II Kauleethaus 9:8-15
Nqe cim:
“Vajtswv tus uas muaj ib puas tsav yam. Nws yuav pub tej uas nej yuav tsum muaj rau nej kom nej niaj hnub muaj txaus siv thiab muaj txaus coj mus pab lwm tus… Peb cia li ua Vajtswv tsaug, rau qhov Vajtswv twb pub Vajtswv txoj koob hmoov uas muaj nqis kawg nkaus rau peb lawm” (II Kauleethaus 9:8, nqe 15).
Lus nug rau sawvdaws xav:
– Timthawj Paulus qhia paub Vajtswv pub koob hmoov txaus rau txhua tus siv los ua dabtsi?
– Tes haujlwm pab cov neeg txomnyem tau Timthawj Paulus piv li tus neeg tseb noob qoob loo licas?
– Qabhau ntawm nplooj siab dav hauv kev sib pab yog dabtsi?
– Peb tau tshoov siab ua tes haujlwm zoo twg?
Thaum qhia txog txojcai fij nyiaj, Timthawj Paulus tsis yog tsuas hais txog qhov uas tseb ntau sau tau ntau xwb, tseem hais txog fij los ntawm tus cwjpwm zoo licas thiab (nqe 1-7). Nws txhawb tus Tswv cov menyuam hauv Pawg Ntseeg Kauleethaus hais tias Vajtswv yog tus uas muaj ib puas tsav yam npluamias, tsis yog tsuas pub cov uas yog Nws tug “…muaj txaus siv” xwb, tseem pub “muaj txaus coj mus pab lwm tus” thiab (nqe 8).
Timthawj Paulus piv kev ua zoo pab cov neeg txomnyem zoo li tus neeg tseb noob qoob loo. Lub noob qoob loo tseb tawm me me xwb tiamsis txog caijnyoog yuav tawg paj txi txiv ncw (nqe 10), yog lub noob qoob loo tsis muab tseb tawm ces nws kuj tsuas yog lub noob uas me me xwb. Ib yam nkaus li ntawd, qabhau ntawm kev sib pab no kuj loj kawg li, qhov xubthawj yog “pab cov ntseeg Vajtswv uas txomnyem”, txuas ntxiv yog ua rau cov uas tau txais “…muaj ntau leej ua Vajtswv tsaug” (nqe 12-13). Cov neeg Yudais ntseeg Yexus hauv Yeluxalees twb paub txog qhov uas cov ntseeg hauv Kauleethaus txais yuav Txojmoo Zoo lawm, nimno lawv paub ntxiv hais tias cov ntseeg ntawm no tseem muaj lub siab dav pab lwm tus. Thaum ntawd, lawv yim hlub thiab thov Vajtswv pab cov ntseeg hauv Kauleethaus, ua rau muaj kev sib raug zoo ntawm cov ntseeg Tswv Yexus. Tseeb tiag, Vajtswv pub txhua yam npluamias rau peb tsis hais sab nqaij tawv thiab sab ntsujplig. Thov ua Vajtswv tsaug (nqe 15).
Yog Vajtswv tsis muab pub ces peb yuav tsis muaj ib yam dabtsi. Tus ntseeg yuavtsum zeem paub hais tias txhua yam peb muaj yog tus Tswv npaj kom peb tsis yog tsuas muaj txaus siv txhua hnub xwb, tiamsis tseem muaj txaus mus ua tej haujlwm zoo. Yog li ntawd thaum ntseeg Tswv Yexus thiab mus raws qhov tseeb lawm, peb lub neej yuav “tawg paj txi txiv ncw”, txaus siab ua txhua yam haujlwm zoo uas Vajtswv txib kom peb ua. Thaum txhua tes haujlwm zoo ntawm peb tawm hauv nplooj siab nco tus Tswv txiajntsig thiab hlub peb tej kwvtij, ces peb yuav tau lwm tus hlub thiab ua rau Vajtswv tau koobmeej.
Thov Vajtswv,
Tus Tswv uas muaj kev hlub! Thov ua Koj tsaug vim Koj pub txhua yam npluamias thiab muaj lub homphiaj zoo rau nyuam yaus lub neej. Thov pab nyuam yaus txaus siab hlo koom tes hauv kev tshajtawm Txojmoo Zoo thiab pab lwm tus. Thov kom Koj tau koobmeej dhau nyuam yaus lub neej. Amees.
Yam dabtsi tav peb txoj haukev pab lwm tus los ntawm nplooj siab dav?
Nyeem Vajluskub hauv peb lub xyoo: Malakis 1
Kênh Youtube BHKTHN:
