II Hơ’mon 30:21-22
“Hesekia pơma pơhiôk jơhngơ̆m lu bơngai Lêwi đei đon hlôh wao bơ̆jang kơ Kră Yang…”(II Hơ’mon 30:22a)
Nơ̆r jet tơchĕng pơwao:
– Lu bơngai Lêwi, ‘bok soi păng bơngai Isơrael pơm kiơ lăm năr giĕng?
– Pơtao Hesekia pơma pơhiôk kơ lu đe bu?
– Đei jơhngơ̆m pơma pơlung băl lăm Khul Bơngai Lui kăl kơ pơma pơlung pơhiôk băl thoi yơ?
‘Bar trong nơ̆r ‘Bok Kei-Dei âu pơpôi đĭ tơdrong wei răk pơm giĕng sa ‘bĕng ưh kơ đei puih pông lăm Isơrael lăm tơpơh năr. Lu sư wei tơdrong pơm giĕng chơt hiôk tơpă yua kơ đei Kră Yang ‘mêm mơnat oei hơdai đơ̆ng rŏng kơ lơ sơnăm ưh kơ đei kơkuh kơ Sư. Lăm đĭ tơpơh năr bơngai Lêwi păng lu ‘bok soi năr ayơ ling lang hơri bơnê kơkuh kơ Kră Yang, hăm tơdrong reh brŏ wang hơdai. Lu bơngai Lêwi, lăm noh đei lu ‘bok soi, sa tơmam soi mă đe hơgăt ăn tơmam mă lu sư gơh sa. Lu sư kư̆m đei pơyơ̆r tơmam soi hiôk hian păng bơnê kơ Kră Yang, Kră Yang ‘Bok Kei-Dei jơ̆ ‘bok lu sư. Tơmam soi hiôk hian ngăl juăt kơ pơyơ̆r ăn bơnê kơ Kră Yang, wă kơ krao khan, dah minh tơmam soi bơnê (Lêwi 7:11-18). Tơmam soi hiôk hian đei lu ‘bok soi sa hăm tơdrong chơt hiôk hăm lu bơngai pơyơ̆r tơmam soi wă tơ’bôh jơhngơ̆m đei tơ’bưh dih băl, chơt hiôk gah tơdrong hiôk hian gơh đei tŏk bŏk lu sư hăm tơduă, hăm Kră Yang (Bơtho khôi juăt 27:7). Sŏng sa kơ Phĕt Năm Brih, dah sŏng sa phĕt hiôk hian jơ̆ dôm tơdrong mă đêl juă kơ pơm kơplah akŭm giĕng sa ‘bĕng ưh kơ đei Puih pông.
Pơtao Hesekia ưh kơsĭ lăp đei jơhngơ̆m ‘mêm mơnat đĕch, mơnat ăn tơdrong pơm ưh tam ‘blep, ưh kơ pơm kiơ̆ tơdrong pơm giĕng rok thoi lu bơngai Isơrael truh đơ̆ng gah yă nơ̆m đĭ đunh bơih ưh kơ băt kơkuh kơ Kră Yang thoi yơ (II Hơ’mon 30:19), mă sư oei “pơma pơlung lăm jơhngơ̆m” wă khan pơma pơhiôk pơdrŭt lu bơngai Lêwi, lăm noh lu ‘bok soi yua kơ lu sư hlôh nhen lăm tơdrong jang kơkuh kơ Kră Yang. Lu bơngai âu đĭ jơhngơ̆m wă tơgŭm bơ̆jang kơ Kră Yang păng pơm tơ’bôh tơdrong hlôh băt lu sư lăm tơdrong pơm giĕng ‘nâu (II Hơ’mon 30:16-17).
Chăl ayơ kư̆m lei lăi, nơ̆r pơma pơlung pơdrŭt băl noh kăl dêh wă ba ăn tơdrong “Pơhiôk lăm jơhngơ̆m” ăn kơ đĭ đăng bơngai tơgŭm tơdrong jang Kră Yang lăm phara tơdrong jang lăm Khul Bơngai Lui. Nơ̆r pơma pơlung, đei pơm ‘noh wă tơ’bôh tơdrong băt bơnê kơ lu kon pơlei Kră Yang dih băl lăm Hnam akŭm gô tơgŭm lu bơngai wang tơgŭm tơdrong jang Kră Yang na gô hiơt đĭ tơdrong gleh glăn pơmat tat păng lăm jơhngơ̆m rai hưch hanh hloh lăm tơdrong bơ̆jang awih awăn. Lu bơ̆n ngăl pơm glăi ‘noh kret kơ nơ̆r pơma bơnê pơư mă hăt kơ pơma pơjăm pơjuă hăm lu bơngai chu iŏk tơdrong anat anot lăm lu bơ̆n. Apinh Kră Yang tơgŭm bơ̆n ling lang pơma pơhiôk dih băl, băt bơnê kơ Kră Yang păng bơnê dih băl ‘nĕ kơ yua nơ̆r pơm kơ đe bơ̆l hăl hăm lu bơngai mă đei jang păng oei jang kơ Kră Yang hăm đĭ jơhngơ̆m.
Ơ Kră Yang, inh bơnê kơ Ih ăn kơ Khul Bơngai Lui đei lơ bơngai bơ̆jang. Apinh Ih ăn kơ inh gơh ‘bôh tơdrong jang gleh anat, tơdrong mă lu sư kĕ chu iŏk đei tơgŭm lu kon triu Ih wă kơ ling lang yua nơ̆r pơhiôk păng pơdrŭt lu bơngai bơ̆jang hăm đĭ jơhngơ̆m lăm tơdrong jang Ih. Yua anăn Kră Yang Yêsu Krist, Amen.
Lu bơ̆n ngăl đei nơ̆r pơma pơlung dih băl dah chă tơdrong yoch đe wă kơ pơjăm dih băl?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 10
Kênh Youtube BHKTHN: