Klei Aê Diê Blŭ: Y-Đaniel 1:8-21
Êlan kliăng: “Čiăng kơ diih jing êngeh amâo mâo klei dưi ƀuah ôh, jing phung anak Aê Diê amâo mâo klei čhŏ ôh ti krah ênuk phung soh leh anăn jhat. Ti krah diñu diih mtrang msĕ si pui mngač hlăm lăn ala,” (Philip 2:15).
Klei êmuh ksiêm mĭn: Ya klei kñăm čiăng, mtao Y-Nebukatnetsar hrŏng ruah phung hlăk ai Yuđa? Si Y-Đaniel leh anăn phung mah jiăng ñu lŏ wĭt ngă hŏng klei anăn? Ya jing boh mơ̆ng knhuah anăn? Si brei phung đăo dôk hdĭp hlăm lăn ala anei?
Hlăm êlan 4, 5 leh anăn 19, Y-Đaniel lač klă, mtao Y-Nebukatnetsar bi hriăm mjuăt phung hlăk ai Yuđa kñăm čiăng brei diñu “mă bruă ti anăp mtao” amâodah “ngă bruă” hlăm sang mtao. Čiăng dưi ngă klei kñăm anăn, mtao anei bi êdah sa hdră, kñăm čiăng bi mlih kluôm dhuôm klei blŭ, klei thâo, anăn iêu leh anăn wăt klei huă ƀơ̆ng diñu. Hlăm klei truh msĕ snăn, si Y-Đaniel leh anăn tlâo čô mah jiăng lŏ wĭt ngă?
Drei amâo mâo ƀuh ôh sa klei bi kdơ̆ng mơ̆ng pă čô hlăk ai anei ti anăp hdră sa čô mtao đăo kơ yang mkăn, êngao kơ klei ñu knŏng akâo amâo mâo yua mnơ̆ng ƀơ̆ng huă mtao (êlan 8). Klei ƀo ̆ mta asei mlei Y-Đaniel leh anăn tlâo čô mah jiăng ñu “siam hĭn… êmŏng hĭn” (êlan 15) leh anăn klei knhâo thâo mĭn “hlăm jih jang phung diñu amâo mâo ƀuh sa čô ôh msĕ”, “pluh bliư̆ thâo hĭn kơ jih phung mdian leh anăn phung ksiêm mtŭ hlăm jih ƀuôn ala mtao” leh rue ̆ tlâo thŭn mtô mjuăt (êlan 19-20), brei ƀuh diñu mă tŭ mông găl anei hŏng klei sĭt êmĭt. Klei Aê Diê “brei Y-Daniel mâo klei khăp leh anăn klei pap” (êlan 9) leh anăn “brei kơ pă čô hlăk ai anăn mâo klei thâo mĭn lu, klei mbruă hlăm jih klei hriăm leh anăn klei knhâo” (êlan 17) bi êdah Aê Diê tŭ ư klei bi hriăm mjuăt leh anăn klei diñu mprăp mă bruă hlăm sang mtao đăo kơ yang mkăn. Kyuanăn yơh, Y-Đaniel kdrêč 1 bi ruĕ hŏng êlan “Y-Đaniel ăt dôk tinăn tơl thŭn tal sa mtao Y-Sirus kiă kriê” (êlan 21).
Y-Đaniel amâo ƀơ̆ng huă mnơ̆ng jăk mtao ôh, ƀiădah ñu ăt dôk dơ̆ng ti anăp mtao. YĐaniel čuăn amâo bi čhŏ ñu hŏng klei mtao hur har čiăng bi mlih diñu kluôm dhuôm, ƀiădah ñu ăt mjuăt ñu pô jing mnuih knhâo mbruă kdlưn hĭn pioh mă bruă. Hrô kơ klei amâo ư ai, phat kđi, dlưh ai tiê ti anăp phung mă ƀuôn sang pô jing mnă, Y-Đaniel hdĭp hŏng ai tiê klei mĭn tui si klei blŭ mơ̆ng khua pô hưn êlâo Y-Yêrêmi 29:5-14, gưt, akâo kwưh klei êđăp ênang leh anăn bi mđĭ kyar ƀuôn prŏng anôk diñu dôk hdĭp. Ăt hŏng ai tiê klei mĭn msĕ snăn mơh, hră Philip 2:15-16 iêu mthưr phung anak Aê Diê, hrô kơ klei blŭ duñ duñ, ƀuah ăl, brei jing “êngeh amâo mâo klei dưi ƀuah ôh… amâo mâo klei čhŏ” leh anăn ti krah djuê ana soh jhat, bi kdơ̆ng anăn, brei djă pioh kjăp klei đăo hdĭp, mtrang mngač kơ lăn ala msĕ si pui kƀong. Hŏng phung đăo, lăn ala drei dôk hdĭp anei amâo djŏ jing sang ôh. Khă snăn dưn, Aê Diê ăt iêu mthưr drei brei jing pui kƀong mngač, mtrang atăt jih jang mnuih hriê kơ Khua Yang. Lăn ala amâo ƀuh ôh Khua Yang hŏng knhuah hdĭp răk ruê ăl čôñ, rŭng ênguôt, dluh ai drei. Lăn ala srăng ƀuh Khua Yang hŏng knhuah hdĭp jăk mơak ti sang hră, anôk mă bruă, hlăm ƀuôn sang riêng gah hŏng knhuah mă bruă hŏng jih ai tiê “Ya mta bruă diih ngă, ngă bĕ hŏng jih ai tiê, msĕ si mă bruă kơ Khua Yang, amâo djŏ kơ mnuih ôh.” (Kôlôs 3:23).
Si knhuah drei dôk mă bruă leh anăn hriăm hră?
Ơ Khua Yang, sĭt amâo ênưih ôh dôk hdĭp jăk mơak ti krah lăn ala amâo mâo đăo. Akâo Khua Yang thiăm brei kơ kâo klei ktang myang čiăng dưi dôk hdĭp mtrang mngač kơ lăn ala msĕ si pui kƀong.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 21:9-42
Kênh Youtube BHKTHN:
