Tơdrong Pơđơ̆k 1:8-9
“Ơ dăm, mơ̆ng bĕ nơ̆r mĕ bơtho pơkă; păng ‘nĕ hiơt kơ nơ̆r ‘bă ih bơtho khan”
(Tơdrong Pơđơ̆k 1:8)
Nơ̆r jet tơchĕng pơwao:
– Pơtao Salômôn bơtho tơ’bôh kơ kon hơ’lơ̆p sư tơdrong kiơ?
– Sư tơ’bôh nơ̆r bơtho đơ̆ng mĕ ‘bă noh thoi yơ?
– ‘Bar trong lăm Sơ̆p hla bơar Pơđơ̆k âu tơ’blŏk ăn kơ mĕ ‘bă păng kon hơ’lơ̆p tơdrong kiơ?
Hơdrol kơ pơhrăm lăm chăl arih, tơdrong hơnă gĭt kăl hloh lăm tơdrong bơtho tơ’bôh noh jơ̆ đơ̆ng mĕ ’bă. Hnam dơnŏ noh jơ̆ anih tơm hloh păng mĕ ’bă noh jơ̆ ‘bok thây bơtho hơdrol ăn kơ kon hơ’lơ̆p. Thoi noh, pơih nơ̆r blŭng a lăm Sơ̆p hla bơar Pơđơ̆k, pơtao mă hơgei hloh đei bơtho khan thoi âu: “Ơ dăm, mơ̆ng bĕ nơ̆r mĕ bơtho pơkă; păng ‘nĕ hiơt kơ nơ̆r ‘bă ih bơtho khan”
‘Bok Kei-Dei pơjing hnam dơnŏ noh jơ̆ anih blŭng a mă đei pơtơm tơdrong lui đon lui ăn kơ kon hơ’lơ̆p. Dôm nơ̆r bơtho đơ̆ng mĕ ’bă ưh kơ trŏ hơdrô̆ đơ̆ng lu sư mơn kơ lăm chăl arih đĕch, mă lei noh jơ̆ tơmam pơsư̆ lăm đon lui tơdah tơdrong noh dan lăm Nơ̆r ‘Bok Kei-Dei. Thoi noh pơtao Salômôn bơtho pran dêh tơdrong blŭng a ưh kơ trŏ “athei pơm tơdrong kiơ”, mă lei “athei mơ̆ng”. Mơ̆ng ưh kơ sĭ mơ̆ng hăm đon đĕch ôh, mă lei athei đei đơ̆ng lăm jơhngơ̆m athei đei iŏk đon hơla. Bơngai mă pơm kon athei mơ̆ng nơ̆r bơtho tơ’blŏk, hli yom kơ Kră Yang na weh ataih đơ̆ng dôm tơdrong glăi mă đêl mĕ ’bă đei hlôi pơ̆k huŏng. Pơtao Salômôn pơtih gia kơ tơdrong noh nhen thoi “hơgăl pơkao tơ kơ pal kơ̆l” păng “thoi rơbưn glang ‘băk tơ ako” (trong 9), noh jơ̆ rup lăm tơdrong ‘lơ̆ng, păng tơdrong đe pơ ư-ang păng tơdrong bơwei. Nơ̆r bơtho khan athei yak lăm trong Kră Yang ưh kơ trŏ tơdrong gleh trăp, mă lei tơdrong pơm ‘lơ̆ng kơ kon hơ’lơ̆p păng lăm chăl arih.
Trong 8 tơ’bôh kơ tơdrong Kră Yang pơjao tơdrong bơtho tơ’bôh tơdrong lui noh jơ̆ ăn kơ mĕ ’bă. Bơngai pơm ‘bă Kră Yang đei krao lu sư dui ba kon hơ’lơ̆p hăm tơdrong gơh hơgei păng tơpăt; bơngai pơm mĕ kăl kơ bơtho hăm tơdrong ‘mêm, tơdrong chu gô đei tơdrong tơplih păng tơdrong arih ‘lơ̆ng trŏ ăn kơ kon hơ’lơ̆p. Kơplah mĕ ’bă yak năm hăm Kră Yang, nơ̆r bơtho ‘noh jơ̆ gĭt dêh ưh kơ đei tơdrong pơting, yua kơ kon hơ’lơ̆p ưh kơ trŏ lu sư mơ̆ng lăm tơdrong bơtho đĕch ôh mă lei lu sư kư̆m đei ‘bôh tơdrong arih sa rim năr. Tơdrong âu jơ̆ pơm ăn kơ kon hơ’lơ̆p ‘blŏk răk đunh ưh kơ trŏ kơ nơ̆r bơtho kơjung, mă lei đei ‘bôh tơdrong ‘bônh kơ hŏk iŏk noh jơ̆ đơ̆ng ‘bôh rup lăm tơdrong arih; mĕ ’bă ling lang kơ đŏk Nơ̆r ‘Bok Kei-Dei chăl arih mĕ ’bă thoi noh tơgŭm ăn kơ tơdrong bơtho đei tơdrong gơh hơgei đei tơdrong hơiă păng ‘bôh tơdrong tơpă lăm tơdrong bơtho.
Lu mĕ ’bă dôm tơdrong bơtho kăl kơ đei tơdrong ‘mêm. Bơtho ưh kơ đei tơdrong ‘mêm ba ăn kơ kon hơ’lơ̆p gleh lap; mă lei dah bơtho kon hơ’lơ̆p đei tơdrong ‘mêm đĕch ưh kơ đei tơdrong tơpăt lăm hnam dơnŏ gô pơm ăn kơ kon hơ’lơ̆p lăng mĕ ’bă ưh kơ rơ-a. Tơdrong tơpăt kăl kơnăm hơdai hăm tơdrong ‘mêm, nơ̆r bơtho gô ba ăn tơdrong bơwei kon hơ’lơ̆p ưh kơ trŏ pơgăn hơlơ̆p. Hăm kon hơ’lơ̆p, ‘nâu jơ̆ nơ̆r krao pơtơm băt kơ dôm tơdrong song ăn đơ̆ng Kră Yang, noh jơ̆ nơ̆r bơtho đơ̆ng mĕ ’bă. Lăm teh đak đei lơ tơdrong nơ̆r bơtho pha ra ưh kơ băt wă yak trong ayơ, nơ̆r bơtho kiơ̆ trong Kră Yang noh jơ̆ nhen tơdrong ba ăn trong năm ‘lơ̆ng trŏ wă ba ăn tơdrong dơ̆ng kơjăp lăm chăl arih mă khan truh tơ wơ̆ tơ̆l, noh jơ̆ tơmam pơsư̆ gĭt ưh kơ đei tơdrong kiơ pơting năm hơdai kon hơ’lơ̆p đĭ chăl arih.
Ơ Kră Yang, inh bơnê kơ Ih yua kơ Ih đei ăn kơ inh nơ̆r bơtho đơ̆ng lăm hnam dơnŏ. Apinh Ih tơgŭm inh băt kơ mơ̆ng, arih kiơ̆ kơ trong Ih, păng gô ba ăn kơ inh jing mĕ ’bă pơsư̆ ăn kơ kon hơ’lơ̆p đei đon lui. Krao khan yua anăn Kră Yang Yêsu Krist, Amen.
Bơ̆n pơm mĕ ’bă, bơ̆n đei bơtho tơ’bôh kơ kon hơ’lơ̆p bơ̆n tơdrong kiơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Sachari 11
Kênh Youtube BHKTHN:
