II Xwmtxheej Vajntxwv 30:23-27
Nqe cim:
“Vajtswv, kuv yuav mus rau ntawm koj lub thaj, cia kuv mus cuag koj, kuv thiaj muaj kev kaj siab thiab zoo siab.” (Phau Ntawv Nkauj 43:4a)
Lus nug rau sawvdaws xav:
– Vim li cas tagnrho cov pejxeem xav ua kevcai ntxiv xya hnub?
– Cov neeg uas pehawm Vajtswv yuav tau muaj lub siab zoo li cas? Tau nqi zog dabtsi?
– Nimno peb yuav tsum pehawm zoo li cas kom tus Tswv mloog thiab foom koob hmoov rau peb?
Tom qab uas ua kevcai noj ncuav tsis xyaw keeb tau xya hnub, ces tagnrho cov pejxeem sawvdaws muaj kev txiav txim siab ua kevcai ntxiv xya hnub thiab. Tsuas yog tiam uas Vajntxwv Xalumoos kav thiaj muaj ib zaug zoo li zaum no (I Vajntxwv 8:65). Txoj kevcai qhia kom yuav tsum ua lub kevcai no xya hnub xwb tiamsis qhov uas lawv ua ntxiv yog vim lawv kub siab lug thiab zoo siab heev thaum lawv tau nyob hauv Vajtswv. Vajntxwv Hexekiyas thiab cov Yudais tej nomtswv kuj qhia tshwm txojkev zoo siab, lawv txaus siab hlo muab ob txhiab tus heev nyuj, xya txhiab tus yaj rau cov pejxeem, yog li lawv thiaj muaj txaus zaub mov noj hauv xya hnub ua kevcai ntxiv.
Tagnrho cov neeg Yudais nrog rau cov povthawj thiab cov neeg Levis, cov neeg Yudais uas tuaj pem tebchaws Yixalayees tuaj, lwm haivneeg uas nyob hauv lub tebchaws thiab tuaj lwm qhov tuaj, txhua tus puavleej zoo siab. Raws li Mauxes txoj kevcai, cov uas yog lwm haivneeg nyob hauv lub tebchaws kuj tau cai koom ua Kevcai Hla Dhau yog hais tias lawv xav koom (Teev Npe 9:14). Hauv kev pehawm Vajtswv, thaum muaj kev koom siab ces muaj kev zoo siab, tagnrho txhua tus puavleej xyivfab hlo. Txojkev zoo siab ntawd nthuav dav mus thoob plaws cov Yixalayees, “Sawvdaws muaj kev lomzem zoo siab thoob plaws hauv lub nroog Yeluxalees.”, txhais tau tias yog ib txojkev zoo siab tshaj plaws uas tsis tau muaj dua ib zaug, txij thaum Vajntxwv Xalumoos los txog nimno. Cov povthawj thiab cov Levis sawv thov Vajtswv foom koob hmoov rau cov pejxeem (II Kevcai 10:8). Dua li qhov uas zoo siab thoob plaws, qhov uas cov pejxeem xav tau tshaj plaws thaum koom siab pehawm yog tau “tus Tswv foom koob hmoov rau cov pejxeem sawvdaws.” (nqe 27).
Thaum tagnrho cov pejxeem sawvdaws koom siab pehawm Vajtswv, ces qhov ntawd yog kev pehawm haum Vajtswv siab, Nws yuav foom koob hmoov thiab teb lawv tej lus taij thov. Cov neeg pehawm yuav kub siab, puv npo kev zoo siab thaum ntsib tus Tswv thiab txaus siab hlo fij tej uas zoo tshaj plaws rau tus Tswv ib yam li cov vajntxwv thiab cov nomtswv hauv ntu Vajluskub no hais. Nimno, peb kuj muaj kev pehawm, tau Vajtswv hnov thiab foom koob hmoov zoo li ntawd; yog txhua tus thawjcoj Pawg Ntseeg, txhua tus ntseeg puavleej tuaj pehawm Vajtswv koom ua ib lub siab los ntawm sab ntsujplig thiab qhov tseeb. Tej lus uas sawvdaws koom siab thov Vajtswv yuav nrov mus txog tus Tswv uas nyob saum ntuj. Yog tias sawvdaws tuaj ua ke tsis muaj kev koom siab ces yuav ua rau tus Tswv chim thiab tsis hnov lawv tej lus thov. Thov Vajtswv pab kom peb txhua tus tuaj pehawm Vajtswv tas siab, koom siab kom txhua tus puavleej muaj kev zoo siab, muab tej uas zoo tshaj plaws fij rau Nws.
Thov Vajtswv,
Vajtswv, yog hauv nyuam yaus muaj yam dabtsi thaiv lub siab pehawm Koj thiab tsis tau muaj kev zoo siab tiag, thov Vajtswv Koj qhia thiab pab kom nyuam yaus muab tso tawm mus. Thov Koj pab kom nyuam yaus muaj lub siab pehawm Koj xyivfab hlo. Nyuam yaus tuav Yexus Khetos lub npe thov, Amees.
Peb puas muab lub siab zoo tagnrho los mus pehawm thiab fij khoom rau Vajtswv?
Nyeem Vajluskub hauv peb lub xyoo: Yaxayas 11
Kênh Youtube BHKTHN:
