Klei Aê Diê Blŭ: Klei Bi Hriêng 18:16‑19
Êlan kliăng: “Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô. Brei grăp čô hlăm phung diih đăm mĭn kơ klei tŭ dưn knŏng kơ ñu pô ôh, ƀiădah mĭn wăt kơ klei tŭ dưn kơ phung mkăn msĕ mơh. Brei diih mâo klei mĭn msĕ si Krist Yêsu mâo leh” (Philip 2:3-5).
Klei êmuh ksiêm mĭn: Ya klei Mtao Salômôn brei thâo khăng ngă bi soh klei kpă ênô? Hlăm bruă gĭt gai amâodah pô phat kđi ya klei ngă kơ diih mđing? Si ngă čiăng bi hrŏ klei amâo thâo bi djŏ leh anăn hdĭp thâo bi djŏ hŏng grăp čô mnuih?
Hlăm klei hdĭp amâo dưi ñĕ ôh kơ klei amâo thâo bi djŏ. Hlăk đưm adih čiăng msir mgaih klei amâo thâo bi djŏ, dŭm tĭng brei jưh kơ sa čô amâodah sa êpul čiăng phat kđi. Ƀiădah amâo djŏ ôh djăp kđi klei ăt kpă ênô leh anăn ba klei tŭ ư kơ grăp čô mnuih. Tơdah pô phat kđi mă mnơ̆ng amâodah ngăn sun, pô anăn srăng phat kđi mgang kơ sa nah tĭng. Boh blŭ “Mnơ̆ng brei mơ̆ng sa čô mnuih srăng pŏk êlan kơ ñu” (êlan 16a) lač kơ pô mă mnơ̆ng arăng srăng brei sa klei găl kơ phung nao ba ngăn kơ arăng. Prăk mah ngă bi soh klei kpă ênô. Sĭt bi mmiă, grăp čô čiăng mă klei djŏ kơ pô sơăi. Kyua anăn pô phat kđi amâo djŏ ôh knŏng hmư̆ sa tĭng ƀiădah brei mđing hmư̆ klei blŭ mơ̆ng dua tĭng (êlan 17). Hlăm ênuk đưm, phung Israel mâo klei bhiăn mă tui si myun čiăng ñĕ kơ klei bi mmiă leh anăn diñu đăo kơ klei tŭ mơ̆ng Aê Diê. Si tô hmô phung ƀuôn sang Aê Diê mă tui si myun mbha lăn Aê Diê ƀuăn, amâodah phung lĭng kahan mă tui si myun kơ ao jhung Khua Yang Yêsu. Knhal tuč, êlan 19 hưn brei răng klei bi mneh msao brei dưi msir mgaih mtăp mđơr čiăng kơ djăp klei hdĭp mda hlăm êpul êya dưi găl jăk leh anăn mâo klei bi mguôp jăk. Klei bi mmiă amâo dưi msir mgaih amâodah msir mgaih amâo mtăp mđơr srăng ba kơ klei amâo thâo bi djŏ prŏng hĭn, amâodah ba klei bi ktlah lă lar.
Anak mnuih amâo mâo ôh pô jăk kluôm dhuôm, leh anăn ăt kăn mâo mơh sa êpul lu amâo mâo klei amâo thâo bi djŏ. Lu êpul lu bi kruh kyua klei amâo thâo bi djŏ. Akâo kơ Aê Diê brei kơ grăp čô drei wăt tơdah hlăm ya boh klei ăt bi êdah klei kpă ênô Aê Diê. Sĭt tuôm hŏng klei amâo mtăp mđơr, klei kpĭ ăt jhŏng hưn lač. Sĭt jing khua gĭt gai amâodah pô phat kđi, brei bi êdah klei kpă mngač, đăm ôh kyua prăk mah bi čhŏ hĕ klei kpă ênô Aê Diê.
Phung ƀuôn sang Aê Diê brei thâo săng pô jing jơ̆ng kngan mơ̆ng sa asei leh anăn Khua Yang jing kŏ. Aê Diê thâo klă klei mĭn leh anăn bruă ngă grăp čô drei. Ñu jing Pô pah mni, bi kmhal klă mngač hlue si bruă mă grăp čô mnuih. Khua ƀĭng kna Y‑Pôl ktrâo lač drei hdră mkŏ mjing klei bi mguôp hdơ̆ng drei leh anăn mkŏ mjing êpul êya kjăp ktang: “Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô. Brei grăp čô hlăm phung diih đăm mĭn kơ klei tŭ dưn knŏng kơ ñu pô ôh, ƀiădah mĭn wăt kơ klei tŭ dưn kơ phung mkăn msĕ mơh. Brei diih mâo klei mĭn msĕ si Krist Yêsu mâo leh” (Philip 2:3-5).
Klei hdĭp diih bi êdah leh klei kpă ênô, êdu êun hlue si Khua Yang Yêsu mơ̆ amâodah ka?
Wah lač: Ơ Khua Yang, jing Ama hlăm adiê kâo, bi mni lač jăk kơ Ih brei leh Klei Aê Diê Blŭ kơ kâo. Akâo kơ Ih bi hriăm kâo hdĭp kpă ênô, bi êdah klei kpă ênô msĕ si Klei Aê Diê Blŭ mtô. Akâo kơ Ih brei kâo mâo sa ai tiê msĕ si Khua Yang Yêsu, brei thâo hdĭp luă gŭ, mpŭ kơ grăp čô mnuih.
Dlăng Klei Aê Diê Blŭ hlăm tlâo thŭn: Y‑ Êsai 54:1–55:5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
