Klei Aê Diê Blŭ: Klei Bi Hriêng 20:2-3, Kôlôs 3:12-17
Êlan kliăng: “Jing klei mpŭ kơ mnuih amâo ngă ôh klei bi mneh msao, ƀiădah knŏng mnuih mluk lĕ hlăm klei anăn” (Klei Bi Hriêng 20:3)
Klei êmuh ksiêm mĭn: Si boh jhat mơ̆ng klei bi mneh msao? Si klei mdê plah wah phung thâo mĭn hŏng phung mluk hlăm bruă msir klei amâo thâo bi djŏ? Si knuih phung đăo brei mâo čiăng ñĕ kơ klei mneh msao?
Phung mluk khăng mĭn knŏng klei mneh msao čiăng dưi hĭn kơh arăng mâo klei mpŭ, ƀiădah boh sĭt knŏng mjing digơ̆ jing mnuih mluk. Klei bi mneh msao lu jing hriê mơ̆ng klei mgao, amâodah kyua amâo dưi ư̆ ăn ôh klei hlơr. Tơdah bi mneh msao hŏng phung mâo klei dưi, mâo bruă prŏng ba klei amâo jăk kơ pô (êlan 2). Wăt tơdah klei pô blŭ jing djŏ, snăn klei bi mneh msao ăt ênưih ngă kơ phung ngă khua amâodah phung mâo klei dưi đĭ ai, ăt kăn djŏ jing klei thâo mĭn rei. Tơdah dưi tlaih kơ klei phung mâo klei dưi bi kmhal, snăn ăt luč mơh klei arăng mpŭ kơ pô kyua arăng lač pô jing mnuih khăng mneh msao:“Jing klei mpŭ kơ mnuih amâo ngă ôh klei bi mneh msao”.
Klei amâo thâo bi djŏ ăt mâo nanao klei hdĭp, ƀiădah phung thâo mĭn srăng thâo hdră ñĕ kơ klei bi mneh msao, amâodah hĭn mơh, diñu ăt mâo klei thâo bi grăng hŏng klei thâo mĭn, mbruă. Dua rup bi mklăk: Mnuih mluk bi mneh msao nanao hlăm djăp klei amâo thâo bi djŏ, ƀiădah phung thâo mĭn duah hdră msir mgaih klei amâo thâo bi djŏ. Phung thâo mĭn mđing kơ bruă ba klei êđăp ênang hĭn kơ bi mneh msao čiăng mă klei djŏ kơ pô, bi phung mluk amâo dưi ư̆ ăn ôh leh anăn mơ̆ng mphŭn yua leh klei mneh msao mjing klei bi mklă dưi hŏng amâo dưi, soh hŏng djŏ. Bruă ngă anei kñăm mgang kơ klei mgao mơ̆ng sa čô mnuih tơdah bi mĭn arăng ngă jhat kơ pô. Phung thâo mĭn duah klei luă gŭ, amâo hlơr ai, msir mgaih djăp klei amâo thâo bi djŏ hŏng klei mbruă.
Khua ƀĭng kna Y‑Pôl mđĭ ai grăp čô đăo brei hdĭp klei hdĭp mrâo bi êdah klei khăp. Klei yuôm bhăn čiăng kơ drei dlăng hlăm djăp klei amâo thâo bi djŏ jing: “hơô bĕ klei thâo pap, ai tiê jăk, klei luă gŭ, klei êdu êun, leh anăn klei gĭr. Bi tŭ hdơ̆ng diih, leh anăn tơdah sa čô mâo klei hŏng mnuih mkăn, bi pap brei hdơ̆ng diih. Msĕ si Khua Yang pap brei kơ diih leh, brei diih pap brei msĕ mơh” (Kôlôs 3:12b-13).
Akâo kơ Yang Mngăt Jăk đru drei thâo kơ klei Aê Diê pap brei kơ pô čiăng drei thâo pap kơ phung mkăn. Hriăm mơ̆ng Khua Yang kơ klei bi ti gŭ pô, amâo dưm hing ang, klei ktưn hưn kơ pô ti dlông bruă bi guh kơang Anăn Aê Diê leh anăn klei thâo bi djŏ, sa ai hlăm ayŏng amai adei hlăm Khua Yang.
Drei khăng bi mneh msao čiăng mâo klei dưi kơ pô mơ̆?
Wah lač: Ơ Khua Yang, bi mni kơ Ih khăp leh anăn pap brei klei soh kâo. Akâo kơ Ih brei kơ kâo ai tiê luă gŭ, thâo khăp leh anăn thâo mĭn čiăng msir mgaih klei amâo thâo bi djŏ hlăm ayŏng amai adei kâo. Akâo kơ Khua Yang đru kâo thâo bi đru sa ai čiăng bi guh kơang Anăn Ih.
Dlăng Klei Aê Diê Blŭ hlăm tlâo thŭn: Y‑Sakari 13:1-14:21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
