Phung Ƀuôn Sang Aê Diê Ênguôt Hnĭng Kyua Ngă Soh – 31/10/2022

977

 

Klei Aê Diê Blŭ: Klei Kbiă 33:1‑6

Êlan kliăng: “Đăm mdăp ôh ƀô̆ mta Ih kơ kâo. Đăm hngah ôh kơ dĭng buăl Ih hŏng klei ngêñ; Ih jing leh Pô đru kâo, Đăm suôt kâo, leh anăn đăm lui kâo ôh, Ơ Aê Diê Pô bi mtlaih kâo!” (Klei Mmuñ Hđăp 27:9).

Klei êmuh ksiêm mĭn: Mâo mơ̆ ya klei mdê hlăm bruă Aê Diê bi kmhal phung ƀuôn sang Ñu leh diñu kkuh kơ rup yang? Ya klei Aê Diê čiăng bi hriăm phung ƀuôn sang Aê Diê mơ̆ng bruă Ñu lač kơ digơ̆ brei pioh hĕ kdrăp mah pioh bi msiam? Klei hriăm anei mñă kơ drei ya klei brei mđing tal êlâo hlăm klei hdĭp?

Aê Diê ăt bi sĭt klei Ñu ƀuăn hŏng phung êlâo dih mơ̆ng Israel kơ bruă brei kơ diñu Lăn Aê Diê Ƀuăn. Aê Diê srăng tiŏ nao sa čô dĭng buăl jăk nao êlâo Y‑Môis leh anăn suôt phung ƀuôn sang ti Kanaan. Klei mdê hjăn jing Ñu amâo hrăm mbĭt hŏng digơ̆ msĕ si hlăm hdră kbiă mơ̆ng čar Êjip ôh. Aê Diê iêô diñu jing phung ƀuôn sang khăng kŏ, huĭdah hlăm ktuê êlan Aê Diê srăng bi rai hĕ diñu (êlan 3)? Aê Diê mtă kơ diñu brei pioh hĕ jih kdrăp diñu pioh bi msiam leh anăn dôk guôn Aê Diê srăng bi mklă si srăng ngă kơ diñu (êlan 5). Bruă amâo ba mnơ̆ng bi msiam bi êdah klei bi ti gŭ pô, ênguôt hnĭng kyua ngă soh leh hŏng Aê Diê. Aê Diê bi hriăm phung ƀuôn sang Ñu hriăm klei hriăm điêt hĭn, thâo kmhal klei soh leh ngă soh, hriăm Klei Aê Diê Blŭ mơ̆ng bruă điêt hĭn, leh anăn lŏ dơ̆ng čang hmăng hlăm klei pap Ñu. Aê Diê sĭt suôr nanao, khăp leh anăn pŏk êlan kơ phung ƀuôn sang Israel hlăk đưm ăt msĕ mơh phung đăo kơ Krist hruê anei, wăt tơdah lu blư̆ drei amâo sĭt suôr, bi kdơ̆ng hŏng Ñu.

Leh hmư̆ klei Aê Diê lač, jih jang phung ƀuôn sang gưt asăp, mơ̆ng čư̆ Hôrêp diñu lui jih kdrăp bi msiam. Aê Diê lač phung ƀuôn sang Ñu jing phung khăng kŏ ngă kơ diñu ênguôt hnĭng leh anăn huĭ hyưt. Wăt tơdah diñu srăng mâo êbeh dlai mnơ̆ng ƀơ̆ng huă, dưi hdĭp hlăm krĭng bŏ hŏng êa ksâo leh anăn êa hnuê ƀiădah hlăm ai tiê diñu ênguôt hnĭng. Klei rŭng răng leh anăn hjăn păn bŏ hlăm ai tiê, anei jing klei huĭ prŏng hĭn phung ƀuôn sang Aê Diê. Khua Yang Yêsu lač leh, “Ƀiădah Yêsu lŏ wĭt lač, “Klei Aê Diê Blŭ čih leh snei: ‘Mnuih hdĭp amâo djŏ knŏng hŏng kpŭng ôh, ƀiădah kyua jih klei blŭ kbiă mơ̆ng ƀăng êgei Aê Diê.” (Y‑Mathiơ 4:4). Si Aê Diê bi mklă kơ grăp čô drei?

Ya klei drei dôk huĭ hyưt hĭn? Djŏ mơh klei ƀun ƀin, klei bi blah, yan adiê ngă, klei ruă tưp, klei bi mguôp kruh rai amâodah klei djiê? Anak mnuih dŭm gưl ênuk ăt rŭng răng hŏng dŭm klei anăn, ƀiădah Aê Diê kiă kriê hlăm jih jang klei. Klei năng huĭ hyưt hĭn jing klei soh ngă kơ Aê Diê wĭr ƀô̆ amâo dlăng kơ drei msĕ si Klei Aê Diê Blŭ lač: “Nĕ anei, kngan Yêhôwa amâo jing đŭt ôh tơl Ñu amâo dưi bi mtlaih, knga Ñu kăn dăl rei tơl Ñu amâo dưi hmư̆ ôh. Ƀiădah klei wê diih yơh bi ktlah leh diih mơ̆ng Aê Diê diih. Klei soh diih yơh mdăp hĕ leh ƀô̆ mta Ñu mơ̆ng diih tơl Ñu amâo hmư̆ ôh” (Y‑Êsai 59:1-2). Brei drei mđing kmhal klei soh čiăng klei bi mguôp drei hŏng Aê Diê kjăp nanao.

Drei mđing kmhal klei soh mtam leh mơ̆ amâodah ka?

Wah lač: Bi mni kơ Aê Diê khăp nanao kơ kâo. Akâo kơ Ih brei kâo mđing mkŏ mjing klei bi mguôp hŏng Ih, mâo knuih leh anăn bruă ngă djŏ hŏng klei soh, čiăng kơ kâo dưi mâo klei hdĭp êđăp ênang, jăk mơak nanao hŏng Ih.

Dlăng Klei Aê Diê Blŭ hlăm tlâo thŭn: Y‑ Êsai 55:6–56:12

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcTus Tswv Haivneeg Nyuaj Siab Vim Ua Txhaum – 31/10/2022 
Bài tiếp theoDân Chúa Đau Buồn Vì Phạm Tội – 31/10/2022