Klei Aê Diê Blŭ: II Kôrantô 9:8-15
Êlan kliăng: “Leh anăn Aê Diê dưi brei kơ diih jih klei pap êbeh dlai, čiăng kơ diih dưi mâo djăp mta mnơ̆ng nanao, leh anăn dưi brei lu êbeh kơ djăp mta bruă jăk… Bi mni kơ Aê Diê kyua mnơ̆ng Ñu brei arăng amâo dưi mblang ôh” (II Kôrantô 9:8, 15)
Klei êmuh ksiêm mĭn: Khua ƀĭng kna Y‑Pôl brei thâo Aê Diê brei djăp jih klei pap êdeh dlai ya pioh ngă? Ya klei msĕ mơ̆ng bruă đru mnuih ƀun ñu lač msĕ hŏng phung rah mjeh? Ya boh tŭ mơ̆ng ai tiê kmah hlăm bruă thâo đru? Ya bruă jăk mđĭ ai drei ngă?
Tơdah mtô kơ klei myơr, Khua ƀĭng kna Y‑Pôl amâo djŏ knŏng hưn kơ klei ƀuh lu srăng wiă lu ôh, ƀiădah lŏ lač kơ bruă drei myơr hŏng si ai tiê leh anăn knuih (êlan 1-7). Ñu lŏ dơ̆ng mđĭ ai phung ƀuôn sang Aê Diê hlăm Sang Aê Diê Kôrantô Aê Diê jing phŭn kơ klei mdrŏng, êbeh dlai đru kơ phung jing dŏ Ñu amâo djŏ knŏng “…čiăng kơ diih dưi mâo djăp mta mnơ̆ng nanao, leh anăn dưi brei lu êbeh kơ djăp mta bruă jăk” (êlan 8).
Khua ƀĭng kna Y‑Pôl bi hmô bruă đru kơ phung ƀun ƀin msĕ si sa čô mnuih rah mjeh. Asăr mjeh dưi rah jing điêt ƀiădah truh wưng srăng čăt jing lu (êlan 10), tơdah asăr mjeh amâo rah snăn lă lar knŏng jing asăr mjeh điêt dhiêt đuč. Ăt snăn mơh, boh tŭ mơ̆ng bruă bi đru anei jing prŏng snăk, êlâo hĭn jing “bi djăp klei kƀah phung doh jăk”, leh anăn jing phung đăo dưi mâo mă klei đru “srăng bi truh klei bi mni kơ Aê Diê lu êbeh” (êlan 12-13). Phung đăo Yuđa ti Yêrusalem tuôm thâo leh ai tiê mă bruă tŭ mă Klei Mrâo Mrang Jăk mơ̆ng phung đăo Kôrantô, ară anei diñu lŏ thâo ayŏng adei phung đăo tinei mâo ai tiê kmah hlăm bruă đru brei. Mơ̆ng anăn, diñu ƀrư̆ khăp hĭn, wah lač kơ phung đăo nah êngao ti Kôrantô, mjing klei bi mguôp plah wah phung sa klei đăo hlăm Khua Yang Yêsu Krist. Sĭt nik, klei Aê Diê brei amâo dưi yap ôh, mơ̆ng mnơ̆ng dhơ̆ng truh kơ mngăt ai tiê. Bi mni kơ Aê Diê kyua mnơ̆ng Ñu brei arăng amâo dưi mblang ôh. (êlan 15).
Tơdah Aê Diê amâo brei snăn drei amâo srăng mâo ôh. Phung đăo brei thâo jih jang mnơ̆ng drei mâo jing klei Aê Diê mprăp kơ drei amâo djŏ knŏng djăp ênŭm kơ klei čiăng yua grăp hruê ôh ƀiădah lŏ dưi đru ngă bruă jăk. Kyua anăn tơdah dưm klei đăo hlăm Khua Yang Yêsu Krist leh anăn tui hlue klei sĭt nik, klei hdĭp drei srăng dưi “mâo thiăm boh mơ̆ng klei kpă ênô”, mprăp kơ djăp bruă jăk Aê Diê tiŏ nao. Tơdah djăp bruă jăk drei mơ̆ng ai tiê hdơr knga kơ Aê Diê leh anăn ai tiê khăp kơ ayŏng adei, drei srăng mâo lu klei khăp Anăn Aê Diê dưi guh kơang.
Ya klei bi kgăn drei bi êdah ai tiê kmah bi đru?
Wah lač: Ơ Aê Diê Pô Khăp! Bi mni kơ Ih kyua klei ih pap brei êbeh dlai hŏng hdră jăk Ih brei leh kơ klei hdĭp kâo. Akâo kơ Ih brei kâo mprăp ai tiê đru hlăm bruă hiu hưn Klei Mrâo Mrang Jăk ăt msĕ mơh hdĭp thâo khăp mơ̆ng bruă đru brei. Čiăng kơ Anăn Ih mâo klei guh kơang mơ̆ng klei hdĭp kâo.
Dlăng Klei Aê Diê Blŭ hlăm tlâo thŭn: Y‑Malaki 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
