau Vajtswv los ntawm lub siab zoo li cas?
Cov neeg Yudais ib txwm xav txog tus txiv lossis tus yawgkoob ntawm ib tug neeg heev dua tus niam. Nyob hauv tsab ntawv Kalatias, Timthawj Paulus hais rau cov neeg uas txais nws tsab ntawv hais tias, “tsuas yog cov neeg uas ntseeg xwb thiaj yog Anplahas cov xeebntxwv.” (Kalatias 3:7; saib ntxiv Kalatias 3:29). Tiamsis nyob ntawm no, Timthawj Paulus muaj ib lo lus nug cov ntseeg hauv Kalatias uas ib ke xav tau Tswv Yexus, tiamsis ib ke xav rov qab los coj Txoj Kevcai kom lawv tau kev ncaj ncees hais tias: Nej niam yog leejtwg? Yuav kom ua tau timkhawv rau cov ntseeg txog qhov no, Timthawj Paulus tau siv daim duab hais txog ob tug menyuam ntawm Anplahas ob tug pojniam los piv txwv qhia: tus menyuam ntawm tus pojniam ywj pheej thiab tus menyuam ntawm tus nkauj qhev (Chivkeeb 16). Tus menyuam ntawm Hankas, uas yog tus nkauj qhev, yug los “raws li neeg ibtxwm yug” (nqe 23, 29), txhais tau hais tias nws yug los raws li tibneeg lub zog kom muaj tus sawv tuav cajces, thiab tau yug los “ua qhev” (nqe 24). Tiamsis, tus menyuam ntawm tus pojniam ywj pheej, yug los raws li “Vajtswv lo lus cog tseg uas hais tias nws yuav yug”, txhais tau hais tias nws yog tus menyuam uas Vajtswv coglus pub rau Anplahas ua tus tuav cajces (nqe 23), thiab nws yog “tus tub uas Vajtswv tus Ntsujplig yug” (nqe 30). Thaum kawg, tus menyuam uas yug los raws li neeg ibtxwm yug raug ntiab tawm thiab tsis muaj feem nyob hauv Anplahas lub cuabtam.
Tsis cia cov ntseeg hauv Kalatias xav tsis tawm ntxiv, Timthawj Paulus hais meej meej txog lawv lub meejmom hais tias: “Cov kwvtij, nej puavleej yog Vajtswv cov menyuam raws li Vajtswv lo lus cog tseg, ib yam li Ixaj” (nqe 28), thiab “peb tsis yog tus ntxhais qhev cov menyuam, tiamsis peb yog tus pojniam uas tsis yog qhev cov menyuam” (nqe 31). Cov ntseeg hauv Kalatias kuj zoo li Ixaj, uas yog tus tau txais Vajtswv tej lus cogtseg. Lawv twb txais tau txojkev cawmdim lawm. Lawv tsis tas yuav siv zog ua tej yam sab nqaij tawv kom tau txojkev cawmdim ntawd ntxiv lawm.
Nyob hauv lub ntiajteb uas “txhua yam puavleej muaj nyias tus nqi”, txojkev cawmdim tsis tsum muab kev ua zoo los pauv ua rau lwm tus hnov tsis zoo siab. Ntau zaug peb kuj zoo ib yam li cov ntseeg hauv Kalatias, xav tau Tswv Yexus, tiamsis kuj tseem xav ua tej haujlwm txhab ntxiv kom tus kheej qabsiab hais tias yus tsimnyog tau txojkev cawmdim. Coob tug siv lawv tej kev siv zog sab nqaij tawv xws li fij nyiaj, kub siab ua haujlwm hauv pawg ntseeg,… thiab xav tias lawv yuav tau txojkev cawmdim los ntawm tej haujlwm ntawd! Tswv Yexus twb ua tiav txhua yam saum tus ntoo khaublig lawm, txhua yam uas peb ua tsis muaj peevxwm cawm tau peb dim, tiamsis tej ntawd tsuas zoo li yam qhia tshwm peb txojkev hlub Vajtswv, vim Nws twb cawm peb dim lawm.
Thov Vajtswv,
Vajtswv, thov pab kom nyuam yaus paub teev tiam, ua haujlwm, fij nyiaj, thiab ua tej haujlwm zoo los ntawm nplooj siab ntawm tus neeg ywj pheej, vim paub tias nyuam yaus twb tau txais txojkev cawmdim ua Koj pub lawm. Nyuam yaus tuav Tswv Yexus Khetos lub npe thov, Amees.
Peb puas ntseeg ruaj tias peb twb tau txais txoj kev cawmdim lawm?
Nyeem Vajluskub hauv peb lub xyoos: Yaxayas 17-18
Kênh Youtube BHKTHN:
